Hriat sual: Jehova Thuhretute’n Krismas an hman loh chhan chu Isua an rin loh vâng a ni.

 Thu dik: Kristian kan ni a. Chhandamna hi Isua Krista kal tlang chauhva neih theih a ni tih kan ring.—Tirhkohte 4:12.

 Hriat sual: Mite chu Krismas hmang lo tûra zirtîrin chhûngkua in tikehdarh.

 Thu dik: Chhûngkuate chu kan ngaihsak tak zet a, chhûngkaw nghet lehzual nei tûra mite ṭanpui tûrin Bible kan hmang a ni.

 Hriat sual: “Krismas boruakin a ken tel” thilphalna, leia remna leh mi dangte chunga ṭhatna lantîr theihna hun ṭha in chân a ni.

 Thu dik: Nî tin hian mi thilphal tak nih leh mite nêna inrem kan tum a. (Thufingte 11:25; Rom 12:18) Entîr nân, inkhâwm kan neih dân leh thu kan hrilh dân chu: “A thlâwnin in hmu a, a thlâwnin pe ang che u,” tih Isua kaihhruaina pêk nên a inmil a ni. (Matthaia 10:8) Chu bâkah, mite hnênah Pathian Ram, leia remna awmtîrtu tûr beiseina dik tak chungchâng kan hriattîr bawk.—Matthaia 10:7.

•   Isua chuan a pian nî ni lovin, a thih hriatrengna hmang tûrin thu min pe a ni.—Luka 22:19, 20.

•   Isua tirhkohte leh a zirtîr hmasate chuan Krismas an hmang lo va. New Catholic Encyclopedia chuan “Isua Piancham chu [C.E.] 243 hnu lamah an hmang ṭan,” tih a sawi a, chu chu tirhkoh hnuhnûng berte thih hnu kum zabi khat aia tam a liam hnuah a ni.

•   December ni 25-ah Isua a piang tih finfiahna a awm lo va; a pian nî chu Bible-ah chhinchhiah a ni lo bawk.

•   Krismas hi milem biate thil chîn leh puithuna aṭanga lo chhuak a nih avângin Pathianin a pawm kan ring lo.—2 Korinth 6:17.

 Mi tam tak chuan Krismas hi milem biate hnên aṭanga lo chhuak a ni tih leh Bible-in a thlâwp lo tih an hre chung pawhin an la hmang tho va. Chûng mite chuan heti hian an sawi mai thei: Krismas hman loh avânga mi dangte huat hlawh nih chu ka duh lo.

 Bible chuan “engkim fiah” tûrin min fuih a. (1 Thessalonika 5:21) Thutak ngaihlu tûrin min zirtîr bawk. (Johana 4:23, 24) Chuvângin, mi dangte’n min thlîr dân tûr kan ngaih pawimawh rualin huat hlawh dâwn mah ila, Bible thu bulte chu kan zâwm a ni.

 Krismas kan hmang lo chung pawhin, hemi chungchânga thu tlûkna siam tûra mi dangte dikna neih chu kan zahsak a. Mi dangte Krismas hmang chu kan tibuai lo bawk.