Korinth Khuaa Mite Hnêna Lehkhathawn Pakhatna 1:1-31
1 Pathian duh zâwng anga Krista Isua tirhkoh ni tûra koh kei Paula leh kan unaupa Sosthena hian,
2 Korinth khuaa Pathian kohhran hnênah leh hmun hrang hranga kan Lalpa Isua Krista hming lamtu zawng zawngte hnênah he lehkhathawn hi kan ziak a ni. Ani chu anni leh keini Lalpa a ni si a; Pathian chuan Isua Krista nêna pumkhat ni tûrin a tihrang che u a, mi thianghlim ni tûrin a ko che u a ni:
3 Pathian kan Pa leh Lalpa Isua Krista hnên aṭangin khawngaihna nasa tak leh thlamuanna* nei ang che u.
4 Krista Isua hmanga Pathian khawngaihna nasa tak pêk in nih avângin, in chungchângah ka Pathian hnênah lâwmthu ka sawi fo thîn.
5 Krista nêna pumkhat in nih avângin Pathian thu ṭha taka puan theihna leh hriat theihna pawh tiamin, thil zawng zawng in dawng tawh si a,
6 Krista chungchâng thuchah in zînga tihngheha a awm ang khân.
7 Chutichuan, kan Lalpa Isua Krista lo lan hun tûr in nghahhlelh êm êm lai hian thilpêk eng mah tlachhamin in awm lo ve.
8 Kan Lalpa Isua Krista lo kal nîah tu mahin hêkna tûr che u an neih lohna tûrin, Ani chuan a tâwp thlengin a tinghet bawk ang che u.
9 Pathian, a Fapa kan Lalpa Isua Krista nêna inpumkhat tûra kotu che u chu a rinawm a ni.
10 Chutichuan, unaute u, in thusawia pumkhat in nih theihna tûr leh inṭhen hrang lo va, rilru hmun khat leh ngaihtuahna hmun khata in inpumkhat tlat theih zâwkna tûrin, kan Lalpa Isua Krista hmingin ka ngên a che u.
11 Ka unaute u, in zîngah inhnialna a awm tih Kloii chhûngte zînga mi ṭhenkhatin min hrilh si a.
12 Hei hi ka sawi tum chu a ni, mi tinin: “Kei Paula pâwl ka ni,” “Kei Apollova pâwl ka ni,” “Kei Kipha* pâwl ka ni,” “Kei Krista pâwl ka ni,” in ti hlawm a.
13 Krista chu ṭhenin a awm em ni? Paula chu in tân banah tihhlumin a awm em ni? A nih loh leh, Paula hmingin baptisma in chang em ni?
14 Krispa leh Gaia te chauh lo chu in zînga tu mah ka baptis loh avângin Pathian hnênah lâwmthu ka sawi a ni.
15 Chuti lo chuan, miin ka hminga baptisma chang angin an sawi palh ang che u.
16 Tin, Stephana ina chêngte pawh ka baptis bawk a, chûng lo chu mi dang ka baptis âwm rêng ka hre lo.
17 Krista chuan baptis tûr ni lovin, chanchin ṭha puang tûrin min tîr si a. Mi inzir sângte thusawi anga hril tûr erawh chuan min tîr lo; chuti lo chuan, Krista nghaisakna ban chu eng mah lo maiah a chang ang.
18 Nghaisakna ban chungchâng thu chu boral mêkte tân chuan âtna a ni si a, keini chhandam mêkte tân erawh chuan Pathian thiltihtheihna a ni.
19 “Mi fingte finna ka tiboral ang a, mi thiamte thiamna chu ka hnâwl ang,” tih ziak a ni si a.
20 Mi fing chu khawiah nge? Dân hre mi chu khawiah nge? He khawvêla* inhnial thiam chu khawiah nge? Pathianin he khawvêl finna hi âtna a ni tih a lantîr lo vem ni?
21 He khawvêl mite hian an finna an rinchhan avângin Pathian an hre si lo; nimahsela, Pathian chuan khawvêl mite ngaiha thil âtthlâk kan thuchah puanchhuah ringtute chu chhandamin a finna a lantîr a ni.
22 Juda mite chuan chhinchhiahnate an phût a, Grik mite chuan finna an zawng ṭhîn.
23 Keini erawh chuan Krista bana tihhlum a nih thu kan hril a, chu chu Judate tân chuan tlûkna a ni a, hnam dangte tân chuan âtna a ni.
24 Nimahsela, Juda mi pawh ni se, Grik mi pawh ni se, kohvate tân chuan Krista chu Pathian thiltihtheihna leh Pathian finna a ni.
25 Mite’n âtna leh chak lohna anga an ngaih Pathian thilte chu anni aiin a fingin, a chak zâwk si a.
26 Unaute u, a kohna che u hi en teh u, in zînga tam tak hi tisa lama* mi fing in ni lo va, mi thiltithei tak pawh in ni lo va, mi ropui chhûngkaw zînga mi pawh in ni hek lo.
27 Nimahsela, Pathianin mi fingte tihmualpho nân khawvêl thila âte chu a thlang a, mi chakte tihmualpho nân khawvêl thila chak lote chu a thlang a;
28 mite’n thil pawimawh anga an ngaihte chu eng mah lova a chantîr theihna tûrin, khawvêla thil pawimawh lote leh hmuhsitawmte, mite’n eng mah lova an ngaihte chu a thlang a ni;
29 Pathian hmaah tu mah* an inchhuan theih lohna tûrin.
30 Pathian avângin Krista Isua nên pumkhat in ni a, ani chuan Pathian finna leh Pathian felna a lantîr a ni; Isua avângin mite chu an thianghlim thei a, tlanna avângin an zalên thei a ni.
31 “A chhuang apiangin Jehova chhuang rawh se,” tia ziak ang kha a nih theihna tûrin.
Footnote-te
^ A nih loh leh, “remna.”
^ “Petera,” tia koh a ni bawk.
^ A nih loh leh, “he kalhmang.” Thu Har Hrilhfiahna en rawh.
^ A nih loh leh, “mihringte tehnaa.”
^ A ngial a ngan chuan, “tisa.”
