Watch Tower Bible and Tract Society of Pennsylvania chu hlâwkna ûm lo pâwl a ni a, U.S.A.-a Commonwealth of Pennsylvania dân hnuaiah kum 1884-ah din a ni a. Chu chu Jehova Thuhretute’n Bible leh Bible ṭanchhan thu leh hlate pawh tiamin, khawvêl puma an rawngbâwlna ṭanpui nân an hmang a ni.

 Din a nih chhan ang takin he pâwl thiltumte chu “sakhuana, zirtîrna, leh ṭanpui ngaite ṭanpui a ni a,” a bîk takin “Isua Krista hnuaia awm Pathian Ram chanchin ṭha hrilh leh zirtîr,” hi a ni. Sâwmna hmang chauhvin he pâwl mi leh sa hi a nih theih a, thawhlâwm thawh tam lamah a innghat lo. Pâwl member-te leh director-te chuan Jehova Thuhretute Governing Body an ṭanpui a ni.

 Watch Tower Bible and Tract Society of Pennsylvania bâkah, Jehova Thuhretute chuan ram hrang hrangah dân phal pâwl tam tak an hmang a. Chûng pâwl ṭhenkhatah chuan an hmingah “Watch Tower,” emaw “Watchtower,” emaw hêng zînga pakhat lehlin emaw hi an telh a ni.

 Hêng dân phal pâwlte hian din an nih aṭangin thil tam tak min hlenchhuahtîr tawh a, chûngte chu:

•   Lehkha ziak leh chhut chhuahna. Bible maktaduai 220 leh Bible ṭanchhan thu leh hla tlûklehdingâwn 40 vêl kan tichhuak tawh a. Kan thu leh hlate hi ṭawng 900 chuanga hmuh theih a ni. Kan website jw.org hian mite chu online-ah man chawi lovin ṭawng 160 chuangin Bible a ngaihthlâktîr thei a, “Pathian Ram chu eng nge ni?” tih ang chi Bible zawhnate chhânna hmu tûrin a ṭanpui a ni.

•   Zirna. Bible zirtîrna petu school hrang hrang kan nei a. Entîr nân, kum 1943 aṭanga Watchtower Bible School of Gilead-in zirtîrna ṭha tak a pêk chu Jehova Thuhretu 9,000 vêlin an hlâwkpui tawh a, chu chuan missionary angin rawng a bâwltîr thei a, a nih loh leh khawvêl puma kan rawngbâwlna a tinghetin, a tichak a ni. Kâr tin hian Thuhretu ni lote pawh tiamin, mi maktaduai têlin kan kohhran tina neih inkhâwmte aṭangin zirtîrna an dawng a. Ziak leh chhiar zirna hun pawh kan nei a, mite ziak leh chhiar zirtîr tûrin zirlai bu pawh ṭawng 120-in kan tichhuak a ni.

•   Ṭanpui ngaite ṭanpuina. Kum 1994-a Rwanda rama mihring insuatna ang chi, mihringte thlentîr chhiatna emaw, kum 2010-a Haiti rama lîrnghîng ang chi leilung chhiatna pawh ni se—chhiat tâwkte hnênah an tisa lam mamawh ṭanpuina kan pe ṭhîn a ni.

 Hêng pâwlte leh dân phal pâwl kan hmante hmang hian thil tam tak hlen chhuak mah ila, hêngte vâng chauhva hlen chhuak thei kan ni lo. Kristian tinte hian chanchin ṭha hrilh leh zirtîr siam tûra Pathian thupêk hlen chhuak tûrin mi mal mawhphurhna an nei ṭheuh a ni. (Matthaia 24:14; 28:19, 20) Pathianin kan hnathawh hi min ṭanpui tih leh ‘a ṭhantîrtu’ a ni chhunzawm zêl ang tih kan ring a ni.—1 Korinth 3:6, 7.