Engvângin Nge Jehova Thuhretute’n Piancham An Lawm Loh?
Jehova Thuhretute chuan piancham lawmnain Pathian a tilâwm lo tih kan rin avângin kan lâwm lo va. Bible-in piancham lawm chu chiang takin khap lo mah se, lawm a nih chhan chhût thiam tûr leh chumi chungchâng Pathianin a thlîr dân hre thiam tûrin min ṭanpui a ni. Piancham lawmna hmêlhmang palite leh a kûngkaih Bible thu bulte lo ngaihtuah ta ila.
Piancham lawm hi milem biakna aṭanga lo chhuak a ni. Funk & Wagnalls Standard Dictionary of Folklore, Mythology, and Legend lehkhabu chuan piancham lawm lo chhuahna bul chu mi chu a pianchamah “thlarau suaksualte leh thil ṭha lote’n tihbuai theihna hun remchâng an nei a. A pianchama a bula a ṭhiante awm vena leh duhsakna an hlante chuan ani chu thil hlauhawm lakah a vênghim thei,” tih rinna aṭangin a ni tih a sawi a. The Lore of Birthdays lehkhabu chuan hmânlai chuan piancham chu “arsi inher kual dân ṭanchhana hma lam hun sawina, horoscope ena chhût nân thil pawimawh tak a ni,” tiin a sawi a. Chu lehkhabu chuan “hmân lai puithuna rin dânin pianchama mombati an chhitte chuan duhsakna an inhlante chu kawng danglam leh mak ropui takin a thlen famkimtîr,” tiin a sawi bawk.
Mahse, Bible erawh chuan ṭhumvâwr te, aien te, dawithiamna te, a nih loh leh “chutiang” thil tihte chu a dem a. (Deuteronomy 18:14; Galatia 5:19-21) A nihna takah chuan, Pathianin hmân lai Babulon khawpui thiam loh a chantîr chhan pakhat chu a mi chêngte’n aienna chi khat arsi chanchin zir an chîn vâng a ni. (Isaia 47:11-15) Jehova Thuhretute chuan hnam dân lo chawr chhuahna zawng zawng chu an rilru luahtu berah an hmang lo; mahse, Bible-in kaihhruaina chiang tak a pêk erawh chu kan ngaihthah lo.
Kristian hmasate’n piancham an lâwm lo. The World Book Encyclopedia chuan “Kristian hmasate chuan tu piancham pawh ni se, piancham lawm rêng rêng chu milem beho tih dân niin an ngai,” tiin a sawi a. Isua ngeiin a lo zirtîr tirhkohte leh mi dangte chuan Kristian zawng zawngte’n an zawm ngai entawn tûr an lo hnut chhiah tih Bible-in a târ lang a ni.—2 Thessalonika 3:6.
Kristiante hman awmchhun chu piancham ni lovin Isua thih hriatrengna a ni. (Luka 22:17-20) Hei hi thil mak a ni lo, Bible-in “pian nî aiin thih nî” a ṭha zâwk tih a sawi si a. (Thuhriltu 7:1) Leia a nun tâwpah Isua chuan Pathian hmaah hming ṭha a chher a, chutiang chuan a pian nî aiin a thih nî chu pawimawh zâwk a nihtîr a ni.—Hebrai 1:4.
Bible chuan Pathian chhiahhlawh piancham lâwm an awm thu pakhat mah a sawi lo. Hei hi a sawi hmaih vâng a ni lo, Pathian rawng bâwl lotu mi pahnih piancham lawm chungchâng erawh a sawi a. Mahse, an piancham lawmnaah thil ṭha lo tak a thleng ve ve a ni.—Genesis 40:20-22; Marka 6:21-29.
Thuhretute fa naupangte chuan piancham an lawm loh avângin thil chân nei niin an inngai em?
Nu leh pa ṭha dangte ang bawkin, Thuhretute chuan an fate hnênah thilpêk pêkte leh inkawm hlimna neihpuite pawh tiamin, kum tluanin an fate an hmangaihzia an lantîr a. A fate hnêna ui lova thil ṭha petu Pathian entawn tûr ṭha famkim chu entawn an tum tlat a ni. (Matthaia 7:11) Chuvângin, Thuhretute fa naupangte chuan a hnuaia mite sawi ang hian chân nei niin an inhre lo:
“Beisei miah loh laia thilpêk dawn hi a hlimawm lehzual.”—Tammy-i, kum 12.
“Ka pianchamah thilpêk dawng lo mah ila, ka nu leh pate’n hun dangah thilpêkte min pe ṭhîn a. Hetianga thilpêk dawn hi a nuam ka ti lutuk.”—Gregory-a, kum 11.
“Minute sâwm chhûng vêl hun hmanho va, cake tlêm azâwng ei leh hla pakhat sak chu intihhlimna a ni thei ang em? Intihhlimna tak tak hriat in duh chuan kan inah lo kal ru!”—Eric-a, kum 6.