Korinth Khuaa Mite Hnêna Lehkhathawn Pakhatna 8:1-13
8 Tin, milemte hnêna ei tûr hlan chungchângah chuan kan vaiin hriatna kan nei tih kan inhria e: Hriatna chuan chapona a thlen ṭhîn a, hmangaihna erawh chuan mi a siam ṭha ṭhîn.
2 Tu pawhin thil eng emaw hriaa a inngaih chuan a hriat tûr ang chu a la hre lo a ni.
3 Amaherawhchu, tu pawhin Pathian a hmangaih chuan ani chu Pathian mi hriat a ni.
4 Tin, milem hnêna hlan tawh ei tûr ei chungchângah chuan, khawvêlah hian milem chu eng mah a ni lo tih leh Pathian pakhat chauh lo chu a dang reng rêng an awm lo tih kan hria.
5 Vânah emaw, leiah emaw Pathian tia kohte awm mah sela, chutiang “pathian” tam tak leh “lalpa” tam tak an awm rêng si a.
6 Kan tân erawh chuan Pathian pakhat chauh, Pa chu a awm si a; Lalpa pakhat chauh, Isua Krista chu a awm bawk a, ani chu Pathianin thil zawng zawng siam nân a hmang a, keini pawh amah kal tlanga siam kan ni.
7 Amaherawhchu, mi zawng zawngin chu hriatna chu an nei vek lo. Mi ṭhenkhat chu tûn hmaa milem an biak ṭhin avângin milemte hnêna hlan ei tûr an ei hian milem bia angah an inngai a; tichuan, an chhia leh ṭha hriatna chak lo chu a lo bawlhhlawh ta ṭhîn a ni.
8 Nimahsela, ei tûr hian Pathian min hnaih zualtîr lo va, kan ei loh pawhin eng mah kan chân phah lo va, kan ei pawhin hlâwkna eng mah kan nei hek lo.
9 Chutih rualin, duh thlang tûra dikna in neih chu mi chak lote tâna eng emawti taka tlûkna a nih lohna tûrin fîmkhur reng rawh u.
10 Nang chuan hriatna nei mah la, chhia leh ṭha hriatna chak lo mi tu emawin milem biakna ina chaw eia a hmuh che chuan, milemte hnêna hlan ei tûr ei a ngampat phah sawt dâwn lâwm ni?
11 Tichuan, i hriatna avângin Krista’n a thihsak i unaupa mi chak lo chu tihchhiatin a awm ang.
12 I unaute chunga chutianga thil sual i tih a, an chhia leh ṭha hriatna chak lo i hliam hian, Krista chungah thil sual i ti a ni.
13 Chuvângin, ei tûrin ka unau a tihtlûk dâwn ai chuan, ka unau ka tihtlûk lohna tûrin sa rêng rêng ka ei tawh ngai lo vang.
