Jehova Thuhretute chu Bible zirtîrna ṭanchhan an sakhaw thurin avângin politics-ah an tualdâwih reng a. Dân siamtute thunun te, politics party, a nih loh leh candidate-te tâna vote thlâk te, sawrkâr office-a nihna chelh te, a nih loh leh sawrkar thlâk tuma thiltih engah mah kan tel lo. He thil zâwm tur hian Bible-in chhan ṭha tak min pe tih kan ring a ni.

•   Politics-a nihna chelh duh lo Isua entawn tûr siam chu kan zui a. (Johana 6:15) Ani chuan a zirtîrte chu ‘khawvêla mi ni lo’ tûrin a zirtîr a, chu chuan politics-ah ṭan lam an nei tûr a ni lo tih a tichiang hle a ni.—Johana 17:14, 16; 18:36; Marka 12:13-17.

•   Pathian Ram tân kan rinawm a, chumi chungchângah Isua chuan: “He Ram chanchin ṭha hi . . . khawvêl zawng zawngah hrilin a awm ang,” tiin a sawi a ni. (Matthaia 24:14) Pathian Ram tâna palai leh chumi lo thleng tûr puang tûra mawhphurhna neitu kan nih angin kan chênna ram pawh tiamin, khawi ram politics-ah mah kan tel lo a ni.—2 Korinth 5:20; Ephesi 6:20.

•   Tualdâwih renga awmin politics rinna nei mi tinte hnênah Pathian Ram chanchin ṭha chungchâng zalên takin kan hrilh thei a. Chu bâkah, khawvêl buainate chingfel tûrin Pathian Ram chauh kan rinchhan tih ṭawngkam leh thiltiha lantîr kan tum bawk.—Sâm 56:11.

•   Politics-a inthliar hranna kan pumpelh avângin khawvêl pumah unau angin kan inpumkhat a. (Kolossa 3:14; 1 Petera 2:17) Chumi nêna inkalh takin politics-a inhnamhnawih sakhuate chuan an mi leh sateah inthliar hranna a awmtîr a ni.—1 Korinth 1:10.

 Sawrkâr thuneitute kan zah. Politics-ah ṭan lam nei lo mah ila, kan chênna hmuna sawrkâr thuneitute chu kan zah a. Hei hi Bible thupêk: “Mi tin an chunga rorêltute thu thuin awm rawh se,” tih nên a inrem hle. (Rom 13:1) Dân kan zâwm a, chhiahte kan chawi a, khua leh tuite ṭhatna tûra sawrkâr hma lâkna chu kan thlâwp a ni. Sawrkâr paihthlâk tumna eng thilah mah kan tel lo va, chu aiin a bîk takin zalên taka Pathian kan biak theihna tûra thu tlûknate an siam theih nâna ‘lalte leh thuneitu zawng zawngte tâna’ ṭawngṭai tûra Bible fuihna chu kan zâwm zâwk a ni.—1 Timothea 2:1, 2.

 Mi dangte’n politics thila mahnia thu tlûkna siam tûra dikna an neih chu kan zahsak bawk. Entîr nân, inthlanna kan tibuai lo va, a nih loh leh vote thlâk tumte chu thlâk lo tûrin kan ti hek lo.

 Kan tualdâwihna hi tûn hnaia chin chhuah thar mai a ni em? Ni lo. Tirhkohte leh kum zabi khatnaa Kristian dangte kha tûn ang tho hian politics thilah an tualdâwih a. Beyond Good Intentions tih lehkhabu chuan: “Sawrkâr thuneitute zah tûrin mawhphurhna an nei tih inhre mah se, Kristian hmasate khân politics-a tel chu an tih tûr a ni lo tih an hria,” tiin a sawi a. Chutiang bawkin, On the Road to Civilization tih lehkhabu chuan Kristian hmasate’n “politics thilah nihna an chelh lo,” tiin a sawi ve bawk.

 Politics thila kan tualdâwihna hi ram himna atân a hlauhawm em? Hlauhawm lo. Inrem taka awm duh khua leh tuite kan nih avângin sawrkâr thuneitute tân mi hlauhawm kan ni lo. Ukraine rama National Academy of Sciences-in kum 2001-a a tihchhuah hi han ngaihtuah teh. Kan tualdâwihna chungchângah heti hian a sawi a ni: “Tûn laia mi ṭhenkhat chuan hetianga Jehova Thuhretute tualdâwihna hi an duh lo pawh a ni thei a; hei hi tûn hmaa Nazi ho leh Communist rorêlna hnuaia dik lo taka puh an nih chhan ber a ni,” tiin. Mahse, Thuhretute chu Soviet khap behna hnuaia an awm chung pawhin, “dân zâwmtu khua leh tuite an ni reng a. Anni chuan loah te, thil siamna hmunahte rinawm tak leh theih tâwp chhuahin hna an thawk a, Communist rorêlna chu an dodâl lo.” Chutiang bawkin, tûn laiah pawh Jehova Thuhretute thurin leh thiltihte chu “ram chhûng himna leh rinawmna atân a hlauhawm lo,” tiin report chuan a titâwp a ni.