Jehova Thuhretu nia baptisma chang tawh, mahse thu hrilhnaa tel tawh lo, Kristian unaute pawh kâwm tawh lotu chu kawm serh a ni lo. A nihna takah chuan, anni chu kan biaknaa an rawn tel leh theih nân theih tâwp chhuahin kan ṭanpui zâwk a ni.

 Sual pawi tak titu chu kan hnawt chhuak nghâl mai lo. Mahse, nungchang lama Bible tehnate bawhchhe fo va, inchhîrna nei lo baptisma chang tawh Thuhretu chu kawm serh, a nih loh leh hnawh chhuah a ni ang. Bible chuan: “Mi sual chu in zîng ata hnawt chhuak rawh u,” tiin chiang takin a sawi si a.—1 Korinth 5:13.

 Hnawhchhuah tuemaw chu a nupui leh a fate Jehova Thuhretute la ni reng ta se, engtin nge ni ang? Sakhaw lam thiltihah a chhûngte zîngah a tel thei tawh lo va, mahse thisenah an la inzawm reng a. Chuvângin, an nupa inlaichînna chu a la ngai rengin, chhûngkuaah inbiak pawhna an la nei zawm zêl a ni.

 Hnawhchhuahte chu kan inkhâwmnaah an lo tel thei a. An duh a nih chuan, kohhran upate hnên aṭanga thlarau lama fuihna pawh an dawng thei bawk. Chumiin a tum ber chu Jehova Thuhretu pakhat ni leh thei tûra ṭanpui hi a ni. Nungchang ṭha lote bânsan a, Bible tehnate nunpuia inchhîrna dik tak lantîrtu hnawh chhuahte chu Jehova Thuhretute ni leh tûrin englai pawha lawm an ni.