Korinth Khuaa Mite Hnêna Lehkhathawn Pakhatna 6:1-20
6 In zînga tu pawhin mi dang nêna thubuai in neih hunah mi thianghlimte hmaa thlen lovin, rorêlnaa mi fel lote hmaah in thlen ngam dâwn em ni?
2 A nih leh, mi thianghlimte chuan khawvêl ro an la rêlsak dâwn tih in hre lo vem ni? Khawvêl rorêlsaktu tûrte ni siin, thil tê berte pawh in rêl fel thei lova maw?
3 Vântirhkohte ro kan la rêlsak dâwn tih in hre lo vem ni? Chuti a nih chuan, tûn dam chhûnga buainate hi kan chingfel thei ngei tûr a ni.
4 A nih chuan, tûn dam chhûnga buaina chinfel tûr in neihin, engvângin nge kohhranin a pawm loh mite chu a chingfel tûra in thlan?
5 In zahna tûrin ka sawi a ni. In zîngah a unaute inkâra rorêl thei tûr mi fing pakhat tal an awm na nge?
6 Chutiang ni lovin, mahni unau hêk tûrin rorêlna inah in kal zâwk a, chu pawh ring lotute hmaah lehnghâl!
7 A nihna takah chuan, in inkhin tawn hian in tlâwm dêr tawh tihna a ni. I unauvin i chunga thil dik lo a tih chu engvângin nge i tawrh zâwk mai loh? Engvângin nge buma i awm zâwk mai loh?
8 Chutih ahnêkin, in unaute ngei chungah thil dik lo tiin in bum zâwk si a!
9 A nih leh, mi fel lote’n Pathian ram an luah lo vang tih in hre lo vem ni? Bumin awm suh u. Nungchang bawlhhlawh te,* milem betu te, uirê te, mahni mipatpui mutpui chîng te, mawngkawhur te,
10 rûk rûk hmang te, mi duhâm te, zu ruih hmang te, mi dang sawichhiat chîng te leh,* mi thil neih chhuhsak chîngte’n Pathian Ram an luah lo vang.
11 In zînga ṭhenkhat chutiang mi chu in nih ṭhin kha. Nimahsela, kan Lalpa Isua Krista hmingah leh kan Pathian thlarauvah chuan tlenfai in ni tawh a; tihthianghlim in ni tawh a; mi fela puan in ni tawh e.
12 Thil engkim tih ka tân a thiang a; nimahsela, thil engkim tih a ṭha kher lo. Thil engkim tih ka tân a thiang a; nimahsela, eng thil mah ka inthununtîr lo vang.
13 Chaw hi pumpui tân a ni a, pumpui pawh chaw tân a ni; nimahsela, Pathianin eng mah lovah a chantîr ve ve ang. Taksa hi nungchang bawlhhlawhna* atân a ni lo va, Lalpa tân a ni zâwk; tin, Lalpa pawh chu taksa tân a ni.
14 Pathianin Lalpa chu a kai tho va, keini pawh a thiltihtheihnain thihna ata min kai tho ve ang.
15 In taksa chu Krista pêngte a ni tih in hre lo vem ni? Krista pêngte chu lain nawhchizuarah ka zawm dâwn em ni? Ni lul lo ve!
16 Tu pawh nawhchizuar zawmtu chu amah nên taksa pumkhat an ni tih in hre lo vem ni? Pathianin: “Pahnih chu tisa pumkhat an lo ni tawh ang,” a ti si a.
17 Lalpa zawmtu apiangte erawh chu amah nên thlarauvah pumkhat an ni.
18 Nungchang bawlhhlawhna* hi tlânsan rawh u! Miin thil sual dang a tih rêng rêng chu a taksa pâwn lama a tih a ni a, nungchang bawlhhlawhnaa inhmang ṭhîn erawh chuan ama taksa chungah thil sual a ti a ni.
19 In taksa hi Pathian hnên aṭanga in dawn, nangmahnia awm thlarau thianghlim in a ni tih in hre lo vem ni? Nangmahni ta pawh in ni lo,
20 mana lei in ni tawh si a. Chuvângin, in taksain Pathian chawimawi rawh u.
Footnote-te
^ Thu Har Hrilhfiahnaa, “Nungchang bawlhhlawhna,” tih en rawh.
^ A nih loh leh, “mi ânkhum chîng.”
^ Grik ṭawnga por·neiʹa. Thu Har Hrilhfiahna en rawh.
^ Grik ṭawnga por·neiʹa. Thu Har Hrilhfiahna en rawh.
