Ni lo. Jehova Thuhretute hi Kristian kan ni a; mahse, Protestant angin kan inngai lo. Engvângin nge?

 Protestant chu “Roman Catholic kohhran dodâla, chhuahsantu Kristian sakhuate” tia hrilhfiah a ni a. Jehova Thuhretute chuan Catholic Kohhran zirtîrnate chu kan pawm lo va, chutih rualin, a hnuaia thute avâng hian Protestant angin kan inngai lo:

1.   Protestant tam takte thurin chu Bible zirtîrna dik tak nên a inkalh. Entîr nân, Bible chuan Trinity ni lovin, “Pathian pakhat chauh a awm,” tih a zirtîr a. (1 Timothea 2:5; Johana 14:28) Pathianin mi sualte chu hremhmun meidîlah ni lovin, chatuana boralnain a hrem tih chiang takin a zirtîr a ni.—Sâm 37:9; 2 Thessalonika 1:9, 10.

2.   Catholic Kohhran do emaw siam ṭhat emaw kan tum lo va, a nih loh leh sakhaw pâwl dang din kan tum lo. Chu aiin, Pathian Ram chanchin ṭha kan hril a, chu chanchin ṭhaa rinna nei chho tûrin mite ṭanpui kan tum tlat a ni. (Matthaia 24:14; 28:19, 20) Sakhaw pâwl dang siam ṭhat lam kan ngaihtuah lo va, chu aiin thinlung ṭha pute chu Pathian leh a Thu Bible chungchâng thutak zirtîr lam kan ngaihven tlat zâwk a ni.—Kolossa 1:9, 10; 2 Timothea 2:24, 25.