Inneihna leh inṭhenna chungchânga Bible thlîr dân chu kan zâwm a. Pathianin inneihna chu mipa leh hmeichhe inkâra inzawmna nghet tak ni tûrin a siam a ni. Bible-in inṭhen a phal chhan awmchhun chu nungchang bawlhhlawhna vâng chauh a ni.—Matthaia 19:5, 6, 9.

 Kawng tam takin an ṭanpui a ni:

•   Thu leh hla chhuahte. Hêng thu leh hla a hun taka chhuak ziah ṭhînte hian siam ṭhat theih tawh loh anga lang inneihna hial pawh a tinghet thei a. Entîr nân, “In Inneihna Thutiamte Vawng Rawh,” “Ngaihdam Dân,” tih leh “Inneihnaah Inrin Tawnna Siam Lehin,” tih thuziakte en rawn.

•   Inkhâwmte. Kan kohhran inkhâwmah te, bial inkhâwmpuiah te, leh regional inkhâwmpuiahte chuan inneihna atâna thurâwn ṭangkai takte kan sawiho ṭhîn.

•   Upate. Kohhran upate chuan nupate chu Ephesi 5:22-25 ang chî Bible chângte chhûtpuiin mi mal ṭanpuina an pe.

 Pawmpui lo vang. An inkâra harsatnate chingfel tûra nupate’n ṭanpuina an dîl a nih pawhin upate chuan an tih tûr hrilh tûrin thuneihna an nei lo. (Galatia 6:5) Amaherawh chu, Bible thu kalha inṭhen thlangtu chuan Bible ṭanchhana mi dang nei leh tûrin zalênna a nei lo.—1 Timothea 3:1, 5, 12.

 Bible chuan nupate chu an dinhmun a ṭhat lutuk lo a nih pawhin chêng dûn reng tûrin a fuih a. (1 Korinth 7:10-16) Harsatna tam tak chu ṭhahnemngai taka ṭawngṭaina te, Bible thu bul nunpuina te, leh hmangaihna lantîrna hmangtein a chinfel theih a ni.—1 Korinth 13:4-8; Galatia 5:22.

 Mahse, a hnuaia târ lan ang dinhmun khirh takah hian Kristian ṭhenkhatin a kawppui nêna awm hran chu a rêl thlûk a ngai thei:

•   Chhûngkaw enkawl duh lohna.—1 Timothea 5:8.

•   Nasa taka tharum thawhna.—Sâm 11:5.

•   Thlarau lam nun atâna hlauhthâwn awma awmna. Entîr nân, Thuhretu chu a kawppuiin kawng eng emawti taka Pathian thupêkte bawhchhe tûrin a nawrlui thei a, chuvângin ani chuan awm hran chu ‘mihring thu aia Pathian thu zawm’ theih dân kawng awmchhunah a ngai thei a ni.—Tirhkohte 5:29.