Jehova Thuhretute chuan an mi mal rawngbâwlna pawh tiamin, Kristiante anga an nun kawng engkimah zirtîrna an dawng reng a. Chu rawngbâwlna chu Isua’n a hnungzuitute hnêna ti tûra thu a pêk—Pathian Ram chanchin ṭha hrilh leh zirtîr hi a ni. (Matthaia 24:14; 28:19, 20) Chu zirtîrna chu chawlhkâr tina neih kan inkhâwmahte leh kum tina neih kan inkhâwmpuiahte kan dawng a. Kohhrana, a nih loh leh inawpna pâwla mawhphurhna nei Jehova Thuhretute chuan a bîk taka buatsaih Bible school-ahte zirtîrna tam lehzual an dawng a ni.

He thuziakah hian

•  Jehova Thuhretute’n eng zirtîrna nge an dawn?

•  Jehova Thuhretute tâna Bible school-te

•  Thuhretute dawn zirtîrna chu enga innghat nge a nih?

•  Jehova Thuhretute’n zirtîrna dawng tûrin sum an sên a ngai em?

•  Jehova Thuhretute’n zirtîrna an dawnte chu engtin nge an hlâwkpui?

 Kohhran inkhâwmnate. Chawlhkâr tinin, Kingdom Hall tia koh kan biak inahte chuan vawi hnih inkhâwm kan nei ṭhîn a. Inkhâwm pakhat chu chawlhkâr chhûnga neih a ni a, a dang leh chu chawlhkâr tâwpa neih a ni. Tute pawh an rawn inkhâwm thei a, thawhlâwmte khawn a ni ngai lo.

•   Chawlhkâr chhûng inkhâwm. Lehkha chhiarna te, inbiakna te, vântlâng hmaa thusawina te leh, thuhrilh leh zirtîrnate kawnga hma kan sâwn theih dân kan zir a. Zirtîrna chu thusawi te, sawihona te, lemchan te leh video-te hmanga neih a ni. Chu zirtîrna chuan mi dangte hnêna Bible thuchah hrilhna leh, ngaihventute Bible zirpuina kawnga ti ṭha lehzual tûrin min ṭanpui. Inkhâwma tel zawng zawngte chuan he zirtîrna hi an hlâwkpui a. A pawimawh ber chu, kan inkhâwmte chuan Pathian chunga kan rinna a tihngheh bâkah, amah leh kan rinpui unaute kan hmangaihna pawh a ti nghet bawk.

•   Chawlhkâr tâwp inkhâwm. He ṭhen hnih nei inkhâwm hi a bîk taka vântlâng tâna buatsaih Bible ṭanchhan thusawi hmanga ṭan a ni a. Inkhâwm pahnihna chu Vênnainsâng zir tûr edition-a thuziak pakhat hmanga zawhna leh chhânna neia zirhona a ni. a Chûng thuziakte chuan kan rawngbâwlna leh kan nî tin nuna min ṭanpuitu Bible thu bulte chu a hrilhfiah a ni.

 Bial inkhâwmpuite leh regional inkhâwmpuite. Kum tin hian kohhran tam tak aṭanga kal khâwmte telna inkhâwmpui pathum kan nei ṭhîn a. Chûng hun hlimawm takahte chuan Bible ṭanchhan thupui pakhat min ngaihventîr ṭhin a, thusawi te, lemchan te, biangbiakna te leh, video-te a tel a ni. Kohhran inkhâwmte ang bawkin, chûng inkhâwmpuite chuan Bible kan hriatna a tihpun bâkah, chanchin ṭha hriltu ṭha lehzual ni tûrin min ṭanpui a. Kohhran inkhâwmte ang thovin, tute pawh an rawn tel thei a, thawhlâwmte khawn a ni ngai lo bawk.

 Jehova Thuhretute zînga ṭhenkhat chu zirtîrna an dawn belh nân, Bible school hrang hrangtea kal tûra sâwm an ni a. Chûng chu eng school-te nge a nih? Eng nge a thiltum chu ni a, engtia rei nge a nih hlawm? Tute nge kal thei ang?

Pioneer Rawngbâwlna School

•   A thiltum: Thuhrilh leh zirtîr hna thawktu ṭha lehzual ni tûra, pioneer b tia koh, hunbi kima rawngbâwltute zirtîr hi a ni a. Chutah chuan classroom-a sawihona te, lemchan te, thusawi te leh, tihchhinnate a tel a ni.

•   A rei zâwng: Ni ruk.

•   A tel theite: Pioneer kum khat thawk tling tawhte chu tel tûra sâwm an ni a. Kum nga kal ta chhûnga tel tawh lo, rei tak pioneer lo thawk tawhte pawh tel leh tûra sâwm an ni thei.

Lalram Chanchin Ṭha Puangtute School

•   A thiltum: Tawn hriat ngah hunbi kima rawngbâwltute tâna a bîk taka buatsaih zirtîrna pêk hi a ni a. Zirlaite chuan thuhrilh leh zirtîrna lama an thiamnate an tihmasâwn a, Bible chhûng thute chu ngun takin an zir. Chuta ṭanga zir chhuakte chu thuhriltu mamawh zualna hmuntea thawk tûra sâwm an ni.

•   A rei zâwng: Thla hnih.

•   A tel theite: Thil phût ṭhenkhatte tlin a, mamawhna hmuna rawng bâwl thei tûr dinhmuna ding pioneer-te chuan tel tûrin an dîl thei a ni.

Kohhran Upate Tâna School

•   A thiltum: Zirtîrna leh berâm tlawhnate ang chi, kohhrana an mawhphurhnate hlen thei tûr leh, Pathian leh an Kristian unaute hmangaihna thûk lehzual nei tûra upate c ṭanpui hi a ni.—1 Petera 5:2, 3.

•   A rei zâwng: Ni nga.

•   A tel theite: Upaa ruat tharte bâkah, kum nga kal ta chhûnga tel tawh lo, tawn hriat ngah upate pawh tel tûra sâwm an ni.

Bial Kantute leh An Nupuite Tâna School

•   A thiltum: Bial kantute d tia koh bial kana rawngbâwltute chu an chanvote ṭha lehzuala hlen thei tûra zirtîr hi a ni a. (1 Timothea 5:17) Chu zirna chuan Kristian upate leh an nupuite chu Bible thute hre fiah lehzual tûrin a ṭanpui bawk.

•   A rei zâwng: Thla khat.

•   A tel theite: An chanvo kum khat thawk tling tawh bial kantu thar leh an nupuite chu tel tûra sâwm an ni a. Tichuan, a hnu kum nga dan zêlah tel leh tûra sâwm an ni ṭhîn.

Lalram Rawngbâwlna School

•   A thiltum: Tûnlai khawvêl dinhmun te, mite rilru sûk thlêk dân te leh, mamawhte ngaihtuah chunga kohhrana an mawhphurhnate hlen thei tûra upate leh kohhranho rawngbâwltute e ṭanpui hi a ni a. (2 Timothea 3:1) He school hi kum tlêm te danah neih ziah a ni.

•   A rei zâwng: A inang lo ṭhîn a, ni khat a ni tlângpui.

•   A tel theite: Bial kantute, upate leh, kohhranho rawngbâwltute.

Bethel Rawngbâwlna School

•   A thiltum: Bethel f member-te chu an hna thawha hlawhtling tûr leh, Pathian leh an thawhpuite chunga hmangaihna thûk lehzual nei tûra ṭanpui hi a ni.

•   A rei zâwng: Ni nga leh a chanve.

•   A tel theite: Bethel member tharte chu tel tûra phût an ni a. Kum nga kal ta chhûnga tel tawh lo rei tak Bethel member lo ni tawh te pawh tel leh tûra sâwm an ni thei.

Watchtower Bible School of Gilead

•   A thiltum: Zirlaite chu Bible an ngainatna tizual a, hre thiam lehzual tûr leh, an thu zirte nunpui thei tûra ṭanpui hi a ni. (1 Thessalonika 2:13) Gilead School-a kal chûng thlarau lama mi puitling tak Kristian a hmei a pate chu Jehova inawpna pâwl leh khawvêl pum huap Bible zirtîr rawngbâwlna atâna mi ṭangkai tak an rawn ni lehzual a. Graduates may be assigned to the field or to a branch office, whether in their home country or in another land A zir chhuakte chu an chênna ramah emaw, ram dangah emaw pawh ni se, thlawhhma, a nih loh leh branch office-a thawk tûra ruat an ni thei.

•   A rei zâwng: Five months.

•   A tel theite: Branch office-te chuan thlan bîk hunbi kima rawngbâwltute chu tel tûra dîlna theh lût tûrin an sâwm a. He school hi United States, New York, Patterson-a Watchtower Educational Center-a neih a ni.

Branch Committee Member-te leh An Nupuite Tâna School

•   A thiltum: Branch office-a thawh hnate leh, an branch office enkawlna hnuaia awm ram pakhat, a nih loh leh ramtea Jehova Thuhretute thlarau lam thiltihte enkawlna kawnga Branch Committee g member-te zirtîrna pêk hi a ni.

•   A rei zâwng: Thla hnih.

•   A tel theite: Jehova Thuhretute World Headquarters chuan thlan bîk Branch Committee member-te leh an nupuite chu New York, Patterson-a Watchtower Educational Center-a neih hemi school-a kal tûr hian sâwm.

  Jehova Thuhretute dawn zirtîrna atâna hman zirlaibu pawimawh ber chu englai pawhin Bible a ni reng a. Bible hi Pathian thâwk khum a ni tih leh, Kristian nun kawng tinrêng atâna kaihhruaina ṭha berte chuanna a ni tih kan ring tlat a ni.—2 Timothea 3:16, 17.

  Sum an sên a ngai lo. Zirna chu a thlâwna pêk a ni a. Jehova Thuhretute thiltihte chu phal taka pêk thawhlâwmte hmanga chhawmdâwl a ni.—2 Korinth 9:7.