Ring e. Jehova Thuhretute chuan Bible bu pumpui hi “Pathian thâwk khuma pêk a ni a, . . . a sâwt bawk” tih an ring a ni. (2 Timothea 3:16) Chutah chuan Thuthlung Hlui leh Thuthlung Thar tia kohte hi a tel ve ve a. A tlângpuiin, Jehova Thuhretute chuan Hebrai Pathian Lehkha Thu tih leh Kristian Grik Pathian Lehkha Thu tiin an ko va. Chutiang chuan Bible a ṭhen lai chu a hmân lai tawh, a nih loh leh a ṭangkai tawh lo tih ngaihtuahna kan pumpelh a ni.

 Pathian thlarauva thâwk khumin Kristian tirhkoh Paula chuan: “Hmânlaia ziak apiangte chu keimahni min zirtîrna turin ziak a ni si a,” tiin a ziak a. (Rom 15:4) Chuvângin, Hebrai Pathian Lehkha Thu-ah pawh hian kan tâna thu hlu takte a awm tih kan hre thei a. Chutah chuan thil dang tam tak bâkah, chanchin rin tlâk tak leh thurâwn ṭangkai takte a chuang a ni.

•   Chanchin rin tlâk. Hebrai Pathian Lehkha Thu-ah hian thil siam chungchâng leh mihringte suala an tlûk luh dân chanchin chipchiar tak a chuang a. Chûng thute tel lo chuan, hêng zawhna chhânna lungawithlâk takte hi kan hmu thei lo vang: Khawi aṭangin nge kan lo awm? Engvângin nge mite an thih? tihte hi. (Genesis 2:7, 17) Chu bâkah, Hebrai Pathian Lehkha Thu-ah hian Pathian Jehova’n kan hlimna leh harsatna neih ang neite a dâwr dân a chuang bawk a ni.—Jakoba 5:17.

•   Thurâwn ṭangkai tak. Hebrai Pathian Lehkha Thu-a tel Thufingte bu leh Thuhriltu bu-ahte hian mihringte tâna englai pawha ṭangkai finna thute a chuang a. Chhûngkaw nun hlim neih dân te (Thufingte 15:17), hna chungchânga thlîr dân inbûk tâwk tak neih dân te (Thufingte 10:4; Thuhriltu 4:6), leh ṭhalaite’n an vânglai hun a ṭha thei ang bera an hman theih dân te chungchângah thurâwn a pe a ni (Thuhriltu 11:9–12:1).

 Chu bâkah, Torah (Bible-a bu hmasa lam panga)-a chhinchhiah Mosia Dân zir chu kan hlâwkpui thei a. Chu Dân chuan Kristiante chu phuar tawh lo mah se, nun hlimawm nei tûra min ṭanpui theitu thu bul hlu takte a chuang a ni.—Leviticus 19:18; Deuteronomy 6:5-7.