Mitthi vuina nêna inkûngkaiha kan thlîr dân leh thiltihahte hian a hnuaia thute pawh tiamin Bible zirtîrnate kan ṭanchhan a ni:

•   Hmangaih tak thihna avânga lungngaih hi thil pângngai tak a ni. Isua zirtîrte pawh an hmangaih takte thihna avângin an lungngai a. (Johana 11:33-35, 38; Tirhkohte 8:2; 9:39) Chuvângin, mitthi vuina hi hlimhlawp bâwlna hun angin kan hmang lo. (Thuhriltu 3:1, 4; 7:1-4) Chu aiin, khawngaihna lantîrna hun angin kan thlîr zâwk a ni.—Rom 12:15.

•   Mitthi chuan hriatna a nei lo. Kan hnam leh ṭo bul chu eng pawh ni se, mitthite’n thil an hre theiin, mi nung damte an thunun thei tih Bible thu nêna inmil lo thurin ṭanchhana chîn dân leh thiltihte chu kan pumpelh a. (Thuhriltu 9:5, 6, 10) Chûng chîn dânahte chuan tlaivâr te, mitthi vui liam hnua ei leh ina hlimhlawp bâwlna te, thih champhaphâk lawmna te, mitthi tâna inthâwina hlan te, mitthi biak leh mitthi tâna thil dîlsak te, leh nupui pasal sûnte tih tûr serh leh sâng te a tel a ni. Hêng chîn dân zawng zawngte hi pumpelhin, Bible thupêk: “An zîng ata lo chhuak ula, . . . thil bawlhhlawh rêng rêng pawh dek suh u,” tih hi kan zâwm a ni.—2 Korinth 6:17.

•   Mitthite tân beiseina a awm. Bible chuan thawhlehna a awm dâwn tih leh thihna a awm tawh loh hun a lo thleng dâwn tih a zirtîr a. (Tirhkohte 24:15; Thu Puan 21:4) He beiseina hian Kristian hmasate a ṭanpui ang bawkin, keini pawh a lutuka lusûnna pumpelh tûrin min ṭanpui a ni.—1 Thessalonika 4:13.

•   Bible chuan inngaitlâwm tûrin min fuih. (Thufingte 11:2) Mitthi vuina chu khawtlânga challanna, leh hausakna “ropuina lemte” uanpuina hun remchâng angin kan thlîr lo. (1 Johana 2:16) Mitthi vuinaah mite ngaihsân hlawh tûra intihhlimna siam te, kuang man to tak hman te, leh a lutuka inthuamte kan pumpelh a ni.

•   Mitthi vuina chungchânga kan thurinte chu mi dangte pawm luihtîr kan tum lo. Hemi chungchângah hian: “Kan zain Pathian hnênah mahni chanchin kan sawi ṭheuh tûr a ni,” tih thu bul hi kan zâwm a. (Rom 14:12) Mahse, hun remchâng pêk kan nih chuan, kan thurinte chu “thuhnuairawlh tak leh ṭih dêk chungin” hrilhfiah kan tum a ni.—1 Petera 3:15.

 A hmun: Mitthi ta chhûngte’n vuina thusawi neih an duh a nih chuan a hmun atân Kingdom Hall te, mitthi ta in te, mi mal in te, mitthi hâlna hmun te, a nih loh leh thlânmualte an thlang thei a ni.

 Mitthi vuina hun serh: Thihna leh thawhleh beiseina chungchânga Bible sawite hrilhfiahin lusûnte tâna thlamuanna thu sawi a ni a. (Johana 11:25; Rom 5:12; 2 Petera 3:13) Mitthi vuinaah chuan mitthi ta mize ṭhate sawi lan a ni thei a, rinawmna kawnga a entawn tûr ṭha siam mi tichak thei tak chu târ lan a ni thei bawk.—2 Samuela 1:17-27.

 Bible ṭanchhan hla pakhat sak a ni thei a. (Kolossa 3:16) Mitthi vuina hun serh chu mi thlamuan thei tak ṭawngṭainaa tihtâwp a ni.—Philippi 4:6, 7.

 Luh man, a nih loh leh thawhlâwm khawn: Mitthi vuina hun pawh tiamin, sakhaw thiltih engah mah luh man kan khawn lo va, kan inkhâwmah pawh thawhlâwm kan khawn lo bawk.—Matthaia 10:8.

 Attendance: Thuhretu ni lote pawh Kingdom Hall-a neih mitthi vuina inkhâwmah an tel thei a. Kan inkhâwm dangte ang bawkin, chûng mitthi vuina inkhâwmahte chuan mi zawng zawng an tel thei a ni.

 Thuhretu tinte chuan Bible zirtîr an chhia leh ṭha hriatna ṭanchhanin thu tlûkna an siam a. (1 Timothea 1:19) Mahse, Bible thu nêna inmil lova kan hriat sakhaw thiltih chi hrang hrangahte chuan kan tel lo.—2 Korinth 6:14-17.