Korinth Khuaa Mite Hnêna Lehkhathawn Pakhatna 12:1-31
12 Tin, unaute u, thlarau lam thilpêkte chungchâng chu in hriat loh ka duh lo ve.
2 Hnam dang mi* in la nih lai khân an hruaina che u apianga zui tûrin, milem ṭawng thei hlei lote thunun leh hruai bovin in awm tih in hriat kha.
3 Tin, hei hi in hriat ka duh a ni, Pathian thlarau hruaia awm tu mahin: “Isua chu ânchhe dawng a ni,” an ti ngai lo. Thlarau thianghlima hruai an nih loh chuan tu mahin: “Isua chu Lalpa a ni,” an ti thei hek lo.
4 Tin, thilthlâwnpêk hrang hrang a awm a, thlarau erawh chu thuhmun a ni;
5 rawngbâwlna hrang hrang a awm a, Lalpa erawh chu thuhmun a ni;
6 hnathawh dân hrang hrang a awm a; nimahsela, mi zawng zawng chunga thawktu Pathian chu thuhmun a ni.
7 Amaherawhchu, thlarau thianghlim ṭanpuina chu mi tin chungah fiah taka hmuhin a awm a, chu chu mi zawng zawngin an hlâwkpui theih nân Pathianin a pe a ni.
8 Thlarau thianghlim avângin mi pakhat chuan fing takin thu a sawi thei a, chu thlarau thianghlim avâng vêk chuan mi dangin hriatna nên thu a sawi thei a,
9 chu thlarau thianghlim avâng vêk chuan mi pakhatin rinna a nei thei a, mi dangin dam lo tihdam theihna a nei bawk a,
10 chu thlarau thianghlim vêk chuan mi dang hnênah thil mak ropui tih theihna a pe a, mi dang hnênah thu hrilh lâwk theihna a pe a, mi dang hnênah thlarau lam thute hriatthiam theihna a pe a, mi dang hnênah ṭawng hrang hranga thu sawi theihna a pe a, mi dang hnênah ṭawng hriat loh lehlin theihna a pe si a.
11 Chûng zawng zawng chu thlarau thuhmun hmanga tih a ni a, Pathian thlarau kaihhruai ang zêlin mi tin hnênah theihna pêk a ni.
12 Taksa hi pakhat ni mah se, pêng tam tak a nei a, taksa pêngte chu tam tak an ni chung pawhin, taksa chu pakhat chauh a ni a, Krista pawh chutiang chiah chu a ni.
13 Kan vai hian taksa pakhat ni tûrin thlarau thuhmuna baptis kan ni a, Juda mi kan ni emaw, Grik mi kan ni emaw, bâwih kan ni emaw, mi zalên kan ni emaw, kan vaiin thlarau thuhmun kan dawng* ṭheuh a ni.
14 Taksa hian pêng pakhat chauh ni lovin pêng tam tak a nei a.
15 Kê hian, “Kut ka nih loh avângin taksa pêng ka ni lo,” ti sela, chu chuan taksa pêng a nihtîr lo chuang lo.
16 Tin, beng hian, “Mit ka nih loh avângin taksa pêng ka ni lo,” ti sela, chu chuan taksa pêng a nihtîr lo chuang lo.
17 Taksa pum pui hi mit ni ta se, ri hriatna chu khawiah nge a awm ang? Taksa pum pui hi beng ni ta se, rim hriatna chu khawiah nge a awm ang?
18 Amaherawhchu, Pathianin taksa pêng tinte chu a duhna takah a awmtîr ṭheuh a ni.
19 Pêng zawng zawngte chu inang ta se, taksa chu khawiah nge a awm ang?
20 Nimahsela, pêng tam tak an ni zâwk a, taksa erawh chu pakhat chauh a ni.
21 Mit hian kut hnênah, “Ka mamawh lo va che,” a ti thei lo va, lu hian ke hnênah, “Ka mamawh lo va che,” a ti thei hek lo.
22 Chutih ahnêkin, taksa pêng chak lo zâwk anga langte hi an pawimawh êm êm a ni.
23 Kan taksa pêng chawimawi tlâk loh zâwka kan ngaihte hi kan ngaihsak lehzual ṭhîn a; tin, kan taksa pêng mawi lo laite hi kan enkawl ṭha lehzual ṭhîn.
24 Chutih rualin, kan taksa pêng mawi laite chuan engtia tih mah an mamawh lo. Amaherawhchu, taksa pêng chawimawi hlawh lote chu nasa taka chawimawiin Pathianin taksa hi a rem khâwm a ni,
25 taksaa inṭhen hranna a awm lohna tûrin. Nimahsela, taksa pêngte chu an inngaihtuah tawn tûr a ni.
26 Pêng pakhatin a tuar chuan pêng dang zawng zawngin an tuarpui ṭhîn a, pêng pakhat chawimawia a awm chuan pêng dang zawng zawngin an lâwmpui ṭhîn.
27 Nangni hi Krista taksa in ni a, mi tinte hi a pêngte in ni.
28 Pathianin kohhrana mite chu: pakhatna, tirhkoh ni tûr te; pahnihna, zâwlnei ni tûr te; pathumna, zirtîrtu ni tûr te; tichuan, thil mak ropui ti tûr te, tihdam theihna* nei tûr te, mi dang ṭanpui tûr te, mi dang kaihruai thei tûr te leh, ṭawng danga thu sawi tûrtein a thlang a ni.
29 An vaiin tirhkoh an ni vek em ni? An vaiin zâwlnei an ni vek em ni? An vaiin zirtîrtu an ni vek em ni? An vaiin thil mak ropui titu an ni vek em ni?
30 An vaiin tihdam theihna thilthlâwnpêk an nei vek em ni? An vaiin ṭawng dangin thu an sawi vek em ni? An vaiin ṭawng lettu an ni vek em ni?
31 Nimahsela, thilthlâwnpêk ropui zâwkte chu ṭhahnemngai takin zawng zêl rawh u. Tichuan, kawng ṭha zâwk ka kawhhmuh ang che u.
Footnote-te
^ Chu chu, ring lotute tihna a ni.
^ A nih loh leh, “kan in.”
^ A nih loh leh, “tihdam theihna thilthlâwnpêk.”
