•  Engtin nge Jehova Thuhretute’n kût nî an lawm dâwn leh dâwn lovah thu tlûkna an siam?

•  Kût nî ṭhenkhat lâwm lo Jehova Thuhretute chuan an chhûngte an la hmangaih reng em?

•  Jehova Thuretute’n kût nî ṭhenkhat lâwm lo tûrin mi dangte an hrilh em?

 Jehova Thuhretute chuan kût nî engemaw bîk an lawm dâwn leh dâwn lovah thu tlûkna an siam hmain Bible an râwn a. Kût nî ṭhenkhat chu Bible thu bulte nên a inkalh chiang hle a. Chutiang thilah chuan Jehova Thuhretute an tel lo. Kût nî dangte chungchângah erawh chuan Thuhretu tinte’n “Pathian leh mihring hmaa . . . chhia leh ṭha hriatna thiang” vawng reng thei tûrin mahniin thu tlûkna an siam a ni.—Tirhkohte 24:16, C.L. Re-edited.

 A hnuaiah hian Jehova Thuhretute’n kût nî an lawm dâwn leh dâwn loh chungchânga thu tlûkna an siam hmaa an inzawh ṭhin zawhna ṭhenkhat târ lan a ni. a

•   Kût nî chuan Bible nêna inkalh zirtîrna a ṭanchhan em?

   Bible thu bul: “‘An zîng ata lo chhuak ula, a hrangin awm rawh u, thil bawlhhlawh rêng rêng pawh dek suh u,’ Lalpan a ti.”—2 Korinth 6:15-17.

   Jehova Thuhretute chuan Bible sawi nêna inkalh thlarau lama thianghlim lo zirtîrnate laka inlahrang pumhlûm tûrin, a hnuaia târ lante nêna inzawmna nei kût nîte chu an hmang lo a ni.

   Pathian dangte thurin, a nih loh leh biakna aṭanga lo chhuak kût nîte. Isua chuan: “Lalpa i Pathian chibai bûk la, ama rawng chauh bâwl rawh,” tiin a sawi a. (Matthaia 4:10) Chu thupêk chu zâwmin, Jehova Thuhretute chuan Krismas te, Easter te, leh May Day te an lâwm lo, a chhan chu hêng kût nîte hi Jehova ni lovin, pathian dangte biakna aṭanga lo chhuak a nih vâng a ni. Chu bâkah, a hnuaia târ lan kût nîte hi an lâwm lo bawk.

  •  Kwanzaa. Kwanzaa tih hi “Swahili ṭawnga matunda ya kwanza tih thu mal aṭanga lo chhuak a ni a, a awmzia chu ‘rah hmasa ber’ tihna a ni a, [hei hian] African chanchina thlai thar hmasa ber lawmna aṭanga lo chhuak a ni tih a târ lang a ni.” (Encyclopedia of Black Studies) Mi ṭhenkhatin Kwanzaa chu sakhuana kût nî angin ngai lo mah se, Encyclopedia of African Religion chuan African mite kût pakhat nên a khaikhin a, chu kûtah chuan thlai thar hmasa berte chu “pathiante leh thlahtute hnêna lâwmthu sawi nâna hlan ṭhin a ni,” tiin a sawi a. Heti hian a sawi belh bawk: “America rama chêng Africa mite kût nî Kwanzaa hmêlhriattîrtu pipute hnênah nunna an pêk avânga an chunga an lâwmzia lantîr nâna chutianga hlân chu an ni,” tiin.

  •  Favâng Kût (Mid-Autumn Festival). Hei hi “thla pathian nu chawimawi nâna hman kût a ni.” (Holidays, Festivals, and Celebrations of the World Dictionary) Chutah chuan “chhûngkaw nu berte’n thla pathiante chibai an bûkna” serh leh sâng thiltihte a tel a ni.—Religions of the World—A Comprehensive Encyclopedia of Beliefs and Practices.

  •  Nauruz (Nowruz). “Hei hi Zoroastrian sakhaw biakna aṭanga lo chhuak kût pakhat a ni a, hmân lai Zoroastrian calendar-ah chuan ni thianghlim ber a ni bawk. . . . Zoroastrian hnam dânin a sawi dân chuan, Rapithwin an tih Spirit of Noon chu Spirit of Winter-in khaw vawh laiin lei hnuai khawvêlah hnawt bovin, Nowruz chhûn lai takah lo lawm lehna kût an hmang tih a sawi.”—United Nations Educational, Scientific and Cultural Organization.

  •  Shab-e Yalda. Kum khat chhûnga ni tawi ber huna hman he kût hi êngte pathian “Mithra biakna nên a inkûngkaih tlat a ni,” tiin Sufism in the Secret History of Persia tih lehkhabu chuan a sawi. He kût nî hian Rom leh Grik mite ni pathiante biakna nên pawh inkûngkaihna a nei tih a târ lang bawk. b

  •  Lâwmthu Sawi Kût (Thanksgiving). Kwanzaa kût ang bawkin, he kût hi pathian chi hrang hrang chawimawitu hmân laia thlai thar lawmna aṭanga lo chhuak a ni a. Hunte a liam zêl chuan, “chûng an thil chîn dânte chu Kristian sakhuate’n an tichho ve ta a ni.”—A Great and Godly Adventure—The Pilgrims and the Myth of the First Thanksgiving.

   Puithuna, a nih loh leh vânneihna rinnaa innghat kût nîte. Bible chuan “Vânneihna Siamtua tân dawhkân buatsaiha” te chu ‘LALPA kalsantute’ tiin a sawi a. (Isaia 65:11) Chuvângin, Jehova Thuhretute chuan hêng a hnuaia târ lan kût nîte hi an hmang ve lo:

  •  Ivan Kupala. “Mite chuan [Ivan Kupala] nî hian leilunga thil awmte chuan dawi thiltihtheihna an tichhuak a, chûngte chu huaisenna leh vânneihna hmanga engemaw chen dawn theih niin an ring a ni,” tiin The A to Z of Belarus, tih lehkhabu chuan a sawi. Dik tak chuan, he nî hi nipui laia an hman ṭhin, milem biakna kût aṭanga lo chhuak a ni a. Mahse, Encyclopedia of Contemporary Russian Culture chuan milem pathian biate chuan “Kristian kohhrana an rawn luh hnuah an milem pathian kût nîte chu Kristiante kût nî [Baptistu Johana “mi thianghlim nî”] nên an chawh pawlh ta a ni,” tiin a sawi.

  •  Lunar New Year (China Kum Thar, a nih loh leh Korea Kum Thar). “Kum khat chhûnga hun dang zawng aiin he kum thar chhûng hian chhûng te, ṭhian ṭha te, leh chhûngkhat lainate chunga vânneihna thleng tûra thil tih chu an ngai pawimawh ber a, pathiante leh thlaraute chungah zahna an lantîr a, kum tluana vânneihna dawng tûrin duhsakna an hlân ṭhîn.” (Mooncakes and Hungry Ghosts—Festivals of China) Chutiang bawkin, Korea Kum Thar-ah pawh “thlahtute biakna te, thlarau sual hnawh bona thiltih te, Kum Thar atâna vânneihna inhlan te, leh Kum Tharin a thlen tûr hriat nâna dawithiam râwn te a tel a ni.”—Encyclopedia of New Year’s Holidays Worldwide.

   Thlarau thi thei lo thurin ṭanchhana neih kût nîte. Bible chuan mihring nunna (thlarau) chu a thi thei tih chiang takin a târ lang a. (Ezekiela 18:4) Chuvângin, Jehova Thuhretute chuan thlarau thi thei lo thurin chawilârtu hêng a hnuaia târ lan kût nîte hi an lâwm lo a ni:

  •  Thlaraute Nî (Mitthite Nî). New Catholic Encyclopedia sawi dân chuan, hemi nî hi “mi rinawm thi tate hriatrengna,” a ni a. “Middle Ages hun chhûng zawng khân thlarau chu chawlh lâwknaah a awm a, an dam laia anmahni tiduhdahtute hmaah ramhuai, dawithiam pitar, leh uṭawk ang tein hemi nî hian an inlâr ṭhîn tih rin dân chu a hluar hle.”

  •  Qingming Kut (Ch’ing Ming) leh Thlarau Rilṭâmte Tâna Kût (Hungry Ghost Festival). Hêng kût ni pahnihte hi thlahtute chawimawi nâna hman a ni a. Celebrating Life Customs Around the World—From Baby Showers to Funerals, lehkhabu sawi dân chuan Ch’ing Ming hman chhûng hian “ei tûr, in tûr, leh pawisa note te an hâl ṭhîn a, chu chu mitthite tui hâl lo, rilṭâm lo leh sum leh pai hman tûr tlachham lova an awm nân a ni.” Chu lehkhabu chuan: “Thlarau Riltâmte Kût an hman thla chhûng hian, a bîk takin thla bial zânah mi nung damte leh mitthite’n inpawhna nasa lehzual an neiah an ngai a. Chuvângin, mitthite tihlungawi leh thlahtute chawimawi chu thil pawimawh tak a ni,” tiin a sawi zawm a ni.

  •  Chuseok. He kûtah hian “mitthi tate thlarau hnêna ei tûr leh uain hlan” a tel tiin The Korean Tradition of Religion, Society, and Ethics, tih lehkhabu chuan a sawi. Chutianga thil hlanna chuan “taksa chu thi mah se, thlarau chu a nung zawm zêl tih an rinzia,” a târ lang a ni.

   Dawithiamna nêna inkûngkaih kût nîte. Bible chuan: “Aien chîng te, ṭhumvâwr chîng te emaw, mitlâkdawi hmang emaw te, dawithiam te, dawi ât te, ramhuai zâwl rawih te, dawithiam te, mitthi biak chîng mi te in zîngah an awm tûr a ni lo. Hêng thil ti mi apiangte hi LALPA ngaihin mi tenawm an ni si a,” tiin a sawi a ni. (Deuteronomy 18:10-12) Jehova Thuhretute chuan—arsi hmanga aienna pawh tiamin—dawithiamna eng pawh laka an inthiar fihlîm theih nân Halloween emaw, a hnuaia târ lan kût nî emaw hi an lâwm lo a ni:

  •  Sinhala leh Tamil Kum Thar. “He kût hmannaa tel hnam dânte pawh tiamin, thiltih ṭhenkhatte chu hun engemaw bîka tih a nih chuan vânneihna a thlen theiah arsi hmanga aientute chuan an ngai a ni.”—Encyclopedia of Sri Lanka.

  •  Songkran. Asian mite hman ṭhin he kût ni hming hi “Sanskrit thu mal aṭanga lo chhuak a ni a . . . a awmzia chu ‘chesawn,’ a nih loh leh ‘inthlâkna,’ tih a ni a; [he kût] hian Nî khi Aries arsi hlâwma a chêt vêl dân a chhinchhiah a ni.”—Food, Feasts, and Faith—An Encyclopedia of Food Culture in World Religions.

   Isua inthawina hmanga tihtâwp, Mosia Dân hnuaia biakna nêna inkûngkaih kût nîte. Bible chuan: “Krista chu . . . Dân tibângtu a ni,” tiin a sawi a. (Rom 10:4) Kristiante chuan hmân lai Israel mite hnêna pêk Mosia Dâna thu bulte chu an la hlâwkpui reng a ni. Mahse, chuta târ lan kût nîte chu an hmang tawh lo, a bîk takin, Kristiante’n lo kal tawha an rin Messia hnên lama hruaitu kûtte chu an hmang lo. Bible chuan: “Chûng chu thil lo thleng tûrte hlim a ni, a tak erawh chu Krista ta a ni,” tiin a sawi si a. (Kolossa 2:17) Chûng kût ni hman a nih chhan a thlen famkim tawh avâng leh Bible zirtîrna nêna inmil lo chîn dânte a tel ṭhin avângin, Jehova Thuhretute chuan a hnuaia târ lan kût nîte chu an hmang lo a ni:

  •  Hanukkah. He kût hi Jerusalema Judate biak in an hlan lehna atâna hman a ni a. Mahse, Bible chuan Isua chu Puithiam Lalber ‘biak bûk, kuta sak loh, (chu chu hêng thil siam zînga mi a ni lo tihna a ni,) ropui leh famkim zâwk,’ a ni tih a sawi. (Hebrai 9:11) Kristiante tân chu thlarau lam biak in chuan Jerusalema awm biak in chu a thlâk tawh a ni.

  •  Rosh Hashanah. Hei hi Judate kum chhiara ni hmasa ber a ni a. Hmân lai chuan, he kût hi a bîk taka Pathian hnêna thil hlan nâna hman a ni. (Numbers 29:1-6) Mahse, Isua Krista chuan Messia a nih angin ‘inthawina leh thilhlan an hlan ṭhin chu titâwpin,’ Pathian hmaah a tibo tawh a ni.—Daniela 9:26, 27.

•   He kût nî hian rinpawlhna a chawi lâr em?

   Bible thu bul: “Ring lo leh ringtu chuan eng nge chan dun an neih? Milemte leh Pathian biak in pawhin eng nge inremna an neih?”—2 Korinth 6:15-17.

   Jehova Thuhretute chuan an vêngte nên inrem taka awm an tum reng a, miin a thurin mila a tih duh apiang ti tûra dikna a neih chu an zahsak rualin, rinpawlhna chawilârtu a hnuaia kût nîte hi an pumpelh a ni.

   Sakhaw thurin inang lote nêna inlungrual taka Pathian beho tûra fuihtu sakhaw hruaitu, a nih loh leh thiltihte nêna inkûngkaih kût nîte. Pathianin hmân laia sakhaw vawn nei sate awmna ram thara a mite a hruai khân heti hian a hrilh a ni: “An hnênah thu i thlung tûr a ni lo va, an pathiante hnênah pawh i thlung tûr a ni hek lo. . . . An pathiante rawng i bâwl vaih zawngin i tân thang a ni ngei dâwn a ni,” tiin. (Exodus 23:32, 33) Chuvângin, Jehova Thuhretute chu a hnuaia târ lan kût nîte lawmnaah hian an tel ve lo.

  •  Loy Krathong. Thai mite hman ṭhin he kût chhûng hian, “mite chuan hnahte khâwrin, chutah chuan mombati, a nih loh leh hâlrimtui te dahin chu chu tui an lentîr ṭhîn a. Chûng hnah khâwr tui an lentîrte chuan vânduaina a la bo an ti a. Dik tak chuan, chu kût chu Buddha-a ke hniak thianghlim hriatrengna atâna hman a ni.”—Encyclopedia of Buddhism.

  •  National Repentance Day. Papua New Guinean chanchinbu The National-a sawrkâr thuneitu pakhat chuan he nî hmangtute hian “Kristian thurin bulpuite chu an pawm a ni,” tiin a sawi. Ani chuan chumi nî hmanna chuan “ram pumah Kristian thu bulte chawilârnaah a ṭanpui ang,” tiin a sawi.

  •  Vesak. “He nî hi Buddhist mite lawm ṭhin ni zînga a thianghlim ber a ni a, Buddha pian, tihêna a awm, leh a thih, a nih loh leh piannawn lehna lawmna a ni.”—Holidays, Festivals, and Celebrations of the World Dictionary.

   Bible zirtîrna ni lo, sakhaw thurochhiaha innghat kût nîte. Isua chuan sakhaw hruaitute chu: “In thurochhiah avângin Pathian thu chu in bawh bo ta a nih hi,” tiin a hrilh a. Ani chuan “an zirtîrnaah mihring thupêk” an zirtîr avângin an biakna chu a thlâwn mai a nih thu pawh a sawi bawk. (Mathaia 15:6, 9) Jehova Thuhretute chuan chu vaukhânna chu an hriat reng avângin, sakhuana nêna inkûngkaih thil lawmna tam takah an tel ve lo.

  •  Epiphany (Lal Pathumte Nî, Timkat, a nih loh leh Los Reyes Magos). Hei hi khawchhak mifingte’n Isua an va tlawh cham, a nih loh leh Isua baptisma chan hriatreng nâna lawm a ni a. He kût hi, “Milem biakna aṭanga Kristiannaa an sengluh tâk tui luang, lui, leh luitê te pathiante chawimawi nâna nipui laia hman ṭhin a ni.” (The Christmas Encyclopedia) Chu kût nêna inkûngkaihna nei Timkat kût pawh hi “thurochhiah aṭanga lo chhuak a ni.”—Encyclopedia of Society and Culture in the Ancient World.

  •  Nula Thianghlim Mari Vâna Lâk Chhohva A Awm Lawmna Kût. He kût hi Isua nu chu a hring a hrâna vâna lâk chhoh a ni tih rinna avânga hman a ni a. Religion and Society—Encyclopedia of Fundamentalism, tih lehkhabu chuan “chu rinna chu Kristian hmasate’n an hre lo va, Bible-ah pawh târ lan a ni hek lo,” tiin a sawi.

  •  Sual Tel Lova Nau Pai Lawmna Kût. “Bible-ah hian sual tel miah lovin [Mari’n] nau a pai tih târ lanna chiang tak a awm lo . . . [Hei] hi Church zîrtîrna a ni tih a chiang hle.”—New Catholic Encyclopedia.

  •  Chaw Nghei Hun Serh. New Catholic Encyclopedia, chuan inchhîrna lantîr nâna he chaw nghei hun serh an hman ṭan hun hi Bible ziak zawh a nih aṭanga kum 200 hnu, “kum zabi palinaah” a ni tih a sawi a. Chu hun serh an hman ni hmasa ber chungchângah, encyclopedia chuan: “Vut Hnawih Nilainiah sakhaw ngaihsaktute chuan vaivut an inhnawih a, chu tih dân chu kum 1091-a, Benevento khawpuia neih sakhaw kût nî aṭanga inṭan a ni,” tiin a sawi.

  •  Meskel (a nih loh leh, Maskal). Encyclopedia of Society and Culture in the Medieval World chuan he Ethiopian mite kût hi “Mei chhêma a sîr lam kuala, Kraws Dik Tak (Krista tihhlumna kraws) zawn hmuhna” hriatrengna atâna hman ṭhin a ni tiin a sawi. Mahse, Jehova Thuhretute chuan Pathian an biaknaah Kraws an hmang lo.

•   Kût chuan mi pakhat, pâwl pakhat, a nih loh leh ram chhinchhiahna a chawimawi em?

   Bible thu bul: “LALPA chuan heti hian a ti: mihring rinchhana, mihring bân chakna ringa, LALPA hawisanna thinlung neitu chu ânchhe dawngin awm rawh se.”—Jeremia 17:5.

   Jehova Thuhretute chuan an mihringpuite chungah lâwmna lantîrin, an tân ṭawngṭaisak hial mah se, hêng a hnuaia târ lan kût nîte hi an lâwm lo:

   Rorêltu, a nih loh leh mi hmingthang tuemaw chawimawina kût. Bible chuan, “An hnâr chauhva thaw awm mihring rin hi bânsan tawh rawh u: eng kawngah nge rin tlâk an nih tehlul ni?” tiin min hrilh a. (Isaia 2:22) Chuvângin, Jehova Thuhretute chuan ram hruaitu lû ber piancham ang chî chu an lâwm lo.

   Hnam puanzâr lawmna. Jehova Thuhretute chuan Puanzâr Lawm Nî chu an hmang ve lo. Engvângin nge? Bible-in: “Milem lakah inthiarfihlîm rawh u,” tia a sawi vâng a ni. (1 Johana 5:21) Tûn laia mi ṭhenkhat chuan hnam puanzâr chu milem—chibai an bûk thil—angin an thlîr lo va; mahse, chanchin ziaktu Carlton J. H. Hayes-a chuan: “Hnam tâna rinawmna chhinchhiahna sâng ber leh, chibai bûkna langsâr ber chu hnam puanzâr hi a ni,” tiin a ziak a ni.

   Mi thianghlim chawimawina kût nîte. Pathian ṭihtu pakhatin tirhkoh Petera kûna chibai a bûk khân eng thil nge thleng? Bible chuan: “Petera chuan ani chu a kai tho va, ‘Ding rawh, kei pawh mihring ka ni alâwm,’ a ti a,” tiin a sawi. (Tirhkohte 10:25, 26) Petera leh tirhkoh dangte’n chutiang chawimawina an pawm loh avângin, Jehova Thuhretute chuan mi thianghlim anga ngaihte chawimawina ang chî, a hnuaia târ lan kût nîte hi an lâwm lo:

  •  Mi Thianghlimte Nî. “Mi thianghlim zawng zawng chawimawina kût nî a ni a . . . He kût nî lo chhuahna hi hriat chian a ni lo.”—New Catholic Encyclopedia.

  •  Guadalupe Nula Thianghlim Lawmna Nî. Hei hi “Mexico ram enkawltu mi thianghlim” chawimawina nî a ni a, ani chu mi ṭhenkhatin Isua nu Mari a nih an ring a. Chu hmeichhia chu kum 1531 khân mi reithei pakhat hmaah mak danglam takin a rawn inlâr nia sawi a ni.—The Greenwood Encyclopedia of Latino Literature.

  •  Hming Sak Nî. Celebrating Life Customs Around the World—From Baby Showers to Funerals tih lehkhabu chuan: “Mi thianghlim tuemaw hming chawia nausên hming sak nî a ni a, chu chu nausên a nih laia baptisma a chan nî, a nih loh leh kohhrana a rinna nemngheh a nih laia lawm a ni,” tiin a sawi. Nausên hming sak nî chuan “sakhaw lam thiltihte urhsûn taka neih a ni,” tiin a sawi bawk.

   Politics, a nih loh leh khawtlâng hmasâwnna thiltihte lawmna. Bible chuan: “Mihring rin ai chuan LALPAa rinna nghah hi a ṭha zâwk,” tiin a sawi a. (Sâm 118:8, 9) Khawvêl buainate chingfel tûra Pathian aia mihringte rinchhanna thiltihte an pumpelh duh avângin, Jehova Thuhretute chuan politics, a nih loh leh khawtlâng thiltihte thlâwptu Ṭhalaite Nî , a nih loh leh Hmeichhiate Nî-ahte an tel lo a ni. Chutiang bawkin, Zalênna Nî, a nih loh leh chutiang chî lawmnaah pawh an tel hek lo. Chu aiin, anni chuan chi inthliarna leh rorêl dik lohnate chingfeltu tûr Pathian Lalram chu an beisei zâwk a ni.—Rom 2:11; 8:21.

•   Chu nî chuan ram, a nih loh leh hnam pakhat chu a dang aiin a chawi sâng em?

   Bible thu bul: “Pathianin mi duhsak bîk a nei lo tih dik takin ka hria e; nimahsela, hnam tin zîngah tu pawh amah ṭiha, fel taka ti apiang a lâwm zâwng mi an ni ṭhîn.”—Tirhkohte 10:34, 35.

   Jehova Thuhretu tam tak chuan an awmna ramte chu ngaina hle mah se, mahni ram leh hnam chawi sângtu hêng a hnuaia kût nîte lawmnaah hian an tel lo a ni.

   Sipaite chawimawina nî. Isua chuan indona thlâwp aiin a hnungzuitute hnênah: “In hmêlmate chu hmangaih ula, a tiduhdahtu che u chu ṭawngṭaisak rawh u,” tiin a hrilh a ni. (Matthaia 5:44) Chuvângin, Jehova Thuhretute chuan sipaite chawimawina nî an hman loh bâkah, hêng a hnuaia kût nîte pawh hi an hmang hek lo:

  •  Anzac Nî. “Anzac tih lam pum chu Australia leh New Zealand Army Corps,” tihna a ni a, tichuan, “Anzac Nî hi indonaa thi ta sipaite hriatrengna ni atâna hman a lo ni ta a ni.”—Historical Dictionary of Australia.

  •  Sipai Hrâng Hluite Nî (Hriatrengna Nî, a nih loh leh Hriatrengna Chawlhni). Hêng nîte hi “sipaia lo ṭang tawh mi hlunte leh ram leh ram indonaa thi tate,” chawimawina a ni.—Encyclopædia Britannica.

   Ram tâna ni pawimawh, a nih loh leh zalênna nî lawmna. Isua chuan a hnungzuitute chungchângah: “Anni chu khawvêla mi an ni lo, kei khawvêla mi ka ni lo ang bawk hian,” tiin a sawi a. (Johana 17:16) Jehova Thuhretute chuan ram chanchin zir chu nuam ti hle mah se, hêng a hnuaia kût nîte lawmnaah hian an tel ve lo:

  •  Australia Day. Worldmark Encyclopedia of Cultures and Daily Life, tih lehkhabu sawi dân chuan “kum 1788, Sâp sipaite’n an hnam puanzâr pawt pharh a, Australia ram chu a thununna hnuaiah a dah tih an puanna nî,” hriatrengna atân he nî hi hman a ni.

  •  Guy Fawkes Day. “He nî hi Guy Fawkes-a leh a ṭanrualpui Catholic mite’n kum 1605-a King James I-na thah tumna leh England Parliament-a bomb tipuak tûra an phiarrûkna hlawhchham ta hriatreng nâna hman a ni.”—A Dictionary of English Folklore.

  •  Zalênna Nî. Ram tam takah chuan he nî hi “ram dang awpbehna hnuaia an ram a zalenna hriatrengna nî atâna mite lawm ṭhin a ni.”—Merriam-Webster’s Unabridged Dictionary.

•   Kût nî chu thunun loh leh bawlhhlawh taka hman anga hriat a ni em?

   Bible thu bul: “Jentailte duhzâwng tih nân leh hurnaah te, taksa châknaah te, uain hehnaah te, zu hmun hlimnaah te, zu inhonaah te, milem biakna tenawm takah te awm nân tûn hma kha a tâwk tawh ang.”—1 Petera 4:3.

   Chu thu bul nêna inmilin, Jehova Thuhretute chuan zu ruihna leh insûmna tel lo intihhlimna kût ni hman chu an pumpelh a. Jehova Thuhretute chuan ṭhiante nêna inkawmho chu nuam an ti hle a; mahse, chutiang huna zu an in dâwn a nih chuan a âwm tâwk chauhva in an thlang a ni. Anni chuan he Bible fuihna hi theih tâwp chhuahin an zâwm a ni: “In ei pawhin, in in pawhin, in tih apiangah pawh, Pathian ropuina tûr hlîrin ti rawh u,” tih hi.—1 Korinth 10:31.

   Chuvângin, Jehova Thuhretute chu hlimhlawp bâwlna kût nîte, a nih loh leh Bible-in a dem, nungchang mawi lo chawilârna ang chî kût nîahte chuan an tel lo a ni. Chûng zîngah chuan Judate kût nî Purim pawh a tel a. Purim hi B.C.E. kum zabi panganaa Judate chhuah zalênna nî hriatreng nâna hman ni mah se, tûnah chuan “Judate Mardi Gras, a nih loh leh Hlimhlawp Bâwlna nî anga hriat a ni tawh,” tiin Essential Judaism lehkhabu chuan a sawi. Chu huna tel tam takte chu, “danglam takin (mipate chu hmeichhia angin) an inthuam a, thunun lovin an khawsa a, nasa taka zûte inin, an bengchheng hle,” tiin a sawi bawk.

 Hmangaih reng e. Bible chuan mite hmangaih tûr leh chhûngkaw zînga mite sakhaw vawn chu eng pawh ni se, anni chu hmangaih tûrin min zirtîr a. (1 Petera 3:1, 2, 7) Ni e, Jehova Thuhretute zînga pakhatin kût ni ṭhenkhata a tel duh tawh loh hian, a chhûngkhat lainate chuan hrehawm an tiin, an thinurin, phatsan niin an inhre hial thei a. Chuvângin, Jehova Thuhretu tam tak chuan an chhûngte an hmangaih tih hrilh tûr te, an thu tlûkna siam chhan fing thiam taka hrilh tûr te, leh hun danga anmahni va tlawh ṭhîn tûr tein hma an la a ni.

 Hrilh lo. Anni chuan mi tin hian mahniin thu tlûkna an siam tûr a ni tih an ring tlat a. (Josua 24:15) Jehova Thuhretute chuan mite sakhaw vawn chu eng pawh ni se, ‘mi zawng zawng an chawimawi’ a ni.—1 Petera 2:17.