Thawhlâwmte chu kan inawpna pâwla sakhaw thiltih leh kan mihringpuite ṭanpui nân kan hmang a. Hêngte hi kan thiltum ber, Krista Isua zirtîr ni tûra mi dangte kan ṭanpuina pêng pakhat a ni.—Matthaia 28:19, 20.

 Thawhlâwmte chu tu emaw tih hausak nân kan hmang ngai lo. Upate emaw, sakhaw hruaitu dangte emaw hlawh kan pe lo va, Jehova Thuhretute chu in tin an kal avânga hlawh pêk an ni hek lo. Governing Boby unaute pawh tiamin, kan branch office, leh kan world headquarters-a rawngbâwltute chuan hlawh an nei lo bawk.

•   Thu leh Hla Tihchhuahna: Kum tin a thlâwnin Bible leh Kristian thu leh hla chhuahte chu maktaduai têl kan letling a, kan chhu chhuak a, kan thawn chhuak a, kan sem darh bawk a ni. Chutiang bawkin, kan website jw.org leh JW Library app-te chuan kan thu leh hla chhuahte chu digital format-in man chawi ngai lo leh fakna tel lova hmuh theihin a siam a ni.

•   Insakna leh Enkawlna: Kan kohhrante’n inkhâwmna leh Pathian chawimawina hmun ṭha an neih theih nân khawvêl pumah biakna in tûrte kan sain, kan enkawl a. Chutiang chiah chuan branch office-te leh translation office-te pawh kan sain kan enkawl a ni. Hna tam zâwk chu tlâwmngaia inpete thawh a ni a, chu chuan sênso titlêm tûrin a ṭanpui a ni.

•   Inruahmanna: Kan world headquarters te, branch office te, leh translation office te-a kan hnathawhte bâkah, bial kantute rawngbâwlna chu khawvêl puma kan thawhlâwm hmanga chhawmdâwl a ni.

•   Thuhrilhna: Thuhretute chu chanchin ṭha an hrilh vâng emaw, mi dangte hnêna “Pathian thu” an zirtîr vâng emawa hlawh pêk an ni lo. (2 Korinth 2:17) Mahse, kum zabi khatnaa Kristiante tih dân angin, rawngbâwltu thlan bîkte leh zirtîrna pêk, an hun tam zâwk thuhrilhna atâna hmangtute chu a âwm tâwk in luahsakin, an mamawh zualpuite pêk an ni.—Philippi 4:16, 17; 1 Timothea 5:17, 18.

•   Zirtîrna: Kan bial inkhâwmpuite leh regional inkhâwmpuitea sênso chu thawhlâwm hmanga chhawm dâwl a ni a. Chu bâkah, Bible ṭanchhan ngaihthlâk tûr awthun te leh video-te kan tichhuak bawk. Kohhran upate leh hunbi kima rawngbâwltute’n an chanvo ṭha lehzuala an thawh theih nâna zirtîrna petu school-te kan nei bawk a ni.

•   Chhiat Tâwkte Chhawmdâwlna: Leilung chhiatna leh mihring thlentîr chhiatna tuarte tân ei tûr, tui, leh chênna tûr inte kan pe a. He kan hnathawh hi kan “rinna chhûngte” chauh ni lovin, Thuhretu ni lote pawhin an hlâwkpui a ni.—Galatia 6:10.