Jehova Thuhretute chuan Bible zirtîrnate i hriat theih nân ruahmanna ṭha tak an siam a. Kan Bible zirtîrna program chuan hêngte hi nei tûrin a ṭanpui ang che:

•   Nun hlimawm tak

•   Pathian nêna inṭhianna

•   Nakin hun atâna Bible thutiamte hriatna

He phêkah hian hêngte hi i hria ang:

•  Bible zirnaah eng nge thleng ṭhîn?

•  Zir man ka pêk a ngai ang em?

•  Zirna chu engtia rei nge ni ang?

•  Engtin nge ka neih ṭan theih ang?

•  Zir dân entîrna tawi tê ka nei chhin hmasa thei ang em?

•  Bible zirna neih remti ta ila, Jehova Thuhretu ka nih ngei ngei a ngai ang em?

•  Ka Bible ka hmang thei ang em?

•  Zirnaa lo tel ve tûrin mi dangte ka sâwm thei ang em?

•  Tûn hmain Jehova Thuhretute nên Bible lo zir tawh ta ila, ka zir leh thei ang em?

•  Kaihruaitu awm lova Bible zirna neih theih dân a awm em?

 Zirna kaihruaitu chuan Bible thute chu a thupui indawta hre tûrin a ṭanpui ang che. Chatuanin I Hlim Thei! tih lehkhabu hmanga phûrawm taka Bible sawihona aṭangin Bible thuchah leh chumiin a ṭanpui theih dân che chu a tahtawl zêlin i hria ang. Hriat belh nân, he video hi en ang che.

 Ngai lo. Isua’n a zirtîrte hnêna a pêk he kaihhruaina hi kan zâwm a ni: “A thlâwnin in hmu a, a thlâwnin pe ang che u,” tih hi. (Matthaia 10:8) Chu bâkah, Bible leh Chatuanin I Hlim Thei! tih lehkhabu pawh tiamin, zirna hmanruate chu sum sênga i lei a ngai lo vang.

 Zirtîrna atâna kan hman lehkhabuah chuan zirlai 60 a awm a. Zir chak zâwng chu i duh thlan tûr a ni a; mahse, zirlai tam tak chuan chawlhkâr khata zirlai pakhat emaw, a aia tam emaw zir chu an duh a ni.

1.  1. Online form ziak khat rawh. I mi mal chanchin chu nangmah biak pawh theih nâna i dîlna tihhlawhtlinsak nân chauh kan hmang ang.

2.  2. Zirtîrtu pakhatin a be pawh ang che. Nangmah zirtîrtu tûr chuan, phûrawm taka Bible sawihona aṭanga i beisei theih tûrte leh zawhna i neih eng pawh chu a chhânsak ang che.

3.  3.Nangmah zirtîrtu tûr che nên zirna atân ruahmanna in siam ang. Zirna chu hmaichhanah emaw, telephone-in emaw, video call-in emaw, lehkhathawn emaw, a nih loh leh email emaw hmanga neih theih a ni. Zirna chuan a tlângpui thuin dârkâr khat vêl a awh ṭhîn a; mahse, i hun neih dân azirin chu aiin a rei lo emaw, a rei zâwk emaw pawh a ni thei.

 Thei e. Chumi atân chuan online form ziak khat ang che. Zirtîrtu pakhatin a biak pawh hunah che, zirna neih i pawm dâwn leh dâwn loh hriat nân tawi têa zirna neih chhin i duh thu hriattîr ang che. Ani chuan zirna nuam i tih dâwn leh dâwn loh i hriat theih nân, hmêlhriattîrna zirlai pathum telna Chatuanin I Hlim Thei! tih brochure chu a hmang ang.

 Ngai lo. Jehova Thuhretute chuan mi dangte Bible zirpui chu nuam an ti hle a; mahse, kan pâwla lo lût tûrin tu mah kan tilui ngai lo. Chu aiin, mi tin hian an duh zâwng ring tûrin dikna an nei tih hriain leh an duh thlanna zahsak chungin Bible kan zirtîr zâwk a ni.—1 Petera 3:15.

 Thei e, eng Bible pawh i hmang thei ang. Fiah tak leh dik taka lehlin New World Translation of the Holy Scriptures Bible hman nuam kan tih êm êm laiin, mi tam tak erawh chuan an hman ṭhan Bible lehlin dangte hman chu an duh zâwk tih kan hria a ni.

 Thei e. I chhûngte leh i ṭhian tu pawh i sâwm thei ang.

 Thei e. Zirna kan neih dân chu mite mamawh nêna inmil tûra siam ṭhat chhoh zêl a nih vângin, tûn hmaa i lo zir ṭhin dân ai pawhin nuam i ti zâwk ngei ang. Chu bâkah, tûn hmaa zirna neih dân aiin en tûr leh sawiho tûr a tam tawh zâwk a ni.

 Awm e. Zirlai a tam zâwk chuan zirtîrtu pakhat nêna zir chu a ṭha ber nia an hriat laiin, ṭhenkhat erawh chuan mahnia zirna neih hmasak chu an duh a. Kan Bible Zirna Hmanruate tih phêk hnuaiah chuan Bible zirnaa nangmah ṭanpui theitu tûr a thlâwna download theih video-te leh thuziakte pho chhuah a ni. Hmanraw ṭhenkhat chu hêngte hi a ni:

•   Bible Video-te. Hêng video tawite hian Bible zirtîrna pawimawh takte a hrilhfiah.

•   Bible Zawhnate Chhânna. Hêng thuziakte hian Bible zawhna zau takte chu a chhâng.

•   Bible Chângte Hrilhfiahna. Bible châng leh ṭawngkam lâr takte awmzia hmu chhuak rawh.