Korinth Khuaa Mite Hnêna Lehkhathawn Pakhatna 4:1-21
4 Keini hi mite’n Krista hnuaia thawk chhiahhlawhte ang leh Pathian thurûk thianghlim enkawltute anga min hmuh kan duh a ni.
2 Tin, enkawltute chu rinawm tûra beisei an ni.
3 Nangni emaw, mihring rorêlnain emaw min fiahna chu engah mah ka ngai lo. A nihna takah chuan, mahni pawh ka inen fiah ngai lo.
4 Thil dik lo ka tih rêng ka hre si lo va. Nimahsela, chu chuan mi fel ka ni tih a finfiah lo; min fiahtu chu Jehova a ni.
5 Chutichuan, a hun a thlen hma, Lalpa lo kal leh hma loh chu tu mah sawisêl suh u. Ani chuan thim thurûkte chu êngah a rawn tilang ang a, thinlunga thiltumte pawh a hriattîr ang; tichuan, mi tinin Pathian hnên aṭanga fakna an dawn tûr chu an dawng ṭheuh vang.
6 Tin, unaute u, kan hnên aṭanga in dawn: “Pathian Lehkha Thua inziakte pêlin kal suh u,” tih dân hi in zir theihna tûrin, chûng thute chu in ṭhatna tûrin keimah leh Apollova entîrnaa hmangin ka sawi a ni, chapova mi duhsak bîk in neih lohna tûrin.
7 Mi dang aia danglamah tuin nge siam che? I dawn loh chu eng nge i neih? I dawn a nih si chuan, engvângin nge i dawn ni lo ang maia i uanpui?
8 In duh apiang in nei ta a ni maw? In lo hausa ta a ni maw? Kan tel lovin lalte angin ro in rêl ta a ni maw? Lalte angin rorêl ula ka duh tak zet a ni, lalte anga in ruala ro kan rêl ve theih nân.
9 Khawvêl leh vântirhkohte leh mihringte ennawm atâna ennawm chhuahna hmuna pho chhuaha kan awm avâng hian, keini tirhkohte hi thi tûra thiam loh chantîr angin a hnuhnûng berah Pathianin min pho chhuak niin ka hre si a.
10 Keini zawng Krista avângin mi â kan ni a, nangni erawh chu Kristaah chuan mi fing in ni; kan chak lo va, nangni erawh chu in chak a; hmuhsitin kan awm, nangni erawh chawimawiin in awm thung.
11 Tûn dârkâr thleng hian rilṭâm te, tuihâl te, thawmhnaw hâk tûr mumal nei lo te,* vuak tuar te,* chênna in nei lo te leh,
12 mahni kuta rim taka thawkin kan la awm reng a ni. Hmuhsita kan awmin mal kan sâwm a; tihduhdah kan nihin chhel takin kan tuar a;
13 sawichhiat kan nihin zaidam takin kan chhâng a;* tûn thleng hian khawvêl mite hnâwl* leh vântlâng tâna bawlhhlawh ang leka ngaih kan ni.
14 Hêng thute hi in zahna tûra ziak ka ni lo va, ka fa duh takte anga zilhhauna tûr che uin ka ziak zâwk a ni.
15 Kristaah chuan vêngtu* 10,000 nei mah ula, pa erawh tam tak in nei si lo; Kristaah chuan chanchin ṭha avângin in tân pa ka lo ni.
16 Chuvângin, min entawn tûrin ka ngên a che u.
17 Chumi avâng chuan, Timothea, Lalpaa ka fa duh tak leh rinawm tak hi in hnênah ka rawn tîr a ni. Ani hian Krista Isua rawng ka bâwlnaa ka thil tih dânte* leh hmun tina kohhran zawng zawnga ka thu zirtîrte kha a hriat nawntîr ang che u.
18 In hnêna ka lo kal tawh loh ringin in zînga ṭhenkhat an lo chapo ta a.
19 Jehova’n rem a tih chuan ka lo kal thuai ang. Chûng mi chapote chu an thusawi ngaihthla tûr ni lovin, Pathian thiltihtheihna an neih leh neih loh hre tûr zâwkin hmuh ka duh a ni.
20 Pathian Ram chu thusawi ni lovin, Pathian thiltihtheihnaa lantîr a ni zâwk si a.
21 Eng nge in duh zâwk? Vuakna tiang nêna in hnêna ka lo kal nge in duh a, hmangaihna leh thuhnuairawlhna nêna ka lo kal?
Footnote-te
^ A ngial a ngan chuan, “saruak.”
^ A nih loh leh, “hnek.”
^ A ngial a ngan chuan, “kan ngên a.”
^ A nih loh leh, “bawlhhlawh.”
^ A nih loh leh, “zirtîrtute.”
^ A ngial a ngan chuan, “ka kawngte.”
