Zirna kan thlîr dânah hian Bible-a kan hmuh thu bulte kan ṭanchhan a. Thuhretu tinte chuan a hnuaia târ lan Bible thu bulte nunpui dân tûr chungchângah Bible zirtîr an chhia leh ṭha hriatna an hmang ang. a

•  Zirna hi a pawimawh

•  Zirna hi thlîr dân dika thlîr a ngai

•  Zirna sâng chuan nungchang lam leh thlarau lam dinhmun hlauhawmah min hruai thei

•  Jehova Thuhretute’n Sunday school an nei em?

 Zirna hian mi chu Bible-in a fak “finna leh ngaihruat thiamna dik tak” nei chho tûrin a ṭanpui a. (Thufingte 2:10, 11; 3:21, 22) Chu bâkah, Isua’n a hnungzuitute chu a thupêkte zirtîr tûrin a hrilh a ni. (Matthaia 28:19, 20) Chuvângin, kan kohhrana awmte chu chhiar te, ziak te, leh inbiak pawhnate b pawh tiamin, a âwm tâwka zirna nei tûr bâkah, mi dangte sakhua leh hnam dân chungchâng hriatna nei tûrin kan fuihin kan ṭanpui a ni.—1 Korinth 9:20-22; 1 Timothea 4:13.

 Sawrkârte chuan zirna hlutzia an hriat avângin naupangte chu primary leh secondary school thleng tal kal tûrin an phût a. Chûng dânte chu he thupêk: “Mi tin an chunga rorêltute [a nih loh leh, sawrkârte] thu thuin awm rawh se,” tih nêna inmilin kan zâwm a ni. (Rom 13:1) Chu bâkah, kan fate chu rûn dâl leka school kal tûr ni lovin, an zirlaia theih tâwp chhuah tûrin kan fuih bawk. c Bible-in: “In tih apiangah mihring tâna ti lovin Lalpa tân anga ti zâwkin, thinlunga tih tak zetin ti rawh u,” tiin a sawi si a.—Kolossa 3:23, Baptist Mid-Missions’ Translation.

 Zirnain kan chhûngte châwm tûrin min ṭanpui. Bible chuan, “tu pawh mahni chhûngkhat lainate ngaihsak lo va, mahni chênpui chhûngte ngei pawh ngaihsak lo chuan rinna an phatsan a ni, ring lo mi aiin an sual zâwk,” tiin a sawi a. (1 Timothea 5:8) Khawvêl lam lehkha zirna chuan kan chhûngkua châwm tûra mawhphurhna thianghlim hlen tûrin min ṭanpui thei a ni. The World Book Encyclopedia sawi angin, zirnain a tum ber chu “mite khawtlânga mi hman tlâka siam a . . . ei leh bâr zawnnaa hna thawktu nihtîr hi a ni,” tiin a sawi a. Mi taima leh lehkha thiam chuan thiamna nei lo leh zirna nei lote aiin a chhûngkua a ṭanpui thei zâwk a ni.—Thufingte 22:29.

 Nu leh pate chuan an fate chu mi puitling ni chho tûra thuamin an ṭanpui a, chumi kawngah chuan school kaltîr hi a hlu hle thei a ni. (2 Korinth 12:14) An chênna hmunah a thlâwnin school a kal theih loh emaw, kaltîr harsa an ti emaw, a nih loh leh hnam dân nên a inkalh a nih pawhin nu leh pate chu an fate school kaltîr tûrin kan fuih a. d An fate zirna nêna inkûngkaiha nu leh pate’n an ṭanpui theih dân chungchângah pawh rawtna ṭangkai takte kan pe bawk. e

 Lehkha zirna hi fîmkhur takin kan thlang. Bible chuan: “Mi mâwl chuan thu tin a ring a, mi remhria erawh chuan a kalna a en ṭha ṭhîn,” tiin a sawi a. (Thufingte 14:15) High school zawh hnu pawha zir belh zêl tûr awmte leh chumi atâna sênso leh a hlutnate chu ngun taka bihchiangin he Bible thu bul hi kan nunpui a ni. Entîr nân, kut themthiam zirna hian hun a khawhral tlêm bâkah, a ṭangkai ṭhîn hle.

 Khawvêl lam lehkha zirna aiin thlarau lama zirna a hlu lehzual. Khawvêl lam lehkha zirna ang lo takin, Bible ṭanchhan thlarau lama zirtîrna chuan nunna chhanhim thei Pathian hriatna min neihtîr a. (Johana 17:3) Nungchang mawi—“felna leh rorêlna . . . hleih neih lohna nên, . . . kawng ṭha tinrêng”—pawh a zirtîr bawk a ni. (Thufingte 2:9) Tirhkoh Paula zirna dawn chu tûn lai huna university zirna ang vêla sâng a ni a; mahse, “Lalpa Krista Isua hriatna hi a hlu bîk” tih a pawm a ni. (Philippi 3:8, Parallel Bible; Tirhkohte 22:3) Chutiang bawkin, tûn laia Jehova Thuhretu tam tak chu khawvêl lamah zir sâng hle mah se, thlarau lama zirna an dawn chu a hlu zâwk tih an ring a ni. f

 Bible thufing pakhatin: “Mi hmanghria chuan thil ṭha lo chu a hmuhin a biru ṭhîn a,” tiin a sawi a. (Thufingte 22:3) Jehova Thuhretute chuan university ṭhenkhat, a nih loh leh chutiang chî zirna sâng neihna hmunte chu nungchang lam leh thlarau lam atân a hlauhawm thei tih an hria a. Chuvângin, Thuhretu tam tak chuan chutiang hmuna awm loh leh, an fate awmtîr loh chu an thlang a ni. Zirna sâng neihna hmunahte chuan a hnuaia târ lan ngaih dân dik lote hi chawilâr ni ṭhînin an ngai bawk:

•   Ngaih dân dik lo: Sumin hlimna leh himna min pe

   Zirna sâng hi sum tam tak thawh chhuahna kawng dik anga chawilâr a ni ṭhîn a, university-a kal zirlai an pun chhan ber pawh sum tam tak thawh chhuah an duh vâng a ni. Mi ṭhenkhat chuan sumin hlimna leh himna a thlen an beisei a; mahse, Bible chuan chutiang ngaihtuahna chu eng mah lo mai a ni tih a târ lang. (Thuhriltu 5:10) Chu aia pawimawh zâwk chu, “tangka sum ngainat hi sual tinrêng bul a ni” tih leh chu chuan rinna a hlohtîr ṭhîn tih a zirtîr hi a ni. (1 Timothea 6:10) Jehova Thuhretute chuan “hausakna bumna” thanga awh pumpelh tûrin theih tâwp an chhuah a ni.—Matthaia 13:22.

•   Ngaih dân dik lo: Miin zirna sângin a pêk theih hmingthanna leh nihna a zawng tûr a ni

  Entîr nân, Georgia prime minister hlui Nika Gilauri-a chuan an rama thlîr dân tlânglâwn tak chungchângah heti hian a ziak a ni: “University degree hi Georgia rama loh theih lohva neih ngai nihna chhinchhiahna a ni a. . . . [Tûn hmain,] degree la lo ṭhalaite chuan an chhûngte an tihmingchhia a ni,” g tiin. Chumi nêna inkalh takin, Bible chuan he khawvêla challanna zawng lo tûrin vaukhânna a pe a. Isua’n a hun laia chawimawina zawng sakhaw hruaitute chu heti hian a hrilh a ni: “Nangni inchawimawi tawn lâwm te u, engtin nge in rin theih ang?” tiin. (Johana 5:44) University-a zirna chuan Pathian huat zâwng chapona nei tûrin mi a fuih theih a ni.—Thufingte 6:16, 17; 1 Petera 5:5.

•   Ngaih dân dik lo: Mi tinin thil dik leh dik lo chungchângah mahniin tehna an insiam tûr a ni

   Jehova Thuhretute chuan thil dik leh dik lo chungchânga Pathian tehnate chu an pawm a. (Isaia 5:20) Amaherawh chu, Journal of Alcohol and Drug Education-a tihchhuah thuziak pakhatin a sawi dânin, university hrang hranga zirlai tam takte chu ṭhiante nêksâwrna chuan “thil dik leh dik lo chungchânga an hriatsate kalhin thu tlûkna” a siamtîr a ni. h Hei hi Bible thu bul: “Ṭhian sualte chuan nungchang ṭha an tikhawlo ṭhîn,” tih nên a inmil hle. (1 Korinth 15:33) University-ah chuan Pathianin a dem zuruihna te, damdawi hman sualna te, leh innei lova mipat hmeichhiat hmannate chu a hluarin an sawimawi hial a ni.—1 Korinth 6:9, 10; 2 Korinth 7:1.

•   Ngaih dân dik lo: Zirna sâng hi khawvêl tihhmasâwn theihna kawng ṭha ber a ni

   Mi tam takin zirna sâng an ûm chhan chu hausakna te, hmingthanna te, leh hlimnate neih nân ni lovin, anmahni leh khawvêl tihhmasâwn an duh vâng a ni tih kan hria a. Hêngte hi thiltum ṭha tak a ni a; mahse, Jehova Thuhretute chuan kawng dang an thlang a ni. Isua angin, Pathian Ram chauhvin khawvêl ṭha zâwk a awmtîr thei tih kan beisei a. (Matthaia 6:9, 10) Mahse, khawvêl buainate chingfel tûrin Lalram chu engmah ti lovin kan nghâk ringawt lo. Isua angin, “he Ram chanchin ṭha hi” khawvêl pumah kan hril a, kum tinin mi sâng têlte chu a ṭha zâwnga an nun thlâk tûrin kan ṭanpui zawk a ni. i—Matthaia 24:14.