Korinth Khuaa Mite Hnêna Lehkhathawn Pakhatna 3:1-23
3 Unaute u, thlarau mite hnêna thu sawi angin in hnênah thu ka sawi thei lo. Tisa mi, Kristaa nausênte hnêna sawi angin ka sawi zâwk a ni.
2 Chaw tak in la ei theih loh avângin, chaw tak ni lovin hnute tuiin ka châwm ṭhin che u kha. Tûn thleng pawhin in la ei thei si lo,
3 tisa mi in la ni reng si a. In zîngah îtsîkna leh inhnialna a awm chhûng chuan, tisa mi leh khawvêl mite anga awm in ni lo vem ni?
4 Mi pakhatin, “Paula pâwl ka ni,” a tih a, mi dangin, “Kei chu Apollova pâwl ka ni,” a tih chhûng chuan, he khawvêl mite ang hian thil in ti tihna a ni lo vem ni?
5 Apollova chu tu nge a nih? Paula pawh chu tu nge a nih? Ringtu in rawn nih theihna tûra nangmahni ṭanpuitu, Lalpa’n hna min pêk anga thawktu chhiahhlawhte mai kan ni.
6 Keiin ka phun a, Apollova’n tuiin a châwm a; nimahsela, Pathianin a ṭhantîr zêl a ni.
7 A ṭhantîrtu Pathian lo chu a phuntu leh tuia châwmtu chu eng mah an ni lo.
8 Tin, a phuntu leh tuia châwmtu chu pakhat an ni; nimahsela, mi tinin an hnathawh ang zêlin lâwmman an hmu ang.
9 Keini zawng Pathian hnathawhpuitute kan ni si a. Nangni chu Pathian thlawhhma in ni a, Pathian in sak in ni.
10 Pathian khawngaihna nasa tak pêk ka nih ang zêlin, in sa hotu thiam tak* angin lungphûm ka phûm a, chumi chungah chuan mi dangin in an rawn sa a; amaherawhchu, mi tin a chunga an sak dânah fîmkhur ṭheuh rawh se.
11 Tu mahin lungphûm phûm tawh sa Isua Krista lo chu lungphûm dang an phûm thei si lo.
12 Tin, tu pawhin lungphûm chungah chuan rangkachakin emaw, tangkaruain emaw, lung man tamin emaw, thingin emaw, hnimin emaw, buh pâwlin emaw in sa sela,
13 fiahna nîah chuan mi tin hnathawh chu târ lan a ni ang a, chumi nîah chuan meiin mi tin hnathawh chu a tilang dâwn a ni.
14 Chu lungphûm chunga tu in sak pawh a kan loh chuan, chu mi chuan lâwmman a dawng ang.
15 Tu hnathawh pawh a kan chuan, chu mi chuan nasa takin a chân ang a, amah tak erawh chu chhanhimin a awm ang. Nimahsela, meia kal tlang ang mai a ni ang.
16 Pathian biak in in ni tih leh Pathian thlarau nangmahniah a awm tih in hre lo vem ni?
17 Tu pawhin Pathian biak in a tihchhiat chuan, Pathianin ani chu a tichhe ve ang; Pathian biak in chu a thianghlim si a, chu biak in chu in ni e.
18 Tu mah mahni inbum suh se. In zînga tu pawh he khawvêlah* hian finga a inngaih chuan, a lo fin theih nân lo â zâwk rawh se.
19 He khawvêl finna hi Pathian ngaihah chuan âtna a ni si a: “Ani chuan mi fingte chu anmahni fin vervêknain a âwk ṭhîn,” tih ziak ang khân.
20 “Jehova chuan mi fingte ngaihtuahnate chu eng mah lo mai a ni tih a hria,” tih ziak a ni bawk.
21 Chuvângin, tu man mihringte chhuang suh se; thil zawng zawng in ta vek a ni si a.
22 Paula emaw, Apollova emaw, Kipha emaw, khawvêl emaw, nunna emaw, thihna emaw, thil awm mêkte emaw, thil lo la awm tûrte emaw a vaiin in ta vek a ni.
23 Nangni erawh chu Krista ta in ni a; Krista pawh chu Pathian ta a ni.
Footnote-te
^ A nih loh leh, “hnathawk hotu fing tak.”
^ A nih loh leh, “he kalhmang.” Thu Har Hrilfiahna en rawh.
