Science hlawhtlinnate hi kan zah a, finfiahnain a thlâwp science thil hmuh chhuahte pawh kan ring bawk.

 “Science tih chu leilunga thil awmte leh leilung pianken thilte nihphung zirna leh, chumi chungchânga kan neih hriatna hi a ni.” (Collins Cobuild Advanced Learner’s English Dictionary) Bible hi science zirna lehkhabu ni lo mah se, chu chuan mite chu leilung pianken thilte zir tûr leh mi dangte’n science lam thil an hmuh chhuahte hlâwkpui tûrin a fuih a ni. Entîrna ṭhenkhat lo ngaihtuah ta ila:

•   Vân lam chanchin: “Chung lamah khian in mitte lên chho ula, khîngte khi tu siam nge ni en rawh u; ani chuan sipaihote khi indawt zêlin a hruai chhuak ṭhîn a, an hmingin a ko ṭheuh ṭhîn a.”—Isaia 40:26.

•   Thil nung chanchin: Solomona chuan “thing chanchin te pawh Lebanon tlânga sidar thing aṭanga kulha lo chawr chhuak husop chenin a sawi ṭhîn a; sa chanchin te, bawkvâka kal chi chanchin te, sangha chanchin te pawh a sawi ṭhîn a.”—1 Lalte 4:33.

•   Damdawi lam: “Mi hrisêlte chuan dâktawr an ngai lo va, mi bawrhsâwmte zâwkin an ngai a ni.”—Luka 5:31.

•   Khawchin chungchâng: “Vûr dah khâwlna hmunah i lût tawhin, rial dah khâwlna hmunah pawh i lût tawh em ni? . . . Chhak lam thli pawh hi lei chungah a intheh darh?”—Joba 38:22-24.

 Leilunga thil awmte leh science thil hmuh chhuahte chungchâng thuziakte târ langin kan thu leh hla chhuahte chuan science a zahzia a lantîr a. Thuhretu nu leh pate chuan an fate chu an chhehvêla thil awmte an hriatthiam lehzual theih nân lehkha thiam tûrin an fuih a. Jehova Thuhretu tam takte chu biochemistry, mathematics, leh physics pawh tiamin, science nêna inkûngkaih hnate an thawk a ni.

 Science hian mihringte zawhna neih zawng zawng a chhân vek theih kan ring lo. a Entîr nân, leilung chanchin zir mite chuan leilung hi eng aṭanga siam nge a nih tih te, mihring chanchin zir mite chuan taksain hna a thawh dân te chu ngun takin an zir a ni. A nih leh, engvângin nge leilung hi nunna neite tâna awmna tûr ṭha ber a nih a, engvângin nge taksa pêngte pawh hian inrem taka hna a thawh?

 Hêng zawhnate chhânna lungawithlâk chu Bible chauhvin a pe thei tiin thu tâwp kan siam a. (Sâm 139:13-16; Isaia 45:18) Chuvângin, zirna ṭha takah chuan science leh Bible aṭanga zir a tel ve ve tih kan ring a ni.

 A châng chuan, science hian Bible a kalh angin a lang mai thei. Mahse, chûng inkalh anga lang ṭhenkhatte chu Bible zirtîrna dik tak hriat thiam loh vâng zâwk a ni. Entîr nân, Bible chuan leilung hi dârkâr 24 nei ni ruk chhûnga siam zawh angin a zirtîr lo.—Genesis 1:1; 2:4.

 Theory darh zau tak ṭhenkhatte chu science aṭanga finfiahna ṭha tâwk a awm lo va, scientist thiam tak takte chuan chûng theory-te chu an hnâwl a ni. Entîr nân, leilunga thil awmte hian siamtu fing tak a awm tih a lantîr avangin, thil nung chanchin zir mite, leilung insiam dân zir mite, leh nunna nei thilte hi chanchhâwnna avânga lo awm a ni lo tih leh tihpalh thil avânga lo awm a nih ring lotute thlîr dan chu kan ṭâwmpui a ni.