Canada ram Alberta bial, Calgary khawpuiah ka piang a. Naupang tê ka nih laiin, ka nu leh pate an inṭhen a, ka nun nên ka pite inah kan insawn a. Ka pite chuan ka nu leh kei chu min hmangaih hlein, naupang hlim tak ka ni ṭhîn. Chûng ka naupang lai hun nuam takte chu ka ngai thei khawp mai.

 Kum sarih ka nihin, ka nuin pasal dang a nei leh a, United States, Missouri bial, St. Louis khawpuia kan insawn chuan a chhe zâwngin ka nung ṭan a. Ka pa chu mi nunrâwng tak a lo ni tih ka hre ta thuai a. Entîr nân, school thar aṭanga ina ka haw nî hmasa ber chuan, school-ah mite hnehchhiah ka tâwkin, engtin mah ka châng lêt ve lo tih ka pa chuan a hria a. A thinrim lutuk chu, school-a mite min vuak aia nâin min vaw ta hrep mai a! Kum sarih mi chauh ka nih aṭangin mi sual hrât tak ka lo ni ta a ni.

 Ka pa thinrimna chu ka nun a tawrh theih tawh loh avângin an inhau ta chiam chiam mai a. Kum 11 ka nih chuan, ruihhlote hmang ṭanin zute ka in ṭan a. Mi luhlul tak ka rawn niin, kawngahte mi sual ka hrât lehzual bawk. High school ka zawh chuan, mi nunrâwng tak ka rawn ni ta a ni.

 Kum 18 ka nihin, U.S. Tui lam sipaiah ka lût a. Chutah chuan, mi tihhlum dânte kan zir a. Kum nga hnuah chuan, Federal Bureau of Investigation-ah hna ka thawh theih beiseiin, tui lam sipai aṭangin a bâng a, psychology ka zir a. United States-ah university ka kal a, chumi hnuah, Canada ramah insawnin chutah chuan ka awm ta a ni.

 University ka kal lai chuan mite leh pâwlte chungah hian ka beidawng hle ṭan a. Mite hian mahni hma an sial hlein, khawvêla thil engkim mai hian awmzia a nei lo ni hian a lang, mihringte buaina lah chinfel theih ni hian a lang lo bawk. Mihringte hian khawvêl ṭha zâwk an siam thei ang tih beiseina ka nei thei tawh lo.

 Nuna beiseina ka nei tâk lohvah chuan zu te, ruihhlo te, sum leh pai te leh, nungchang bawlhhlawhna lamah ka inhmang ṭan a. Party hrang hrangahte tel kualin, hmeichhiate pawh ka kawp lâwr a. Sipai ka ṭan lai khân mite nêna insual dân ka lo zir tawh avângin, mite chu ka sual ta fo mai a. Thil dik leh dik lo chungchângah mahniin tehfung ka nei a, chumi nêna inmil lo nia ka hriat chuan ka inrawlh zêl. Mahse, dik tak chuan tharum thawh hmang tak ka lo ni chho telh telh zâwk hi a lo ni a.

 Ni khat chu ka ṭhianpa nên hmun pakhata ruihhlo kan khawih a, dân lo anga zawrh kan tum a. Ka ṭhianpa chuan Pathian ka rin leh rin loh thu min zâwk thut mai a. Kei chuan, “He khawvêla buainate hi Pathian vâng a nih chuan, Pathian chanchin hriat ka duh lo tawp!” tiin ka châng a. A tûkah, ka hna thara hna ka thawh ṭan chuan, ka thawhpui Jehova Thuhretu pakhat hian, “Khawvêla hrehawm tawrhna thlengte hi Pathian vâng a nih i ring em?” tiin min zâwk a. Nimin maia ka thusawi chungchâng min zâwk thut chu mak ka tiin ka ngaihven ta hle a. A hnu thla 6 chhûng thlengin, thil tam tak kan sawiho va, nunna chungchânga ka zawhna khirh tak takte chu Bible aṭangin min châng vek a ni.

 Chutih laia ka kawp mêk hmeichhia chuan ka thu hriatte a hnêna ka hrilh chu a duh lo va. Sunday tûk khat chu Bible min zirtîr tûrin Thuhretute kan inah an lo kal tûr thu ka hrilh a. A tûkah, ka hna aṭanga ka hawn chuan, ina thil awm zawng zawng lain, min chhuahsan daih a. Pâwn chhuakin ka ṭap ta zawih zawih mai a. Pathian hnêna ṭawngṭaiin, a ṭanpuina ka dîl a. Chumi ṭum chu Pathian hming bil lama Jehova hnêna ka vawi khat ṭawngṭaina a ni.—Sâm 83:18.

 Ni hnih hnuah, Thuhretu nupa tuak khat hian Bible min zirpui ṭan a. An haw hnuah, You Can Live Forever in Paradise on Earth, tih lehkhabu ka chhiar zawm a, zan khuain ka chhiar zo ta vek a ni. a Pathian Jehova leh a Fapa Isua Krista chanchin ka hriatte chuan ka thinung a khawih ta hle. Jehova chu mi khawngaih thei tak leh kan hrehawm tawrhte chu min tawrhpui tih ka hre ta a. (Isaia 63:9) Pathianin min hmangaih avâng leh ka tâna a Fapa, inthawina atâna min pêk avângin ka lâwm tak zet a ni. (1 Johana 4:10) Jehova’n “tu ma boral duh lova, mi zawng zawng lo sim,” a duh avângin, ka chungah a dawhthei hle tih ka hre ta a ni. (2 Petera 3:9) Jehova’n a lamah mi hîp ni hian ka hria.—Johana 6:44.

 Chumi chawlhkâr chuan kohhran inkhâwmah ka tel ṭan a. Ka sam a sei a, bêng behte ka vuah bawk avângin ka lan dân chu a hlauhawm deuh va; mahse, Thuhretute chuan an hmuh zen zen tawh loh an laichin unuate an hmu leh ang mai hian min lo lâwm a. Kristian dik tak angin min cheibâwl a. Ka pi leh pute ina thleng leh ang mai ni hian ka inhria, chu aia thil ṭha dangte pawh a la awm bawk.

 Bible aṭanga ka thu zirte chuan ka nun a thlâk danglam ṭan a. Ka lu ka mêt tawi a, nungchang bawlhhlawhna zawng zawng ka bânsan a, ruihhlo leh zute pawh ka bânsan bawk. (1 Korinth 6:9, 10; 11:14) Jehova tihlâwm ka duh a ni. Chuvângin, ka thiltihte chu Pathianin a duh lo tih ka hriat chuan, chhuanlam ka siam duh lo. Chu aiin, ka rilru a na ngawih ngawih a. ‘Hetiang hian ka ti leh tawh ngai lo vang,’ tiin ka inhrilh ṭhîn. Vuaicha lovin, ka ngaihtuahnate leh nungchang chu ka thlâk danglam nghâl vat a. Chuvângin, Jehova duh zâwnga thiltih a hlâwkzia chu ka hmu ṭan ta a ni. Bible ka zir ṭan aṭanga a thla rukna, kum 1989, July 29 khân Jehova Thuhretu pakhat niin baptisma ka chang a ni.

 Bible-in ka miziate thlâk danglam tûrin min ṭanpui a. Tûn hma chuan, mi sual nêna kan intawh chuan râwng takin ka chhâng lêt ṭhîn a. Mahse, tûnah chuan “mi zawng zawng nên inremin awm” ka tum tlat tawh a ni. (Rom 12:18) Hei hi ka chakna vânga ti thei ka ni lo va, Bible leh thlarau thianghlim ṭanpuina avâng chauhva inthlâk danglam thei ka nih avângin Jehova chungah ka lâwm tak zet a ni.—Galatia 5:22, 23; Hebrai 4:12.

 Tûnah chuan ruihhlo te, tharum thawhna te, leh nungchang bawlhhlawhnate bâwih ata chhuakin, Pathian Jehova tihlâwm tumin theih tâwp ka chhuah mêk a. Mite chu Pathian hre tûrin ka ṭanpui bawk. Baptisma ka chan aṭanga kum rei lo têah, chanchin ṭha hriltute mamawh zualna hmun ram dangah ka insawn a. Kum tam tak chhûngin mite chu Bible-te ka zirpui theiin, an nunchang inthlâk danglamte ka hmuhin ka hlim tak zet a ni. Ka nu pawh Jehova Thuhretu pakhat a rawn nih avângin ka lâwm hle—ka rilru put hmang leh nungchangte ka thlâk danglam avânga rawn ni ta a ni.

 Kum 1999 khân, El Salvador ramah, Lalram Chanchin Ṭha Puangtute School ka kal a. Chu School chuan ram chanchin ṭha hrilnaa hma la tûr te, kohhrana zirtîr tûr te leh, Kristian unaute kan ṭhîn tûrtein min buatsaih a ni. Chumi kum tâwp lamah, unaunu Eugenia-i nên kan innei a. Tichuan, Guatemala ramah hunbi kim rawngbâwlin kan awm a ni.

 Tûnah chuan nuna beidawnna nei tawh lovin, hlim takin ka hun ka hmang tawh a. Bible zirtîrnate nunpuinain nungchang bawlhhlawhna leh tharum thawhna lak ata min chhuah zalênin, hmangaihna leh remnaa khat nun hlimawm tak min pe a ni.