Korinth Khuaa Mite Hnêna Lehkhathawn Pakhatna 15:1-58
15 Unaute u, chanchin ṭha in hnêna ka hrilh, nangni pawhin in pawm leh nghet taka in vawn kha ka hriat nawntîr che u a ni.
2 Chanchin ṭha in hnêna ka hrilh che u kha nghet taka in vawn hian chhandamin in awm a, in vawn ngheh reng loh erawh chuan ringtu in nihna chu eng mah a ni lo vang.
3 Ka thil hrilh hmasak ber che u zînga mi kha kei pawhin ka dawn ve bawk a ni, Krista chu Pathian Lehkha Thu ang zêlin kan sualte avângin a thi a,
4 phûmin a awm a, Pathian Lehkha Thu ang zêlin ni thum nîah kaihthawhin a awm a;
5 tin, Kipha* hnênah a inlâr a, Sâwm Pahnihte hnênah a inlâr leh a.
6 A hnuah, ṭum khatah unau 500 aia tam hnênah a inlâr leh a, an zînga ṭhenkhat chu thihnaah muhîl tawh mah se, a tam zâwk chu kan hnênah an la awm reng a ni.
7 Chumi hnuah, Jakoba hnênah a inlâr a; tin, tirhkoh zawng zawngte hnênah a inlâr leh a.
8 A tâwp berah chuan, a hun lova piang ang ka hnênah pawh a inlâr a ni.
9 Tirhkohte zînga tê ber ka ni a, Pathian kohhran ka tihduhdah ṭhin avânga tirhkohva vuah tlâk loh ka ni.
10 Nimahsela, Pathian khawngaihna nasa tak avângin tirhkohva vuah ka ni a. Pathianin ka chunga a khawngaihna nasa tak a lantîr chu a thlâwn lo va, tirhkoh dang zawng zawng aiin ka thawkrim zâwk a ni; nimahsela, a thawktu chu keimah ka ni lo, ka chunga lantîr Pathian khawngaihna nasa takin a thawk zâwk a ni.
11 Chu thu hriltu chu kei emaw, mi dang emaw pawh ni se, kan vaiin thuchah inang kan sawi a, chu thuchah chu nangni pawhin in ring a ni.
12 Thihna ata Krista kaihthawh a nih thu hrilh a nih si chuan, engvângin nge in zînga ṭhenkhatin mitthi thawhlehna a awm lo tia an sawi?
13 Mitthi thawhlehna a awm si loh chuan, Krista pawh kha kaihthawhin a awm lo vang.
14 Krista kha kaihthawha a awm loh chuan, kan thu hril hi a thlâwn mai a ni ang a, in rinna pawh a thlâwn mai a ni bawk ang.
15 Chu bâkah, mitthite kaihthawh an nih tak tak dâwn loh chuan, Pathianin Krista pawh kha a kai tho lo tihna a ni ang a. Tin, Pathianin Krista a kai tho tia kan sawi hian, Pathian chungchângah dâwt thu kan sawi tihna a ni ang.
16 Mitthite kaihthawh an nih dâwn loh chuan, Krista pawh kha kaihthawh a ni lo vang.
17 Chu bâkah, Krista kha kaihthawh a nih si loh chuan, in rinna chu eng mah lo mai a ni ang a, in sualnaah in la awm reng ang.
18 Tin, Krista nêna inpumkhat thihnaa muhîl tate kha chatuanin an boral tihna a ni bawk ang.
19 Tûn dam chhûng chauhva Krista chunga beiseina nei kan nih chuan, mi zawng zawng aia khawngaihthlâk kan ni ang.
20 Nimahsela, thihnaa muhîl tawhte zînga rah hmasa ber ni tûrin, tûnah Krista chu thihna ata kaihthawh a ni tawh.
21 Mi pakhat avângin thihna a lo awm a, mi pakhat avâng vêkin mitthi thawhlehna pawh a lo awm si a.
22 Adama thiltih avânga mi zawng zawng an thi ṭhîn ang hian, Krista thiltih avângin mi zawng zawng tihnunin an awm bawk ang.
23 Nimahsela, mi tin an hun ṭheuh zêlah kaihthawh an ni ang: Krista chu a hmasa ber a ni a, a hnuah Krista tate, anni chu Krista lo awm lehna chhûnga kaihthawh an ni ang.
24 Chumi hnuah chuan tâwpna a lo thleng ang; tichuan, sawrkâr zawng zawng leh thuneihna zawng zawng leh thiltihtheihna zawng zawng eng mah lova a chantîr hnuah, a Pathian leh Pa hnênah Lalram chu a pe ang.
25 A hmêlma zawng zawngte a ke hnuaia Pathianin a dah hma loh chu ani chuan lal angin ro a rêl tûr a ni si a.
26 Tin, hmêlma hnuhnûng ber tihbova awm tûr chu thihna hi a ni.
27 Pathianin “a ke hnuaiah engkim a dah” si a. Nimahsela, ‘a hnuaiah engkim a dah,’ tia a sawi hian, a hnuaia engkim Dahtu chu a tel ve lo tih a chiang reng a ni.
28 A hnuaia engkim daha a awm hunah chuan, Fapa ngei pawh chu a hnuaia engkim Dahtu hnuaiah chuan a awm bawk ang, Pathian chu mi tin chunga rorêltu awm chhun a nih theihna tûrin.
29 Chuti a nih chuan, thihna thlentu baptisma changtute chungchâng chu engtin nge ni ta ang? Mitthite kaihthawh an nih dâwn si loh chuan, engvângin nge chutiang baptisma chu an chan?
30 Engvângin nge keini pawh dârkâr tin* dinhmun hlauhawma kan din?
31 Nî tin thihna ka hmachhawn ṭhîn. Ka unaute u, chu chu kan Lalpa Krista Isuaa in chungchânga inchhuanna ka neih ang bawk hian a chiang a ni.
32 Ephesi khuaah khân, mi dangte ang bawka* ram sakawlhte kha bei ka nih chuan ka tân ṭhatna eng nge awm ang? Mitthite kaihthawha an awm dâwn loh chuan, “I eiin i in ang u, naktûkah kan thi dâwn si a.”
33 Bumin awm suh u. Ṭhian sualte chuan nungchang ṭha an tichhe ṭhîn.
34 Harh fîm ula, thil dik ti rawh u, in zînga ṭhenkhatin Pathian hriatna rêng an nei si lo. In zahna tûrin ka sawi a nih hi.
35 Nimahsela, tu emawin: “Mitthite chu eng anga kaihthawh nge an nih dâwn? Eng taksa puin nge an lo thawh leh ang?” a ti mai thei.
36 Nang mi â! Nangmah ngeiin chî i tuh pawh a thih hmasak phawt loh chuan a ṭo ngai hlei nêm.
37 I chi tuh chu buh chî emaw, thil dang chî emaw pawh ni se, a taksa lo awm tûr i tuh lo va, a fang mai i tuh zâwk a ni.
38 Amaherawhchu, Pathianin ama duh ang zêlin taksa a pe ṭhîn a, chîte chu anmahni taksa tûr ṭheuh a pe ṭhîn.
39 Tisa zawng zawng hi a inang vek lo, mihring tisa a dang a, ran tisa a dang a, sava tisa a dang a, sangha tisa pawh a dang a ni.
40 Tin, vân taksate leh lei taksate a awm bawk a; nimahsela, vân taksate ropuina chu a dang a, lei taksate ropuina pawh a dang a ni.
41 Ni ropuina a dang a, thla ropuina a dang a, arsite ropuina pawh a dang a ni; tin, arsite chu an ropui dân a inang lo ṭheuh bawk.
42 Mitthi thawhlehna pawh chutiang bawk chu a ni. Ṭawih theia tuhin a awm a, ṭawih thei lova kaihthawhin a awm.
43 Chawimawi lohva tuhin a awm a, ropui taka kaihthawhin a awm. Chak lova tuhin a awm a, thiltithei taka kaihthawhin a awm.
44 Mihring taksaa tuhin a awm a, thlarau taksaa kaihthawhin a awm. Mihring taksa a awm chuan thlarau taksa pawh a awm ang.
45 Chuvângin: “Mihring hmasa ber Adama chu mi nung a lo ni a,” tih ziak a ni. Adama hnuhnûng zâwk erawh chu nunna petu thlarau a lo ni.
46 Nimahsela, thlarau taksa chu a awm hmasa lo. Mihring taksa a awm hmasa zâwk a, chumi hnuah thlarau taksa chu a awm a ni.
47 Mihring hmasa ber chu leia mi, vaivuta siam a ni a; mihring pahnihna chu vâna mi a ni.
48 Vaivuta siamte chu vaivuta siama ang kha an ni a; tin, vâna mite chu vâna mi ang kha an ni.
49 Vaivuta siama anpui kan nih avângin, vâna mi anpui kan ni bawk ang.
50 Nimahsela, unaute u, hei hi ka hrilh a che u, tisa leh thisenin Pathian Ram a luah thei lo va, ṭawih theiin ṭawih thei lo pawh a luah thei hek lo.
51 Ngai teh u! Thurûk thianghlim ka hrilh a che u: Kan vaiin thihnaah kan muhîl vek lo vang; amaherawhchu, tihdanglamin kan awm vek ang,
52 chu chu rei lo te chhûng, mit khap kâr lekin, tawtawrâwt hnuhnûng ber ham a nih hunah a thleng ang. Tawtawrâwt a rîk a, mitthite ṭawih thei lova kaihthawh an nih hunah, keini pawh tihdanglamin kan awm ang.
53 He taksa ṭawih thei hi ṭawih thei lovah a inthlâk ang a, he taksa thi thei pawh hi thi thei lovah a inthlâk ang.
54 Tin, he ṭawih thei hi ṭawih thei lova a inthlâk hunah leh he thi thei pawh hi thi thei lova a inthlâk hunah chuan, Pathian Lehkha Thuin: “Thihna chu chatuan atân a lem hlen ta,” tia a sawi hi a thleng tawh ang.
55 “Aw, thihna, khawiah nge i hnehna chu? Aw, thihna, khawiah nge i tûr chu?”
56 Thihna thlentu tûr chu sual a ni a, sual thiltihtheihna chu Dân a ni.*
57 Nimahsela, kan Lalpa Isua Krista zâra hnehna min petu Pathian hnênah lâwmthu awm rawh se!
58 Chuvângin, ka unau duh takte u, nghet takin, tihchêt rual lohvin awm ula, Lalpa tâna in thawhrimna chu a thlâwn dâwn lo tih hriain, Lalpa hna thawkin buai reng rawh u.
Footnote-te
^ Petera tia koh a ni bawk.
^ A nih loh leh, “eng lai pawha.”
^ Ni thei dang leh chu, “mihring thlîrna aṭanga.”
^ A nih loh leh, “Dân chuan sual hnênah a thiltihtheihna a pe.”
