Ni lo, Jehova Thuhretute chu sakhaw pâwl hlauhawm an ni lo. Chu aiin, a ṭha thei ang bera Isua Krista entawn tûr siam zui a, a zirtîrna mila nun tum Kristian kan ni zâwk.

 “Cult” tih awmzia hi mite chuan chi hrang hrangin an hrilhfiah a. Cult chungchânga ngaih dân tlânglâwn tak chi hnih leh chutiang mi kan nih loh chhan lo en ta ila.

•   Ṭhenkhat chuan cult chu sakhaw thar, a nih loh hmân lai sakhaw tih dân dodâltu angah an ngai. Jehova Thuhretute chuan sakhaw thar an din lo va. Chumi nêna inkalh takin, kan biaknaah kum zabi khatnaa Kristiante tih dân kan entawn a, an entawn tûr siam leh zirtîrnate chu Bible-ah chhinchhiah a ni. (2 Timothea 3:16, 17) Biakna nêna inkûngkaih thilah Pathian Lehkha Thu Thianghlima târ lan hmân lai tih dân kan zui tûr a ni tih kan ring bawk.

•   Ṭhenkhatin cult chu tuemawin a hruai sakhaw pâwl hlauhawm takah an ngai. Jehova Thuhretute chuan mihring tumah hi hruaitu-ah an ngai lo va. Chu aiin, Isua’n a hnungzuitute hnêna: “In hruaitu chu pakhat chauh a ni, Krista chu,” tia a sawi hi kan zâwm zâwk a ni.—Matthaia 23:10.

 Jehova Thuhretute chu sakhaw pâwl hlauhawm nih a hnêkin, anmahni leh tualchhûnga mi dangte hlâwkpui tûr thilte ti ṭhîn an ni zâwk. Entîr nân, kan rawngbâwlna chuan mi tam takte chu damdawi leh zu hman sualna ang chî ngawlveina hlauhawm tak hneh tûrin a ṭanpui a. Chu bâkah, khawvêl pumah ziak leh chhiar inzirtîrna hun kan buatsaih a, chu chuan mi sâng tam tak ziak leh chhiar thiam tûrin a ṭanpui a ni. Chu bâkah, tha tho takin chhiat tâwkte chhawmdâwlnaah kan tel a. Isua’n a hnungzuitute hnêna ti tûra thu a pêk angin, mi dangte tâna mi ṭangkai ni tûrin theih tâwp kan chhuah bawk.—Matthaia 5:13-16.