Korinth Khuaa Mite Hnêna Lehkhathawn Pakhatna 2:1-16
2 Tichuan, unaute u, Pathian thurûk thianghlim puang tûra in hnêna ka lo kal khân, thusawi thiam bîkna emaw, finna thûk bîk emaw nêna lo kal ka ni lo va.
2 In zînga ka awm chhûngin, Isua Krista chanchin leh bana tihhlum a nih thu chauh lo chu eng mah hriat ka tum loh kha.
3 Chak lo leh hlau leh nasa taka khûr chungin in hnênah ka lo kal a ni.
4 Ka thusawi leh thu hrilhte chu mihring finna thu mi hneh thei taktea sawi lovin, thlarau leh thiltihtheihna târ lang zâwngin ka sawi zâwk a ni.
5 In rinna chu mihring finna ni lo va, Pathian thiltihtheihnaa a innghah zâwk theihna tûrin.
6 Tin, puitlingte zîngah finna thu kan sawi a ni, chu chu he khawvêl* finna a ni lo va, boral mai tûr he khawvêl* rorêltute finna lah a ni hek lo.
7 Amaherawhchu, Pathian finna, thurûk thianghlima inthup chu kan sawi a ni, chu chu kan ropuina tûra khawvêl* awm hmaa Pathianin tih a lo tum tawh chu a ni.
8 Chu finna chu he khâwvêl* rorêltu tu mahin an hre lo, hria sela chuan ropuina Lalpa kha an tihlum* lo tûr.
9 “Mitin a hmuh ngai loh, bengin a hriat ngai loh, mihring thinlung pawha lût ngai lo, Pathianin amah hmangaihtute tâna a buatsaih chu,” tih ziak ang khân.
10 Chûng thilte chu Pathianin a thlarau hmangin kan hnênah a puang chhuak a, thlarau chuan thil zawng zawng a chhui chhuak ṭhîn, Pathian thu ril thlengin.
11 Tuin nge mi dang ngaihtuahnate hria? A ngaihtuahnate chu a thinlung* chauhvin a hria a ni. Chutiang bawkin, Pathian ngaihtuahnate chu Pathian thlarau chauh lo chuan tu man an hre thei lo.
12 Tûnah chuan khawvêl thlarau ni lovin, Pathian hnên aṭanga lo kal thlarau kan dawng a ni, Pathianin hmangaihna nei taka min pêk thilte kan hriat theihna tûrin.
13 Thlarau lam thilte chu thlarau lam thutea kan hrilhfiah ṭhîn angin, hêng thil kan sawite pawh hi mihring finna zirtîrna thute hmang lovin, thlarau zirtîrna thute hmangin kan sawi zâwk a ni.
14 Tisa mi chuan Pathian thlarau lam thilte a pawm* lo, a tân chuan thil âtthlâk mai a ni si a, chûng thilte chu thlarau thianghlim ṭanpuinaa hriatthiam tûr a nih avângin a hre thiam* thei lo a ni.
15 Nimahsela, thlarau mi chuan engkim a hre thiam* a, ani erawh chu tu man an hre thiam si lo.
16 “Jehova zirtîr tûrin tuin nge a rilru hre tawh?” tih a ni si a. Keini erawh chuan Krista rilru kan pu a ni.
Footnote-te
^ A nih loh leh, “he kalhmang.” Thu Har Hrilfiahna en rawh.
^ A nih loh leh, “he kalhmang.” Thu Har Hrilfiahna en rawh.
^ A nih loh leh, “he kalhmang.” Thu Har Hrilhfiahna en rawh.
^ A nih loh leh, “he kalhmang.” Thu Har Hrilfiahna en rawh.
^ A nih loh leh, “bana tihlum.”
^ A nih loh leh, “rilru.” A ngial a ngan chuan, “thlarau.”
^ A nih loh leh, “lâwm.”
^ A nih loh leh, “bih chiang.”
^ A nih loh leh, “bih chiang.”
