Korinth Khuaa Mite Hnêna Lehkhathawn Pakhatna 11:1-34
11 Krista entawntu ka nih angin, nangni pawh min entawntute ni ve rawh u.
2 Unaute u, thil engkima min hriat reng ṭhin avâng leh thurochhiah ka hlan chhâwn che u kha nghet taka in vawn tlat avângin ka fak duh che u a ni.
3 Amaherawhchu, mipa tawh phawt lu chu Krista a ni; hmeichhe lu chu mipa a ni; Krista lu chu Pathian a ni tih in hriat ka duh a ni.
4 Mipa tu pawh lu khuh chunga ṭawngṭai emaw, hrilh lâwkna thu sawi emaw apiang chuan a lu a timualpho a ni.
5 Amaherawhchu, hmeichhia tu pawh a lu khuh lova ṭawngṭai emaw, hrilh lâwkna thu sawi apiang emaw chuan a lu a timualpho a ni, a tân chuan ziah kâwn nên thuhmun reng a ni si a.
6 Hmeichhia tu pawhin a lu a khuh loh chuan, a sam tan tawi law law rawh se; amaherawhchu, hmeichhe tân sam tan tawi emaw, ziah kâwn emaw a zahthlâk si chuan a lu a khuh tûr a ni.
7 Mipa erawh chuan Pathian anpui leh a ropuina a nih avângin a lu a khuh tûr a ni lo, hmeichhia erawh chu mipa ropuina a ni.
8 Mipa hi hmeichhia aṭanga chhuak a ni lo va, hmeichhia erawh chu mipa aṭanga chhuak a ni si a.
9 Chu bâkah, mipa hi hmeichhe tâna siam a ni lo va, hmeichhia erawh chu mipa tâna siam a ni.
10 Chumi avâng leh vântirhkohte avângin, hmeichhia chuan thuneihna hnuaiah a awm tih lantîr nân a lu a khuh tûr a ni.
11 Chu bâkah, Lalpa zuitute zîngah chuan mipa lak aṭangin hmeichhia a inlahrang thei lo va, hmeichhe lak aṭangin mipa a inlahrang thei hek lo.*
12 Hmeichhia hi mipa taksa aṭanga siam a nih ang bawkin, mipa pawh hi hmeichhia aṭanga piang a ni; amaherawhchu, engkim hi Pathian siam vek a ni.
13 Nangmahni ngeiin han ngaihtuah teh u: Hmeichhia lu khuh lova Pathian hnêna a ṭawngṭai chu thil inawm a ni em?
14 Mipa tân sam zuah sei chu thil zahthlâk a ni tih mihring nihphung pawhin a hriattîr lo che u em ni?
15 Hmeichhiain sam sei a neih erawh chuan, chu chu a tân ropuina a ni lo vem ni? A sam chu thil danga a lu a khuh loh nâna pêk a ni si a.
16 Nimahsela, tu pawhin hnam dân dang zawm a duh avânga a hnial a nih chuan, keini chuan chutiang hnam dân dang kan nei lo tih kan hria, Pathian kohhran pawhin a nei hek lo.
17 Amaherawhchu, hêng kaihhruainate pe chung si hian ka fak thei lo a che u, in ṭhat zâwkna tûr ni lo va, in chhiat zâwkna tûra in inkhâwm ṭhin avângin.
18 A hmasa berin, kohhrana in inkhâwmin in zîngah inṭhen hranna a awm tih ka lo hria a, rin pawh ka ring deuh bawk a ni.
19 Tin, Pathian duhsak hlawhtute in lan chian theihna tûrin, in zîngah pâwl hrang an awm tûr a ni rêng si a.
20 Lalpa Zanriah ei tûra in kal khâwmin, dik takin in ti lo.
21 A ei hun a lo thlenin, ṭhenkhatin in lo ei tawh a, ṭhenkhat an ril a ṭâm a, ṭhenkhat an rui thung a.
22 Ei leh inna tûr in in nei lo vem ni? A nih loh leh, Pathian kohhran hmusitin, eng mah nei lote chu in timualpho vem ni? In hnênah eng nge ka sawi tâk ang? Ka fak dâwn che u em ni? He thilah hi chuan ka fak thei lo che u a ni.
23 Ka thu hrilh chhâwn che u hi Lalpa hnên aṭanga ka dawn asin. Khatia, Lalpa Isua chuan phatsana a awm dâwn zân khân chhang a lâk a,
24 lâwmthu a sawi zawh a, a phel a: “Hei hi ka taksa aiawhtu in aia pêk tûra chu a ni. Min hriatreng nân hei hi ti ṭhîn rawh u,” a tih kha.
25 Chutiang bawkin, zanriah an ei zawhah no pawh chu a lâk a: “He no hi ka thisen hmanga siam thuthlung thar a ni. In in apiangin min hriatreng nân hei hi ti ṭhîn rawh u,” a tih kha.
26 Chhang chu in ei a, no chu in in apiangin a lo kal leh hma loh zawng, Lalpa thihna chu in puang chhuak reng si a.
27 Tu pawh tlâk lo chunga Lalpa chhang ei a, Lalpa no in apiang chu Lalpa taksa leh thisen lakah thiam loh a chang ang.
28 Chuvângin, mi tin ngun takin mahni inendik hmasa phawt sela, chumi hnuah chauh chhang chu eiin, no chu in rawh se.
29 Lalpa taksa ngaihtuah chiang lova eia intu chuan, ama chunga rorêlna inthlen tûrin a eiin a in a ni.
30 Chuvângin, in zînga tam tak in chak lovin, in dam lo va, tam tak thihnaah* in muhîl a ni.
31 Amaherawhchu, ngun taka mahni kan inendik chuan rorêlsakin kan awm lo vang.
32 Nimahsela, rorêlsaka kan awm hian khawvêl ruala thiam loh chang kan nih lohna tûrin Jehova thununin kan awm tihna a ni.
33 Chuvângin, ka unaute u, ei tûra in kal khâwm hunah innghâk ṭhîn rawh u.
34 In inkhâwm hunah rorêlsaka in awm lohna tûrin tu pawh rilṭâm chuan inah ei rawh se. Thil dang erawh chu ka lo kal hunah ka chingfel ang.
Footnote-te
^ Chu chu, mipa leh hmeichhia an inmamawh tawn tihna a ni.
^ Thlarau lama thihna sawina ni ngeiin a lang.
