Jehova Thuhretute chuan Pathian lâwm zâwng leh keimahni pawhin kan hlâwkpui theih tûr thu tlûkna siam tûrin Bible thu bulte leh thupêkte chuan min ṭanpui theih an ring a. (Isaia 48:17, 18) Hêng thu bulte leh thupêkte hi kan siam chawp a ni lo va, mahse kan nunpui a ni. Hêng zînga ṭhenkhat leh inngaihzâwnna a inkûngkaih dân lo ngaihtuah ta ila. a

•   Inneihna chu inzawmna nghet a ni a. (Matthaia 19:6) Inngaihzâwnna hi inneihna rahbi anga kan thlîr avângin Jehova Thuhretute chuan kan ngai thutak hle.

•   Inngaihzâwnna chu innei tûra puitling tâwk tawhte tân chauh a ni. Chûng mite chu ‘an lêng rei,’ a nih loh leh mipat hmeichhiatnaa an châkna sosân hun a pel tawh a ni.—1 Korinth 7:36.

•   Inngaizâwngte chu innei tûrin an zalên tûr a ni. Uirêna avâng chauhva inṭhen theih a nih avângin dân anga inṭhen mi ṭhenkhat chu Pathianin nupui pasal nei leh tûra zalênna nei angin a thlîr ve lo.—Matthaia 19:9.

•   Nupui pasal neih duh Kristiante chu an rinpuite chauh thlang tûra thu pêk an ni. (1 Korinth 7:39) Jehova Thuhretute chuan he thupêk hi tuemaw kan rinna min zahsaktu a sawina ni lovin, Thuhretu baptisma chang tawh kan thu rin leh thiltihte min ṭâwmpuitu a sawinaah kan ngai. (2 Korinth 6:14) Pathian chuan amah betute chu an rinpuite chauh nei tûrin kaihhruaina a pe ṭhîn a. (Genesis 24:3; Malakia 2:11) He thupêk hi tûn laia mi thiamte pawhin a la hman tlâk hle tih an hmuh chhuak a ni. b

•   Naupangte chuan an nu leh pate thu an zâwm tûr a ni a. (Thufingte 1:8; Kolossa 3:20) He thupêkah hian naupang an nu leh pate thlazâr hnuaia awmte tân inngaihzâwnna chungchânga an nu leh pate thu tlûkna siam zawm pawh a tel a ni. Chûngah chuan an fate’n ngaihzâwng an neih ṭan theih kum leh eng thilte nge tih an phalsak tihte a tel thei ang.

•   Bible kaihhruaina hnuaiah Thuhretute chuan ngaihzâwng an neih dâwn leh dâwn loh leh, an ngaihzâwng tûrte chu mi malin duh an thlang a ni. Hei hi thu bul pakhat: “Mi tinin mahni phur an phur ṭheuh dâwn si a,” tih nên hian a inrem hle. (Galatia 6:5,) Chuti chung pawhin, mi tam tak chuan inngaihzâwnna chungchângah Thuhretu puitling, thinlung taka an tâna ṭha ber tûr duhtute thurâwn chu fing takin an la zawng tho a ni.—Thufingte 1:5.

•   Inngaihzâwnna nêna inkûngkaiha thil tih ṭhin tlânglâwn takte hi sual pawi takte a ni a. Entîr nân, Bible chuan nungchang bawlhhlawhna pumpelh tûrin thu min pe a. Chutah chuan mipat hmeichhiatna hman chauh ni lovin, thiltih bawlhhlawh dang mi dangte serh khalhsak te, kaa châkna inhrîkthlâksak emaw, mawngkuaa inpâwlna emaw ang chite hi a tel a ni. (1 Korinth 6:9-11) Inneih hmaa châkna chawk tho thei thiltihte chu mipat hmeichhiat hmanna ni chiah lo mah se, Pathian huatzâwng “bawlhhlawhna” a ni. (Galatia 5:19-21) Chu bâkah, “ṭawng zahmawh” telna ṭawngkam bawlhhlawha inbiaknate chu Bible-in a dem bawk a ni.—Kolossa 3:8.

•   Thinlung, a nih loh leh mihring chhûngril hi bumhmangber a ni a. (Jeremia 17:9) Chu chuan mi chu thil dik lo a ni tih a hriat reng pawh a tihtîr thei a ni. Inngaizâwngte chuan an thinlung hruaina suala an tlûk luh loh nân thlêmna tawh theihna dinhmuna a fâla awm chu an pumpelh tûr a ni a. Mi tam tak hmuh theiha awmin emaw, an ṭhian rin tlâk tuemaw an bul hnaia awmtîrin emaw thil ṭha lote thleng lo tûrin an invêng lâwk thei a ni. (Thufingte 28:26) Kawppui zawng mêk Kristiante chuan a bîk takin an mi hriat chian lohte nêna inlaichînna neih chhoh theihna online-a ngaihzâwng neihna site-te hlauhawmna chu an hre tûr a ni.—Sâm 26:4.