Ni lo. Jehova Thuhretute chu an thurina Bible ṭanchhantu Kristian an ni a. Sakhaw ṭhenkhat chuan Palestina rama Judate kalkhâwmna chu Bible hrilh lâwkna nên a inkûngkaih niin an zirtîr a, Jehova Thuhretute’n chutiang thlîr dân chu an nei ve lo. Anni chuan he politics-a hma lâkna hi Bible-ah sawi lâwk a nih an ring lo. Dik takin, Bible chuan mihring sawrkâr pakhat, a nih loh leh hnam pakhat chu a dang aiin a dah sâng lo. Jehova Thuhretute tih chhuah Vênnainsâng, magazine chuan chiang takin heti hian a sawi: “Zionism politics thlâwptu Bible châng a awm lo,” tiin.

 Encyclopædia Britannica chuan Zionism chu “Palestina rama Juda hnam tun din leh ṭanpui tumtu Juda nationalist-te hma lâkna a ni,” tiin a sawi a. A lo chhuahna bulah chuan sakhuana leh politics a tel ve ve a ni. Jehova Thuhretute chuan Zionism chu sakhaw thurin angin an pawm lo va, anni chu Zionism politics-ah an tualdawih pumhlûm a ni.

 Jehova Thuhretute inawpna pâwl chu Zionism pawh tiamin, politics ruahmanna engmaha inrawlh lo sakhaw pâwl liau liau a ni a. Politics-a Jehova Thuhretute tualdâwihna chanchin chu ziaka ṭha taka vawn ṭhat a ni a, ram ṭhenkhata Thuhretute chuan an tualdâwihna ata inhnuhhniam aiin nasa taka tihduhdahna an tuar zâwk a ni. Pathian vân lam Lalram chauhvin he leiah remna tluantling a thlen ang tih kan ring nghet tlat a, chu chu mihring sawrkâr emaw, hma lâkna emawa tihhlawhtlin theih a ni lo.

 Jehova Thuhretute chu khawi hmunah pawh chêng se, an sakhaw thurin bul pui ber pakhat chu sawrkâr thuneitute dân zawm hi a ni a. Anni chu sawrkâr thuneitute lakah an hel lo va, a nih loh leh indonaah pawh an tel hek lo.