Korinth Khuaa Mite Hnêna Lehkhathawn Pakhatna 10:1-33
10 Unaute u, hei hi in hriat ka duh a ni, kan pi leh pute kha an vaiin chhûm hnuaiah an awm vek a, an vaiin tuipui an kân vek a,
2 an vaiin chhûmah leh tuipuiah Mosia zuitute angin baptis-in an awm vek a,
3 an vaiin thlarau lam chaw thuhmun an ei vek a,
4 an vaiin thlarau lam in tûr thuhmun an in vek bawk. Anmahni zuitu thlarau lam lungpui aṭanga lo chhuak tui chu an in ṭhîn a, chu lungpui chu Krista a ni.
5 Nimahsela, an zînga a tam zâwk chungah Pathian a lâwm lo va, thlalêrah khân tihhlumin an awm ta a.
6 Tin, thil ṭha lo tih châkna an neih anga kan neih ve lohna tûrin, chûngte chu kan tân entîrna a ni.
7 An zînga ṭhenkhat milem betu an nih ang khân, milem betu ni suh u: “Mipui chu an ṭhu a, an eiin an in a, hun nuam tak hmang tûrin an tho leh a,” tih ziak ang khân.
8 An zînga ṭhenkhat nungchang bawlhhlawhnaa an inhman avânga ni khata mi 23,000 laiin an thih phah ang khân, nungchang bawlhhlawhnaah* i inhmang suh ang u.
9 An zînga ṭhenkhatin Pathian an fiah a, rûl hmanga tihborala an awm ang khân, Jehova i fiah hek suh ang u.
10 An zînga ṭhenkhat an phunnawi avânga tiboraltu hmanga tihborala an awm phah ang khân i phunnawi suh ang u.
11 Tin, chûng thilte chu entîrna tûrin an chungah a thleng a, keini he hun tâwpa* chêngte min vaukhânna atâna ziak a ni.
12 Chuvângin, ding ngheta inngai chu a tlûk lohna tûrin fîmkhur rawh se.
13 Mihringte tawh ṭhin pângngai chauh lo chu thlêmna rêng rêng in chungah a thleng ngai lo. Nimahsela, Pathian chu a rinawm a ni; ani chuan in tawrh theih bâk thlêmna in tawh a phal lo vang, in tawrh theihna tûrin thlêmna rualin tlân chhuahna kawng a siamsak ang che u.
14 Chuvângin, ka duh takte u, milem biak hi tlânsan rawh u.
15 Hriatthiamna nei mite hnênah ka sawi a ni; ka thusawi hi a dik leh dik loh nangmahni ngeiin ngaihtuah rawh u.
16 Mal kan sâwm ṭhin malsâwmna no hi Krista thisen kan ṭâwmpuina a ni lo vem ni? Chhang kan phel ṭhin hi Krista taksa kan ṭâwmpuina a ni lo vem ni?
17 Keini tam tak ni mah ila, chhang erawh tlang khat chauh a awm a, chu chhang tlang khata mi chu kan ei ṭheuh avângin taksa pumkhat kan ni.
18 Tisa dânin Israelte hi en teh u: Inthawina eitute chu maichâm ṭâwmpuitute an ni lo vem ni?
19 A nih chuan, eng nge ka sawi tâk ang? Milem hnêna hlan tawh sa chu sa dang aiin a hlu bîk em ni? Milem chu Pathian tak tak a ni em ni?
20 Ni lo ve, hnam dangte inthawina chu Pathian hnênah ni lovin, ramhuaite hnêna inthawina a ni tih ka sawi zâwk a ni; nangni erawh chu ramhuaite ṭâwmpuitu in nih ka duh lo.
21 Jehova no leh ramhuaite no in in kawp thei lo vang; “Jehova dawhkâna” mi leh ramhuaite dawhkâna mi in ei kawp thei hek lo vang.
22 A nih loh leh, Jehova chu thîk tûrin kan chawk tho dâwn em ni? Ani aiin kan chak zâwk em ni?
23 Thil engkim tih a thiang a; nimahsela, thil engkim tih a ṭha kher lo. Thil engkim tih a thiang a; nimahsela, thil engkim tihin mi a siam ṭha kher lo.
24 Mi tinin mahni ṭhatna tûr ni lovin, mi dang ṭhatna tûr zawng zêl rawh se.
25 Sa zawrhna hmuna sa an zawrh apiang chu chhia leh ṭha hriatna thiang tak nên ei rawh u, khawi lam sa nge a nih in zawh kher a ngai lo.
26 “Lei leh a chhûnga awm zawng zawng hi Jehova ta” a ni si a.
27 Ring lo miin chaw ei tûra a sâwm che u a, in kal duh chuan a chhawp apiang che u chu chhia leh ṭha hriatna thiang tak nên ei rawh u, khawi aṭanga a neih nge in zawh kher a ngai lo.
28 Amaherawhchu, tuin emaw, “Hei hi inthawina atâna hlan a ni,” tia a hrilh che u chuan, a hrilhtu che u avâng leh chhia leh ṭha hriatna avângin ei suh u.
29 In chhia leh ṭha hriatna ka tihna a ni lo va, a hrilhtu che u chhia leh ṭha hriatna ka tihna zâwk a ni. He zalenna hi mi dang chhia leh ṭha hriatnain min sawisêl tûr zâwnga hman ka duh si lo va.
30 Ka ei dâwnah lâwmthu sawi mah ila, mi dangte min sawisêlna a thlen dâwn chuan engvângin nge ka ei kher ang?
31 Chutichuan, in ei emaw, in in emaw, thil dang in tih emaw pawhin Pathian ropuina tûr hlîrin engkim ti rawh u.
32 Juda mi te, Grik mi te leh, Pathian kohhran titlutute ni lo tûrin fîmkhur rawh u.
33 Ka hlâwkna tûr zawng lo va, chhandam an nih theihna tûra mi tam tak hlâwkna tûr zawng a, thil engkima mi zawng zawng tihlâwm ka tum ang hian.
