Nawr lui lo. Kan magazine, Vênnainsâng-ah heti hian kan târ lang a ni: “An sakhaw vawn thlâk tûra mite nawr luih chu thil dik a ni lo,” tiin. a A hnuaia thute avâng hian mi dangte nawrluih kan pumpelh a ni:

•   Isua chuan a zirtîrnate pawm tûrin mite a nawrlui ngai lo va. A thuchah ken chhâng lêttu an tlêm hle dâwn tih a hria a ni. (Matthaia 7:13, 14) A zirtîr ṭhenkhat chu a thusawiah an lungni lo tih a hriat khân, anni chu pawm tûra nawr luih aiin kalbo a phalsak zâwk a ni.—Johana 6:60-62, 66-68.

•   Isua’n a hnungzuitute chu an thurinte thlâk tûra mi dangte nawrlui tûrin a zirtîr lo va. A zirtîrte chuan mite chu an duh lo chunga Ram chanchin ṭha pawm tûra nawr luih tum aiin, a ngaithla duhtute an zawng zâwk a ni.—Matthaia 10:7, 11-14.

•   Pathian chuan thinlung taka amah biakna chauh a pawm avângin, tihluihna avânga sakhaw vawn thlâkna chuan awmzia a nei lo.—Deuteronomy 6:4, 5; Matthaia 22:37, 38.

 Bible thuchah chu ‘kâwlkil thlenga’ hrilh tûr a nih avângin Bible thupêk angin “vântlâng zîngah te, in tinah te” kan hril ṭhîn a. (Tirhkohte 1:8; 10:42; 20:20) Kristian hmasate ang bawkin, a châng chuan dân lova mi thlêm anga puh kan ni. (Tirhkohte 18:12, 13) Mahse, chûng puhnate chu a dik lo. Kan thurinte chu mite rin luihtîr kan tum lo. Chu aiin, mite chuan an thu hriat mila duh an thlan theih nân hriatna an neih chu thil dik a ni tih kan ring.

 Mite chu an sakhua thlâk tûrin kan nawrlui lo va, ring thar kan nei theih nân sakhuana hnuaia politics thiltih emaw, thil pêk emaw kan ti lo va, vântlâng hmuhah lan mawi emaw kan tum lo bawk. Hei hi Kristiana inchhâl ṭhenkhatte tih dân kalh chiah a ni a, hetiang thil an tih hian Krista an zah lo tihna a ni. b

 Nei e, Bible chuan mite’n an sakhua thlâk tûrin dikna an nei tih a târ lang a. Chu bâkah, an chhûngte sakhaw vawn ang vawn ve loh thlang a, anmahni duh thu ngeia Pathian dik biak thlangtu mi tam takte chanchin a chhinchhiah bawk. Chûng zînga entîrna ṭhenkhat chu Abrahama te, Ruthi te, Atheni khuaa mi ṭhenkhat te, leh tirhkoh Paula te hi an ni. (Josua 24:2; Ruthi 1:14-16; Tirhkohte17:22, 30-34; Galatia 1:14, 23) Chu bâkah, Bible chuan Pathianin a pawm biakna kalsana thu tlûkna âtthlâk tak siam tûr pawhin miin dikna a nei tih a târ lang bawk.—1 Johana 2:19.

 Universal Declaration of Human Rights chuan sakhuana thlâk tûra dikna neih hi a thlâwp a, chu chu United Nations chuan “the foundation of international human rights law” tiin a ko a ni. Chu dân chuan mi tinte hian “an sakhua, a nih loh leh thurin thlâk tûrin zalênna” an nei a, sakhaw lama ngaih dânte c pawh tiamin “hriatna leh ngaih dân zawng a, dawng tûrin,” dikna an nei tiin a sawi. He dikna chanvoah hian mi dangte’n an thurin vawng tûr leh an rîlrem loh zâwng ngaih dânte hnâwl tûra an dikna neih zahsak a keng tel a ni.

 Hetiang hi a ni kher lo. Bible chuan an sakhua chu engpawh ni se, mi zawng zawng zah, a nih loh leh chawimawi tûrin min fuih a. (1 Petera 2:17) Chu bâkah, Jehova Thuhretute chuan Bible thupêk an zâwm a, an nu leh pate chuan thurin hrang nei mah se, an zah a ni.—Ephesi 6:2, 3.

 Chutichung pawhin mi zawng zawngin Bible thlîr dân chu an pawm vek lo. Zambia rama seilian hmeichhe pakhat chuan: “Ka awmna hmunah chuan sakhuana thlâk chu . . . rinawm lohna leh mahni chhûngte leh khawtlâng phatsanna anga thlîr a ni,” tiin a sawi. He hmeichhia hian a tleirâwl laiin Jehova Thuhretute nên Bible an zir a, a hnu lawka a sakhua thlâk a tum hnuah he thil hi a takin a tawng a ni. Ani chuan: “Ka nu leh pate chuan an lâwm lohzia leh ka tih lunghnualzia min hrilh reng a. An pawm hlawhin ka tân awmzia a neih thûk êm avângin chu chu tawrh harsa ka ti hle. . . . Sakhaw thurochhiah aia Jehova chunga rinawm ka thlan avâng maiin ka chhûngkaw chungah ka rinawm lo tihna a ni lo,” tiin a sawi. d