Korinth Khuaa Mite Hnêna Lehkhathawn Pakhatna 13:1-13
-
Hmangaihna—kawng ṭha ber (1-13)
13 Mihring ṭawngte leh vântirhkoh ṭawngtein thu sawi mah ila, hmangaihna ka neih si loh chuan dâr rî emaw, dârbenthek* rî mai mai emaw ka lo ni ang.
2 Pathian min pêk thuchah sawi theihna te, thurûk thianghlim zawng zawng hriatthiam theihna te leh, hriatna zawng zawngte neiin, tlângte sawn theihna khawp hiala rinna chak nei mah ila, hmangaihna ka neih si loh chuan eng mah ka ni lo vang.*
3 Ka thil neih zawng zawng mi dangte châwm nâna pein, ka inchhuan theihna tûrin ka taksa hi pe mah ila, hmangaihna ka neih si loh chuan hlâwkna rêng rêng ka nei lo vang.
4 Hmangaihnain a dawhthei a,* ngil a nei bawk. Hmangaihnain a îtsîk lo va, a uang lo va, a chapo lo va,
5 mawi lo takin a khawsa* lo va, mahni hma a sial lo va, a thinur duh lo va, lungnih lohna* a pai reng lo va.
6 Fel lohnaah a lâwm lo va, thutak erawh chu a lâwmpui ṭhîn.
7 Engkim a tuar hrâm hrâm a, engkim a ring a, engkim a beisei a, engkim chhel takin a tuar ṭhîn.
8 Hmangaihna hi engtikah mah a dai* ngai lo vang. Thu hrilh lâwk theihna thilpêkte hi awm mah se, tihbo a la ni ang a; ṭawng hrang hrangte* hi awm mah se, tihbo a la ni ang a; hriatnate hi awm mah se, tihbo a la ni ang.
9 A kim lovin kan hria a, a kim lovin kan hril lâwk a ni.
10 Nimahsela, a famkim a lo thlen hunah chuan a kim lo hi tihbo a la ni ang.
11 Naupang ka nih lai chuan naupang ṭawngin ka ṭawng a, naupang ngaihtuahin ka ngaihtuah a, naupang chhût dânin ka chhût ṭhîn. Tûna ka lo puitlin hnuah erawh hi chuan, naupang thiltih ṭhin dânte chu ka bânsan tawh a ni.
12 Tûnah chuan thîr dârthlalangah* fiah lo ruaiin kan hmu a, nakinah erawh chuan inhmachhawn ang maiin kan la hmu ang. Tûnah chuan a kim* lovin ka hria a, nakinah erawh chuan chiang taka hriat ka nih ang hian a kimin ka hre tawh ang.
13 Tichuan, hêng thil pathum: rinna, beiseina leh, hmangaihna hi a awm reng ang; nimahsela, hêngahte hian a ropui ber chu hmangaihna hi a ni.
Footnote-te
^ Rimawi tumna hmanraw bial, a ruala pahnih khâwna ri ring tak chhuah ṭhîn.
^ A nih loh leh, “hman tlâk ka ni lo vang.”
^ A nih loh leh, “a tuar hrâm hrâm a.”
^ A nih loh leh, “a hawihhâwm lo.”
^ A nih loh leh, “thil dik lote.”
^ A nih loh leh, “a reh.”
^ Chu chu, mak tak maia ṭawng dangtea thusawi theihna a ni.
^ Hmân lai mite chuan thîra siam dârthlalang an hmang ṭhîn.
^ A nih loh leh, “a dik.”
