Jehova Thuhretute chu Pathian leh an vêngte an hmangaihnain a chêttîr avângin tûn hmaa “ka ngaihven lo” tia sawite pawh tiamin, mi zawng zawng hnênah Bible thuchah chu hlim takin an hril a. (Matthaia 22:37-39) Pathian kan hmangaihna chuan ‘thu hriattîr tûra’ a Fapa thupêk zâwm tûrin min chêttîr a ni. (Tirhkohte 10:42; 1 Johana 5:3) Chumi ti tûr chuan hmân laia Pathian zâwlneite tih angin Pathian thuchah chu vawi khat aia tam kan hril a. (Jeremia 25:4) Kan vêngte kan hmangaih avângin nun chhanhim thei “Ram chanchin ṭha” chu a tîra ngaihven lote pawh tiamin, mi zawng zawng hnênah theih tâwp chhuahin hrilh kan tum a ni.—Matthaia 24:14.

 Tûn hmaa ngaihven lotute kan va tlawh leh hian an ngaihven tih kan hmu fo va. Chutiang a nih chhan pathum lo ngaihtuah ta ila:

•   Mite an insawn.

•   Ina mi chêng dangte’n kan thuchah an ngaihven.

•   Mite rilru a inthlâk. Khawvêla thilthlengte, a nih loh leh mi mal dinhmunte avângin mi ṭhenkhat chuan “thlarau lam mamawh nei nia inhriatna” leh Bible thuchah ngaihven duhna an rawn nei a ni. (Matthaia 5:3, New World Translation) Tirhkoh Paula angin, min dodâltute thinlung pawh a inthlâk thei bawk.—1 Timothea 1:12, 13.

 Chutichung pawhin kan thuchah pawm tûrin tumah kan nawrlui lo va. (1 Petera 3:15) Biakna thilah mi mal tinte’n mahniin thu tlûkna an siam a ngai tih kan ring tlat a ni.—Deuteronomy 30:19, 20.