Korinth Khuaa Mite Hnêna Lehkhathawn Pakhatna 5:1-13
5 Tin, in zîngah nungchang bawlhhlawhnaa* inhmang mi pakhat a awm thu hrilh ka ni a, ani chu a pa nupui nên an chêng dûn a ni. Chutiang thil chu hnam dangte zîngah pawh hmuh a ni ngai lo.
2 In la uanpui zâwk mah a ni maw? Chutianga titu chu in zîng aṭanga chhuahtîr a nih theih nân in lungngai tûr a ni zâwk dâwn lâwm ni?
3 Ka taksa in zîngah awm lo mah se, ka rilruah* in awm reng a, in zînga awm ang maiin chu thil titu chu a chungchâng ka rêl fel tawh a ni.
4 Kan Lalpa Isua hminga in inkhâwm hunah, in zîngah ka rilru* leh kan Lalpa Isua thiltihtheihna a awm tih hria ang che u.
5 Kohhrana nghawng ṭha lo a neihte tihbo a nih theih nân, chu mi chu Setana hnênah in pe tûr a ni; kohhran thlarau lam dinhmun chu Lalpa nîa vawn ṭhata a awm theihna tûrin.
6 In uang ṭhîn hi a ṭha lo ve. Dawidim tlêm têin chhang hlâwm chu a pumin a fan chhuak ṭhîn tih in hre lo vem ni?
7 Chhang hlâwm thar in nih theihna tûrin dawidim hlui chu thian fai rawh u, nangmahniah dawidim a awm tûr a ni si lo. Kan Kalhlên Kût berâm no Krista ngei chu hlan a ni tawh si a.
8 Chutichuan, dawidim hlui tel lovin, fel lohna leh suahsualna dawidim tel hek lovin, takna leh thutak chhang dawidim telh loh nên kût i hmang ang u.
9 Ka lehkhathawnah khân, nungchang bawlhhlawhte* kâwm lo tûrin in hnênah ka ziah kha,
10 he khawvêla nungchang bawlhhlawh te,* mi duhâm te, mi thil neih chhuhsaktu te leh, milem betute kawm miah loh tûr ka tihna a ni lo. Chutiang ni sela chuan, khawvêl aṭanga in chhuah a ngai ngei ang.
11 Nimahsela, unau hming pu sia nungchang bawlhhlawh te,* mi duhâm te, milem betu te, mi dang sawichhiat chîng te,* zu ruih chîng te leh, mi thil neih chhuhsak chîngte chu kâwm lo tûrin in hnênah ka ziak zâwk a ni; chutiang mi hnênah chuan ei pawh ei suh u.
12 Engvângin nge pâwn lama mite chu ro ka rêlsak ang? Chhûng lama mite chu dik takin ro in rêlsak tûr a ni,
13 pâwn lama mite chu Pathian rorêlsak tûr an ni si a. “Mi sual chu in zîng aṭangin chhuahtîr rawh u.”
Footnote-te
^ Grik ṭawnga por·neiʹa. Thu Har Hrilhfiahna en rawh.
^ A ngial a ngan chuan, “thlarau.”
^ A ngial a ngan chuan, “thlarau.”
^ Thu Har Hrilhfiahnaa, “Nungchang bawlhhlawhna,” tih en rawh.
^ Thu Har Hrilhfiahnaa, “Nungchang bawlhhlawhna,” tih en rawh.
^ Thu Har Hrilhfiahnaa, “Nungchang bawlhhlawhna,” tih en rawh.
^ A nih loh leh, “mi ânkhum chîng.”
