Dodâl lo ve. Jehova Thuhretute hian hri vênna damdawi inchiu chu kan dodâl lo. Kristian tinte duh thlanna siam tûrah kan dah zâwk a. Jehova Thuhretute zînga tam tak chu hri vênna damdawi an inchiu tawh a ni.

 Damdawi lama inenkawlna ṭha kan zawng a, natna hlauhawm inkaichhâwn theihte laka min vêng thei damdawi lama thiamna changkâng cho tak chu kan ngai hlu a ni. Hrisêlna lam enkawltute thawhrimna leh inpêkna chu kan ngai hlu a, a bîk takin chhiatna a lo thlen hunah kan ngaihlu lehzual.

 Jehova Thuhretute chuan hrisêlna lam enkawltu sawrkâr miliante thu an âwih a. Entîr nân, COVID-19 hripui a lên ṭan tirh aṭangin, Jehova Thuhretute chuan he website-ah hriatnawntîrna thute chu ṭawng za tam takin an tichhuak a, tualchhûnga himna lam tûra kaihhruainate zâwm tûrin mite chu an fuih a ni. Chûngah chuan mihring in awm hlat leh mipui punkhâwmna lama dân zamte zawm te, inkhung hranna dân te, kut sil te, leh hmui tuamna vuah ang chi leh thuneitute rawtna pêk dangte zawm a tel a ni.—Rom 13:1, 2.

 Kum sâwmbi tam tak chhûng chu, Jehova Thuhretute thu leh hla chhuahte chuan a hnuaia târ lan thu bulte a sawi uar tawh a ni:

•   Damdawia inenkawlna hi mi mal thu tlûkna siam tûr a ni.—Galatia 6:5.

   “[He magazine] hian inenkawlna chi khat chu a chi dang aiin a chawi sâng lo va, inenkawl dân tûrah thurâwn a pe hek lo. A tum chu thil nih dân dik tak pho chhuah a, thu tlûkna siam ngai chu a chhiartu mawhphurhnaa dah hi a ni.”—Awake!, February 8, 1987.

   “Nang leh i fate’n hri vênna damdawi in chiu leh chiu loh chu mi mala thu tlûkna siam tûr thil a ni.”—Awake!, August 22, 1965.

•   Damdawia kan inenkawl chhan chu nunna kan ngaihhlut vâng a ni.—Tirhkohte 17:28.

   “Thuhretute chuan hrisêlna lama an harsatna kawnga ṭanpui tûrin damdawi lama mi thiamte an pan ṭhîn. Nunna hi an ngaina a, a theih anga rei an dam theih nân thil inâwm takte leh Bible thu nêna inkalh lo apiang chu tih an duh a ni.”—Vênnainsâng, July 1, 1975.

   “Jehova Thuhretute chuan damdawi leh damdawi lama inenkawlna chu lâwm takin an pawm ṭhîn. Hrisêlna ṭha neia rei tak dam chu an duh a ni. Dik tak chuan, kum zabi khatnaa Kristian Luka angin, Jehova Thuhretute zînga ṭhenkhat chu doctor-te an ni a. . . . Jehova Thuhretute chuan damdawi lama enkawltute thawhrimna leh inpêkna chu an ngai hlu hle a. Chûng mite min pêk damna duhawm tak avângin an lâwm hle bawk.”—Vênnainsâng, February 1, 2011.