Jehova Thuhretute inneihna chu samkhai leh zahawm taka neih a ni ṭhîn a. Bible ṭanchhan thusawi tawi pakhat a tel ṭhîn bawk. Chumi hnuah ruai ṭheh pawh tiamin lawmpuina hunin a zui thei a ni. a Isua chuan a rawngbâwl tirh lamah chutiang lawi chaw chu Kana khuaah a ei a ni.—Johana 2:1-11.

•  Engtin nge inneihna hun chu hman a nih?

•  Jehova Thuhretute inneihna chu khawi hmunah nge neih a nih ṭhin?

•  Tute nge tel thei?

•  Inneihnaa tel tûrte tân inchei dân tûr bîk a awm em?

•  Inneih thilpêk hlanna a awm em?

•  Zu no dawm kânga duhsakna inhlanna a awm em?

•  Buhfai, a nih loh leh lehkha mawi cheh nawi theh an ni ang em?

•  Ei leh in a awm ang em?

•  Rimawi ngaihthlâkna leh lâmna hun a awm ang em?

•  Jehova Thuhretute’n inneih cham an lâwm em?

 Inneihna hmêlhmang langsâr ber chu Jehova Thuhretu rawngbâwltu pakhatin minute 30 awh thusawina a neih hi a ni a. Nêlawm tak leh mi chawk phûr thei tak thusawi chuan Bible-in nupate chu inneihna nghet, nuam, leh hlimawm nei tûra a ṭanpui theih dân a sawi uar a ni.—Ephesi 5:33.

 Ram tam takah chuan, sawrkârin thuneihna a pêk Jehova Thuhretu rawngbâwltute’n dân angin an inneihtîr a. Chutiang dinhmunah chuan, thusawi tâwpah nupate chuan thu an intiam tawn ṭhîn. Zungbun pawh an inbuntîr thei bawk. Tichuan, rawngbâwltu chuan nupa an ni tih a puang ang.

 Ram dangahte chuan, nupate chu sawrkâr office-a innei tûrin dânin a phût a. Chu chu inneih thusawi hma lawkin nupate’n an ti ṭhîn a ni. Chutiang huna monu leh mopain thu an tiam dûn lo a nih chuan thusawi tâwpah an ti thei a. Thu an lo tiam tawh a, tiam nawn leh an thlang a nih chuan hun kal tawha tiam tawh angin an sawi thung ang. Thusawi chu nupa tuak tharte tâna malsâwmna dîla Pathian hnêna ṭawngṭaia tih tâwp a ni ṭhîn.

 Thuhretu tam tak chuan, a remchâng a nih chuan Kingdom Hall-a inneihna hman chu an thlang a. b A hnua lawmna dang an siam a nih chuan, chumi hmanna tûr chu hmun dang an thlang a ni.

 Inneihna chu Kingdom Hall-a neih a nih chuan a tlângpuiin Thuhretute leh Thuhretu ni lote tân pawh tel theih a ni a. Nupate’n a lawmna hun an siam a nih erawh chuan an sâwm tûrte chu an thlang ang.

 Kingdom Hall-a inneihnaah inchei dân tûr bîk a awm loh rualin, Jehova Thuhretute chuan thuam inchawih tawk leh zahawm taka inchei tûra Bible kaihhruaina chu zawm an tum tlat a. Mi dangte’n chutianga an tih ve chuan an lâwm hle. (1 Timothea 2:9) Nupate’n a lawmna hun an siamah pawh he thu bul tho hi hman theih a ni.

 Bible chuan thilphal tûrin min fuih a. (Sâm 37:21) Jehova Thuhretute chuan hlim takin inneih thilpêkte pein, an dawng bawk a ni. (Luka 6:38) Amaherawh chu, Thuhretute chuan thilpêk pe tûra ngen, a nih loh leh vântlâng hmaa a petu hming puanchhuah chu an pumpelh a. (Matthaia 6:3, 4; 2 Korinth 9:7; 1 Petera 3:8) Chu chu Pathian thu nêna a inmil loh bâkah, chutiang thiltihte chuan mi dang tel vete chu awm nuam lovin a siam thei a ni.

 Awm lo. Zu no dawm kânga duhsakna inhlan hi sakhaw dik lo tih dân aṭanga lo chhuak a nih avângin Jehova Thuhretute’n an ti ve lo. c Nupate an duhsakna chu kawng dangin an lantîr zâwk a ni.

 Ni lo vang. Hmun ṭhenkhatah chuan innei tharte chu mite’n buhfai, lehkha mawi cheh nawi, a nih loh leh chutiang chî thil dang chu an theh ṭhîn a. Hei hian nupate chu vânneihna, hlimna, leh dam reina a thlen an ring a ni. Mahse, Jehova Thuhretute chuan puithuna thiltih nêna inzawmna neite chu an pumpelh a. Chutah chuan Bible thu bul nêna inkalh vânneihna dîla ṭawngṭai pawh a tel.—Isaia 65:11.

 Kingdom Hall-a inneihnaah chuan ei leh in a tel lo vang. Nupa ṭhenkhat chuan hmun dangah ei leh in buatsaihin a lawmna neih an thlang a. (Thuhriltu 9:7) Zu chhawp an tum a nih chuan, a âwm tâwkin an chhawp ang a, zu in tûra kum tling chinte tân chauh an ruahman ang.—Luka 21:34; Rom 13:1, 13.

 Nupate’n hmun dangah lawmna hun an siam a nih chuan rimawi ngaihthlâk leh lâmna hun chu an telh thei a. (Thuhriltu 3:4) Rimawi thlan chungchângah mi mal duh dân leh hnam dân danglam mah se, ngaihthlâk nuam a ni tûr a ni. Kingdom Hall-a inneihnaah chuan Bible ṭanchhan thupui nei rimawi a tel tlângpui ṭhîn.

 Inneih cham lawm chungchângah Bible thu bulin a pawmpuina emaw, khapna emaw a awm loh avângin Thuhretu nupate chuan an inneih cham an lawm dâwn leh dâwn lohvah duh an thlang ang. Lawm an thlang a nih chuan an nupa chauhvin emaw, an ṭhiante leh chhûngte nên chauh emaw an lâwm ang.