Jehova Thuhretute kan nih angin Isua’n Kristiante nun dân tûr a zirtîr ang leh a tirhkohte thil lo tih ṭhin dân ang chu zui kan tum a. He thuziak hian kan thurin bulpuite a rawn khaikhâwm ang.

1.   Pathian. Pathian dik awmchhun leh Engkimtithei, Siamtu, Jehova chauh kan bia a. (Sâm 83:18; Thu Puan 4:10, 11) Ani chu Abrahama, Mosia, leh Isua Pathian a ni.—Exodus 3:6; 32:11; Johana 20:17.

2.   Bible. Bible hi Pathian thâwk khuma mihringte hnêna thuchah a ni tih kan hria a. (Johana 17:17; 2 Timothea 3:16) Kan thurinte chu “Thuthlung Hlui” leh “Thuthlung Thar” pawh tiamin, bu 66-te ṭanchhan a ni. Professor Jason D. BeDuhn-a chuan a thuziahah inâwm takin Jehova Thuhretute chuan, “Bible-in a sawi atâna inâwma an hriatte rêl thlu sa lovin, an thurin leh thiltihahte chuan Bible sawi an ṭanchhan zâwk a ni,” tiin a sawi. a

    Bible hi a bu puma kan pawm rualin, Bible thute a ngial a ngana lâk chîng erawh kan ni lo. Bible a ṭhen lai chu tehkhin thu, a nih loh leh entîr neia ziak a ni tih leh a ngial a ngana ngaih tûr a ni lo tih kan ring a ni.—Thu Puan 1:1.

3.   Isua. Isua zirtîrnate leh a entawn tûr siam chu kan zui a, min Chandamtu leh Pathian Fapa angin kan chawimawi bawk. (Matthaia 20:28; Tirhkohte 5:31) Chuvângin, Kristian kan ni. (Tirhkohte 11:26) Mahse, Bible aṭangin Isua hi Pathian Engkimtitheia a ni lo tih leh, Trinity thurin hi Bible ṭanchhan a ni lo tih kan hre bawk.—Johana 14:28.

4.   Pathian Ram. Hei hi sawkâr tak tak a ni a, Kristiante thinlunga awm a ni lo. Chu chuan mihring sawrkârte hi a rawn thlâk ang a, leilung atâna Pathian thiltum a la rawn hlen chhuak ang. (Daniela 2:44; Matthaia 6:9, 10) Bible hrilh lâwknain a târ lan angin “ni hnuhnûngahte” kan awm tawh a, chûng thilte chu a rawn thleng thuai ang.—2 Timothea 3:1-5; Matthaia 24:3-14.

    Isua chu vâna Pathian Rama Lal a ni a. Ani chuan kum 1914 aṭangin ro a rêl ṭan a ni.—Thu Puan 11:15.

5.   Chhandamna. Sual leh thihna ata chhanchhuahna chu Isua tlanna inthawina zâra neih theih a ni a. (Matthaia 20:28; Tirhkohte 4:12) Chu inthawina hlâwkpui tûr chuan mite’n Isua an rin mai a tâwk lo, an nun dân an thlâk a, baptisma an chan a ngai a ni. (Matthaia 28:19, 20; Johana 3:16; Tirhkohte 3:19, 20) Mi chuan a thiltihin a rinna a nung tih a finfiah ang. (Jakoba 2:24, 26) Amaherawh chu, chhandamna hi hlawh chhuah theih a ni lo, “Pathian khawngaihna” vâng zâwka neih theih a ni.—Galatia 2:16, 21.

6.   Vân. Pathian Jehova, Isua Krista, leh thlarau thil siam vântirhkoh rinawmte chu vânah an awm a. b (Sâm 103:19-21; Tirhkohte 7:55) Mi tlêm tê—144,000—te chauh Lalrama Isua nêna rorêl tûra vân nunna changa kaihthawh an ni ang.—Daniela 7:27; 2 Timothea 2:12; Thu Puan 5:9, 10; 14:1, 3.

7.   Lei. Lei hi Pathianin mihringte chatuan in atâna a siam a ni a. (Sâm 104:5; 115:16;Thuhriltu 1:4) Pathianin thuawih mihringte chu lei paradis-ah hrisêlna ṭha famkim leh chatuan nunna pein mal a sâwm ang.—Sâm 37:11, 34.

8.   Sual leh hrehawm tawrhna. Hêngte hi Pathian vântirhkoh pakhat helna avânga lo awm ṭan a ni a. (Johana 8:44) He vântirhkoh, a hel hnua Setana leh Diabola tia koh tâk hian, mihring nupa tuak hmasa berte chu a helna zawm ve tûrin a thlêm thlu a, a sawhkhâwk chu an thlahte tân chhiatna nasa tak a lo ni ta a ni. (Genesis 3:1-6; Rom 5:12) Setana tihchhuah buainate ṭha taka chinfel a nih theih nân, Pathian chuan sual leh hrehawm tawrhna a awm a phal a; mahse, chatuana a awm reng A phal lo vang.

9.   Thihna. Mitthi tawhte chu an awm tawh lo va. (Sâm 146:4; Thuhriltu 9:5, 10) Hremhmun meidîlah nghaisak an tuar hek lo.

    Pathianin thawhlehna hmangin mi tlûklehdingâwn tam tak tak a tinung leh ang. (Tirhkohte 24:15) Amaherawh chu, an thawhleh hnua Pathian kawng zir duh lote chu thawhleh beiseina nei lova chatuana tihboral an ni ang.—Thu Puan 20:14, 15.

10.   Chhûngkua. Inneihna chungchânga a tîra Pathian tehna chu mipa pakhat leh hmeichhia pakhat inpumkhattîr a ni a, uirêna avâng chauhva inṭhen theih a ni. Chu tehna chu kan zâwm a ni. (Matthaia 19:4-9) Bible-a chuang finna thute chuan chhûngkuate chu hlawhtling tûrin a ṭanpui tih kan ring bawk.—Ephesi 5:22–6:1.

11.   Pathian kan biakna. Pathian kan biaknaah kraws emaw, milem dang rêng rêng emaw kan hmang lo va. (Deuteronomy 4:15-19; 1 Johana 5:21) Pathian kan biakna hmêlhmang langsâr zualte chu hêngte hi a ni:

    •   Pathian hnêna ṭawngṭai.—Philippi 4:6.

    •   Bible chhiar leh zir.—Sâm 1:1-3.

    •   Bible aṭanga kan thu zirte chhût ngun.—Sâm 77:12.

    •   Ṭawngṭai tûr te, Bible zir tûr te, hla sa tûr te, kan rinna sawi chhuak tûr te, leh Thuhretu dangte leh mi dangte fuih tûr tein kan inkhâwmho.—Kolossa 3:16; Hebrai 10:23-25.

    •   “Ram chanchin ṭha” hrilh.—Matthaia 24:14.

    •   Ṭanpui ngaite ṭanpui.—Jakoba 2:14-17.

    •   Kingdom Hall-te leh khawvêl puma kan Bible zirtîrna hna tihzauhna atâna hman inte sakna leh enkawlna.—Sâm 127:1.

    •   Chhiat tâwkte chhawmdâwlnaa tel.—Tirhkohte 11:27-30.

12.   Kan inawpna pâwl. Kohhran kan din a, kohhrante chu upate kaihhruaina hnuaiah a awm a ni. Mahse, upate hi sakhaw hruaitu an ni lo va, hlawh pêk an ni hek lo. (Matthaia 10:8; 23:8) Sâwma pakhat kan pe ngai lo va, kan inkhâwmah thawhlâwm khawn a ni ngai lo bawk. (2 Korinth 9:7) Kan hnathawh zawng zawng hi a thawhtu hriat loh thawhlâwm hmanga chhawmdâwl a ni.

     Kan world headquarters-a rawngbâwl Kristian mi puitling tlêm tê, Governing Body chuan khawvêl puma Jehova Thuhretute tân kaihhruaina a pe a ni.—Matthaia 24:45.

13.   Kan inpumkhatna. Khawvêl pumah kan rinna chu a inang vek a. (1 Korinth 1:10) Dinhmun te, chi te, hnam te, leh nihnate avânga inthliar hranna awm lo tûrin theih tâwp kan chhuah bawk. (Tirhkohte 10:34, 35; Jakoba 2:4) Chutih rualin, kan za hian mi mala duhthlan theihna kan nei a. Thuhretu tinte chuan Bible hmanga sawizawi an chhia leh ṭha hriatnain a phal angin thu tlûknate an siam a ni.—Rom 14:1-4; Hebrai 5:14.

14.   Kan nungchang. Kan thiltih kawng engkimah mahni hmasial lo hmangaihna lantîr kan tum a. (Johana 13:34, 35) Thisen inthunna hmanga thisen hman sual pawh tiamin, Pathian tilâwm lo thiltihte chu kan pumpelh a ni. (Tirhkohte 15:28, 29; Galatia 5:19-21) Remna duhtute kan ni a, indonaah kan tel lo. (Matthaia 5:9; Isaia 2:4) Kan awmna rama sawrkâr chu kan zah a, a dân siamte chu Pathian dân nêna a inkalh loh phawt chuan kan zâwm a ni.—Matthaia 22:21; Tirhkohte 5:29.

15.   Mi dangte nêna kan inlaichînna. Isua chuan: “Nangmah i inhmangaih angin i vêngte pawh i hmangaih tûr a ni,” tiin thu a pe a. Chu bâkah, Kristiante chu “khawvêla mi an ni lo” tih a sawi bawk. (Matthaia 22:39; Johana 17:16) Chuvângin, “mi zawng zawng chunga thil ṭha,” ti tûrin theih tâwp kan chhuah a; mahse, politics thilah kan tualdâwih reng a, sakhaw dang nêna inzawmna neih kan pumpelh a ni. (Galatia 6:10; 2 Korinth 6:14) Amaherawh chu, chûng thiltea mi dangte duhthlanna siam chu kan zah a ni.—Rom 14:12.

 Jehova Thuhretute thurin chungchângah zawhna dang i nei a nih chuan, kan website aṭanga i chhiar belh thei a, kan office-te zînga pakhat i be pawh thei a, i bul hnaia awm Kingdom Hall-ah i inkhâwm thei a, a nih loh leh in tualchhûnga Thuhretu pakhat i be thei a ni.