Korinth Khuaa Mite Hnêna Lehkhathawn Pakhatna 16:1-24
16 Tin, mi thianghlimte tâna thawhlâwm chungchâng thu-ah chuan Galatia rama kohhrante hnêna kaihhruaina ka pêk ang kha in zâwm dâwn nia.
2 Ka lo kal huna thawhlâwm khawn a ngaih lohna tûrin, chawlhkâr tina ni hmasa berah mi tinin an neih ang tâwk zêlin thawhlâwm tûr dah hrang ṭheuh rawh se.
3 Nimahsela, ka rawn thlen hunah in lehkhathawna in târ lan mi rin tlâkte chu, phal taka in thawhlâwm thawhte keng tûrin Jerusalemah ka tîr ang.
4 Ka kal vena âwm a nih phei chuan an rualin ka kal ve ang.
5 Nimahsela, Makedonia ram ka fan chhuah hunah in hnênah ka lo kal ang, Makedonia ram fan chhuah ka tum si a.
6 In hnênah hun eng emaw chen ka châm ang a, thlasik chhûng zawng ka châm emaw pawh a ni thei, ka kalna tûr apianga nangni’n min thlah theih nân.
7 Tûna kal pah maia hmuh che u chu ka duh lo, Jehova’n rem a tih chuan in hnênah hun eng emaw chen châm ka inbeisei a ni.
8 Amaherawhchu, Pentikost Kût thlengin Ephesi khuaah hian ka châm ang.
9 Thil tam tak ka tih theihna tûrin ka tân kawngka zau tak a inhawng a ni; nimahsela, dodâltu an tam hle.
10 Timothea a lo thlen chuan lo lâwm ula, in hnênah inthlahrung lova a awm theihna tûrin lo thawhpui ang che u, keimah ang bawka Jehova hna thawktu a ni si a.
11 Chuvângin, ani chu tu man ngainêp suh se. Ka hnêna a lo kal theih nân thlamuang takin kaltîr ang che u, unaute nên kan lo nghâk reng si a.
12 Kan unaupa Apollova chungchângah chuan unaute ruala in hnêna lo kal tûrin nasa takin ka ngên a ni. Tûnah chuan lo kal a tum rih lo va; nimahsela, hun remchâng a neih hunah a lo kal ang.
13 Harhvâng takin awm ula, rinnaah ding nghet ula, chak tak leh huai takin awm rawh u.
14 In thiltih apiang chu hmangaihna nêna tih ni rawh se.
15 Stephana chhûngte chu Akaia rama rah hmasa berte an ni tih leh mi thianghlimte rawngbâwl tûrin an inpe tih in hria e. Chuvângin, unaute u,
16 chutiang mite leh a thlâwptu zawng zawngte leh rim taka thawktu zawng zawngte hnuaia intulût chhunzawm zêl tûrin ka ngên a che u.
17 Tin, Stephana te, Phortunata te, Akaika te an lo kal hi ka lâwm hle a ni, in aiawha nasa taka min ṭanpui avângin.
18 Anni hian ka rilru* leh in rilru an tiharh si a. Chuvângin, hetiang mite hi ngaihlu rawh u.
19 Asia rama kohhranhote’n chibai an bûk a che u. Akuila leh Priskilli te leh an ina kohhran inkhâwm ṭhînte chuan Lalpaah thinlung takin chibai an bûk a che u.
20 Unaute zawng zawngin chibai an bûk a che u. Fawh thianghlimin chibai inbûk tawn rawh u.
21 Hei hi kei Paula’n ka kut ngeia chibai ka bûkna che u a ni.
22 Tu pawhin Lalpa a hmangaih loh chuan ânchhe dawngin awm rawh se. Aw, kan Lalpa, lo kal ang che!
23 Lalpa Isua khawngaihna nasa tak chu in hnênah awm rawh se.
24 Krista Isua nêna inpumkhata awm in vaia chungah ka hmangaihna awm rawh se.
Footnote-te
^ Grik ṭawnga pneu’ma.
