Jehova Thuhretute kan nih angin sakhaw dang vuantute nêna rinna chungchâng sawiho chu nuam kan ti a; mahse, biakna nêna inkûngkaih thilah erawh thurin dang neite nên rinpawlhna thil kan ti lo. Bible chuan Kristian dikte chu ‘rem takin an inchuktuah’ tih a sawi a, he inremna awm chhan ber chu rinna thuhmun an neih vâng a ni. (Ephesi 4:16; 1 Korinth 1:10; Philippi 2:2) Hetah hian thil hlu tak hmangaihna te, khawngaihna te, leh ngaihdamnate ngaihhlut tlânna mai aia tam a tel a. Kan sakhaw thurinte chu Bible hriatna dikah a innghat a, chutiang a nih loh chuan kan rinna chu thil lo thlâwn mai a ni ang.—Rom 10:2, 3.

 Bible chuan thurin dang neite nêna biaknaa telho chu Kristian rinna tiderthâwng thei, rual lo taka nghâwngkawl bah nên a khaikhin a. (2 Korinth 6:14-17) Chuvângin, Isua chuan a ziritîrte chu rinpawlhna thil an tih a phal lo. (Matthaia 12:30; Johana 14:6) Chutiang bawkin, Pathian Dân chuan Mosia kaltlangin hmân lai Israelte chu an chhehvêla awmte biakna zui lo tûrin a khap a. (Exodus 34:11-14) Chuvângin, a hnuah rinna dang neite nêna sakhaw lama thawhhona thlen thei ṭanpuina pêk an tum khân Israel mi rinawmte chuan an hnâwl a ni.—Ezra 4:1-3.

 Nei ṭhîn e. A nihna takah chuan, kum 2023 chhûng khân rinna dang neite hnêna thusawi nân dârkâr 1,791,490,713 kan hmang a. Tirhkoh Paula angin, kan rawngbâwlnaah ‘mi tam lehzualte’ ngaih dân leh thurinte hriatthiam chu kan tum a. (1 Korinth 9:19-22) Inbiakna kan neih chhûngin ‘zahna thûk tak’ lantîr tûra Bible thurâwn pêk hi theih tâwp chhuaha nunpui kan tum a ni.—1 Petera 3:15, Mizo King James Bible.