Korinth Khuaa Mite Hnêna Lehkhathawn Pakhatna 7:1-40
7 Tin, in thuziak chungchângah kha chuan, mipa tân hmeichhia khawih loh* a ṭha zâwk a ni.
2 Amaherawhchu, nungchang bawlhhlawhna* a hluar avângin, mipain nupui bîk nei ṭheuh sela, hmeichhia pawhin pasal bîk nei ṭheuh rawh se.
3 Pasal chuan a nupui mamawh phuhrûksak sela, nupui pawhin a pasal chungah chutiang chuan ti ve rawh se.
4 Nupui chuan ama taksa chungah thu a nei lo va, a pasal chuan thu a nei zâwk a ni. Chutiang bawkin, pasal chuan ama taksa chungah thu a nei lo va, a nupui chuan thu a nei zâwk a ni.
5 Ṭawngṭai tûra hun in pêk theih nân, hun eng emawti chhûng atâna rem in ti dûn a nih chauh loh chuan in chan tûr in lâksak suh u. Chumi hnuah chuan, insûmtheihna in tlâkchham avânga Setana’n a thlêm lohna tûr che uin, in awm dân pângngaiin awm leh ang che u.
6 Amaherawhchu, thupêk ang ni lovin, phalna anga sawi ka ni zâwk e.
7 Nimahsela, mi zawng zawng keimah ang hian awm se ka ti hle mai. Amaherawhchu, Pathianin mi tin hnênah thilthlâwnpêk a pe ṭheuh va; chuvângin, nupui pasal nei leh nei lote an awm a ni.
8 Tin, nupui pasal nei lote leh hmeithaite tân chuan heti hian ka ti a ni, keimah angin awm sela an tân a ṭha zâwk ang.
9 Insûmtheihna an neih loh erawh chuan innei rawh se, châkna nasa tak thununa awm aiin inneih a ṭha zâwk si a.
10 Innei tawhte hnênah chuan kaihhruainate ka pe a ni, keima pêk erawh a ni lo va, Lalpa pêk zâwk a ni; nupui chu a pasal lak aṭangin a awm hrang tûr a ni lo.
11 A awm hrang a nih erawh chuan pasal nei lovin awm reng rawh se, a nih loh chuan a pasal nên inrem leh rawh se; tin, pasal pawhin a nupui chhuahsan suh se.
12 Mi dang hnênah erawh chuan Lalpa ni lovin keiman ka sawi a ni: Unaupa tu pawhin ring lotu nupui a neih a, a nupui chuan a hnêna awm reng a remtih chuan ani chu chhuahsan suh se;
13 hmeichhiain ring lotu pasal a neih a, a pasalin a hnêna awm reng a remtih chuan a pasal chu chhuahsan suh se.
14 Ring lotu pasal chu a nupui avângin tihthianghlim a ni tawh a, ring lotu nupui pawh unaupa avângin tihthianghlim a ni tawh; chuti ni lo se, in fate chu an thianghlim lo vang, tûnah erawh chuan an thianghlim a ni.
15 Amaherawhchu, ring lotu zâwkin awm hran a thlan chuan awm hrang mai rawh se; chutiang dinhmunah chuan unaupa emaw, unaunu emaw chu phuarin a awm lo. Nimahsela, Pathian chuan inrem taka awm tûrin a ko che u a ni.
16 Nangni nupuite u, in pasalte hnêna in awm reng chuan in chhandam mai thei asin. Tin, nangni pasalte u, in nupuite hnêna in awm reng chuan in chhandam mai thei asin.
17 Eng pawh ni se, mi tinte chu Jehova’n chanpual a pêk ang ṭheuhvin, a kohna nêna inmilin nung rawh se. Kohhran zawng zawng pawh he kaihhruaina hi ka pe a ni.
18 Serh a tan hnua koh an awm em? Chutiang chuan awm reng rawh se. Serh a tan hmaa koh an awm em? A serh tantîr suh se.
19 Serhtan nih chu a pawimawh lo va, serhtan loh nih pawh a pawimawh hek lo; thil pawimawh chu Pathian thupêkte zawm hi a ni.
20 Mi tin koh an nih laia an awm dân ang khân awm reng rawh se.
21 Bâwih i nih laia koh i ni em? Pawi ti duh suh; zalen theihna hun remchâng i neih erawh chuan bawh pelh suh ang che.
22 Tu pawh bâwih a nih laia Lalpaa kohva awm chu Lalpaa mi zalên a lo ni a; chutiang bawkin, tu pawh mi zalên a nih laia kohva awm chu Krista bâwih a lo ni si a.
23 Mana lei in ni tawh a, mihring bâwih ni tawh suh u.
24 Unaute u, mi tin koh an nih laia an awm dân ang khân Pathian hmaah awm reng rawh se.
25 Nupui pasal la nei lote* chungchâng thu-ah chuan, Lalpa hnên aṭangin thupêk eng mah ka nei lo; nimahsela, Lalpa’n zahngaihna a lantîr avânga mi rinawm angin ka ngaih dân ka sawi dâwn a ni.
26 Chutichuan, tûn laia harsatnate han thlîr hian, mi a awm dân ngaia a awm reng chu a tân a ṭhat ber ka ring.
27 Nupuiah phuarin i awm em? Phelhna zawng suh. Nupui nei lo i ni em? Nupui zawng suh.
28 Nimahsela, nupui pasal in nei a nih pawhin thil in tisual lo ve. Tin, nupui pasal la nei lote’n* nupui pasal an neih hian thil sual an ti hek lo. Amaherawhchu, chutiang mite chuan tisaah hrehawm an tuar ang. Kei erawh chuan tawrhtîr loh che u ka tum a ni.
29 Chu bâkah, unaute u, hun tlêm tê chauh a awm tawh tih ka sawi duh a ni. Tûn aṭang chuan nupui neite pawh nei lo angin awm sela,
30 ṭapte pawh ṭap lo angin awm sela, lâwmte pawh lâwm lo angin awm sela, leitute pawh nei lo angin awm sela,
31 khawvêl hmangtute pawhin hmang pumhlûm suh se; khawvêl awm dân hi a inthlâk danglam mêk si a.
32 Tin, lungkhamna lak aṭanga in fihlîm ka duh a ni. Nupui nei lo chuan Lalpa a tihlâwm theih dân tûr ngaihtuahin Lalpa thilte a lungkham ṭhîn a.
33 Nupui nei erawh chuan a nupui a tihlâwm theih dân tûr ngaihtuahin khawvêl thilte a lungkham a,
34 a rilru a phîr ṭhîn. Chu bâkah, nula thianghlim pawh tiamin, pasal nei lo hmeichhia chuan a taksa leh thlarauva a thianghlim theih nân Lalpa thilte a lungkham ṭhîn a. Nimahsela, pasal nei hmeichhia chuan a pasal a tihlâwm theih dân tûr ngaihtuahin khawvêl thilte a lungkham ṭhîn.
35 Chûngte chu in hlâwkna tûra sawi ka ni, khuahkhirhna* tûr che u ni lovin, mawi taka in awm reng theih nân leh tibuaitu awm lova Lalpa rawng in bâwl reng theih nâna sawi ka ni zâwk e.
36 Amaherawhchu, nupui nei lo tu emawin a tisa châkna thunun thei dâwn lova a inhriat a, ani chu a naupan lutuk tawh loh bawk chuan, nupui a neih chu a ṭha zâwk a ni. Chu chu a sual lo ve.
37 Nimahsela, tu pawhin nupui neih ṭûl a tih loh va, a châkna a thunun theih a, a thinlunga nupui neih loh a tum tlat* chuan, ani chuan a tiṭha e.
38 Tin, tu pawh nupui pasal nei* chuan a tiṭha e; nimahsela, tu pawh nupui pasal nei lo chuan a tiṭha lehzual ang.
39 Nupui chu a pasal dam chhûng chuan phuarin a awm a; amaherawhchu, a pasal a thih hnuah chuan a duh apiang nei tûrin a zalên a ni. Mahse, Lalpaa awm mi chauh a ni tûr a ni.
40 Nimahsela, ka ngaih dân chuan pasal nei leh tawh lo se a hlim zawk ang; kei pawhin Pathian thlarau ka nei tih ka ring nghet tlat a ni.
Footnote-te
^ Chu chu, mipat hmeichhiatna hmanpui loh tihna a ni.
^ Grik ṭawnga por·neiʹa. Thu Har Hrilhfiahna en rawh.
^ A ngial a ngan chuan, “nula thianghlim.” He Grik thu mal hian nula leh tlangvâl a kâwk thei ve ve a ni.
^ Châng 25-naa footnote en rawh.
^ A ngial a ngan chuan, “hruivalh chhûnga paih lût.”
^ A nih loh leh, “a thianghlimna vawng tlat.”
^ A nih loh leh, “inneihnaa a thianghlimna pe.”
