Korinth Khuaa Mite Hnêna Lehkhathawn Pakhatna 14:1-40
14 Hmangaihna hi lantîr zawm zêl ula, thlarau lam thilthlâwnpêkte chu ṭhahnemngai takin zawng zawm zêl rawh u; a bîk takin, thu hrilh lâwk theihna thilthlâwnpêk hi zawng zawm zêl ang che u.
2 Ṭawng danga thusawi theihna thilpêk neitu chuan mihring hnênah ni lovin Pathian hnênah thu a sawi a ni. Thlarau hmangin thurûk thianghlimte chu sawi mah se, tu man an hre thiam lo.
3 Nimahsela, hrilh lâwkna thu sawitu chuan a thusawiin mite a siam ṭha a, a fuih a, a thlamuan ṭhîn.
4 Ṭawng danga thusawitu chuan amah a insiam ṭha ṭhîn a, hrilh lâwkna thu sawitu erawh chuan kohhran a siam ṭha ṭhîn.
5 Tin, in vaiin ṭawng dangtea thu in sawi ka duh a; nimahsela, hrilh lâwkna thu in sawi ka duh zâwk a ni. Kohhran siam ṭhatna tûra a thusawite lehlin a nih loh chuan, ṭawng dangtea thusawitu aiin hrilh lâwkna thu sawitu chu a ropui zâwk.
6 Nimahsela, unaute u, tûnah hian in hnênah lo kalin ṭawng dangin thu sawi pawh ni ila, thu puan chhuah ka sawi emaw, hriatna thu ka sawi emaw, hrilh lâwkna thu ka sawi emaw, zirtîrna thu ka sawi emaw a nih si loh chuan, in tân hlâwkna eng nge awm ang?
7 Nunna nei lo tum rîk theih phênglâwng leh ṭingṭangte pawh chutiang chiah chu a ni. A rîk dânah danglamna a awm loh chuan phênglâwng emaw, ṭingṭang emawa an tum chu eng nge a nih tuin nge hre thei ang?
8 Tawtawrâwt hi mumal nei lova a rîk chuan, tu nge râl do tûrin inbuatsaih ang?
9 Chutiang bawkin, in leia hriatthiam awlsama thu in sawi loh chuan, engtin nge miin in thusawi an hriat theih ang? Boruaka thusawi mai in ni dâwn asin.
10 Khawvêlah hian ṭawng chi hrang hrang a awm a; nimahsela, awmze nei lo pakhat mah a awm lo.
11 A ṭawng awmzia ka hriatthiam loh chuan, chu ṭawng hmangtu tân chuan ram dang mi ka lo ni ang a, ani pawh ka tân ram dang mi a ni ang.
12 Chutichuan, nangni pawh thlarau thilthlâwnpêkte in duh êm êm avângin, kohhran siam ṭhatna tûrin, chûng thilpêkte chu tam lehzuala in neih theih nân zawng rawh u.
13 Chuvângin, ṭawng danga thusawitu chuan a thusawi a lehlin theih nân ṭawngṭai rawh se.
14 Ṭawng danga ka ṭawngṭai chuan, a ṭawngṭaitu chu keimah ni lovin, thlarau thilthlâwnpêk ka dawn zâwk a ni, ka rilru erawh chuan a hre thiam lo.
15 A nih chuan, engtin nge ni ta ang? Thlarau thilthlâwnpêkin ka ṭawngṭai ang a, ka rilruin ka ṭawngṭai bawk ang. Thlarau thilthlâwnpêkin fakna hla ka sa ang a, ka rilruin fakna hla ka sa bawk ang.
16 Chuti lo chuan, thlarau thilthlâwnpêka fakna thu i sawi hunah, engtin nge i bula awm mi pângngai mai chuan i lâwmthu sawi ṭawngṭaina chu “Amen” a tih theih ang? I thusawi awmzia a hre si lo.
17 Nang chuan lâwmthu i sawi ṭha tak zet mai; nimahsela, i bula awm chu a siam ṭha chuang si lo.
18 Nangni zawng zawng aia ṭawng ka thiam tam zâwk avângin Pathian hnênah lâwmthu ka sawi a ni.
19 Nimahsela, kohhran inkhâwmnaah chuan ṭawng danga thu mal sîngkhat sawi aiin, mi dangte ka zirtîr theih nân, hriatthiam theih tûr zâwngin thu mal panga lek sawi ka duh zâwk a ni.
20 Unaute u, naupang angin thil ngaihtuah suh u; sual lamah erawh chuan nausên pawisawi lote ang ni ula, puitling takin thil ngaihtuah rawh u.
21 Dân lehkhabuah: “‘Ram dang mite ṭawng leh hmêlhriat lohte hmuiin hêng mite hnênah hian thu ka sawi ang a; chuti chung pawhin, min ngaithla duh lo vang,’ Jehova’n a ti,” tih ziak a ni.
22 Ṭawng dangte chu ringtute tâna chhinchhiahna a ni lo va, ring lotute tân zâwk a ni; chutih rualin, hrilh lâwkna chu ring lotute tân a ni lo va, ringtute tân zâwk a ni.
23 Chuvângin, kohhran puma in inkhâwm hunah in vaiin ṭawng dangtein ṭawng ta ula, mi pângngaite emaw, ring lotute emaw lo lût ta se, mi â an ti dâwn lo che u em ni?
24 Amaherawhchu, in vaia hrilh lâwkna thu in sawi chuan ring lo mi emaw, mi pângngai mai emaw rawn lût se, ani chu a thu hriat chuan a siam ṭha ang a, ngun takin a inbih chiang ang.
25 A thinlunga thurûkte chu tihlanin a lo awm ang a; tichuan, bawkkhupa Pathian chibai bûkin, “In zîngah hian Pathian a awm tak zet a ni,” tiin a puang chhuak ang.
26 Ka unaute u, engtin nge ni ta ang? In inkhâwmin mi pakhat Pathian fakin a zai a, mi dangin a zirtîr a, mi dangin Pathianin a hriattîr thute a sawi a, mi dangin ṭawng letin a hrilhfiah ṭhîn. Engkim chu kohhran tihchakna tûra tih a ni tûr a ni.
27 Ṭawng dang hmang an awm a nih chuan, pahnih emaw, pathum emaw chauhvin thu sawi rawh se. Tin, an insawi chhâwk tûr a ni a, an thusawi chu tu emawin a let tûr a ni.
28 Nimahsela, ṭawng lettu a awm loh chuan, ani chu kohhranah ngawi reng sela, a thinlungin Pathian hnênah thu sawi zâwk rawh se.
29 Zâwlnei pahnihin emaw, pathumin emaw thu sawi sela, mi dangin a awmzia hriat tum rawh se.
30 Amaherawhchu, mi dangin Pathian hnên aṭanga a thu dawnte a sawi chuan, thu sawi hmasa zâwktu chu ngawi rawh se.
31 Mi zawng zawngin an zir theihna tûr leh fuihna an dawn theihna tûrin, in vaiin hrilh lâwkna thu in insawi chhâwk thei si a.
32 Zâwlneite chu thlarau thilthlâwnpêk an hman hunah mahni an inthunun tûr a ni.
33 Pathian chu buaina Pathian a ni lo va, remna* Pathian a ni zâwk si a.
Mi thianghlim kohhran zawng zawngte angin,
34 kohhranah hmeichhiate chu ngawi rengin awm rawh se, an tân ṭawng phalsak a ni si lo va. Dânin a sawi angin, mipate hnuaiah intulût zâwk rawh se.
35 Thil eng emaw zir an duh chuan, in lamah an pasalte zâwt rawh se, kohhrana hmeichhiain thu a sawi chu a mualphothlâk si a.
36 Pathian thu lo chhuahna bul in ni em ni? Nangmahni hnênah chauh a thleng em ni?
37 Tu pawhin zâwlnei emaw, thlarau thilthlâwnpêk dawng emaw anga a inngaih chuan, in hnêna ka thu ziahte hi Lalpa thupêk a ni tih a hre tûr a ni.
38 Nimahsela, tu pawhin hei hi a ngaihthah chuan, ani pawh ngaihthah a ni ve ang.*
39 Chuvângin, ka unaute u, ṭhahnemngai takin hrilh lâwkna thu sawi reng ula, ṭawng dangtea thusawi pawh khap hek suh u.
40 Amaherawhchu, engkim mawi tak leh felfai taka tih ni rawh se.
Footnote-te
^ A nih loh leh, “thlamuanna.”
^ Ni thei dang leh chu, “tu pawhin a hriat loh chuan a hre lo zawm zêl ang.”
