Korinth Khuaa Mite Hnêna Lehkhathawn Pakhatna 9:1-27
9 Mi zalên ka ni lo vem ni? Tirhkoh ka ni lo vem ni? Kan Lalpa Isua hmu tawh ka ni lo vem ni? Nangni hi Lalpaa ka thawhrim rah in ni lo vem ni?
2 Mi dang tân tirhkoh ka ni lo a nih pawhin, in tân erawh ka ni ngei e! Nangni hi Lalpaa tirhkoh ka nihzia tichiangtu hming nemna ang in ni si a.
3 Min sawisêltute ka chhânna chu hei hi a ni:
4 Eia in tûrin dikna* kan nei lo vem ni?
5 Tirhkoh dang te, Lalpa unau te leh, Kipha* te’n ringtu nupui an hruai anga hruai ve tûrin dikna kan nei lo vem ni?
6 A nih leh, kei leh Barnaba hi tisa lam hnathawh chawlhsan tûra dikna nei lo kan ni bîk em ni?
7 Mahni inchâwma sipaia ṭang tu nge awm ngai? Tuin nge a rah ei lova grêp huan siam ngai? A nih leh, tuin nge ran rual hnute in si lova ran rual enkawl ngai?
8 Chûng thute chu mihring thlîrna aṭangin ka sawi em ni? A nih leh, Dân thu pawhin chûng thute chu a sawi lo vem ni?
9 Mosia Dânah chuan: “Bâwng pain buh a chîl laiin a hmui i phuar tûr a ni lo,” tih ziak a ni si a. Pathianin bâwng pate chauh a ngaihtuah em ni?
10 Chu chu kan tâna sawi a ni zâwk lo vem ni? Kan tâna ziak ngei a ni si a, lei lettu leh buh vawtu chuan chan neih inbeiseiin an thawk tûr a ni.
11 In zîngah thlarau lam thilte kan tuh tawh chuan, tûna in hnên aṭanga kan mamawh thil ṭhenkhat kan dawng hi thil dik lo a ni dâwn em ni?
12 Mi dangte’n in lakah chutianga phût tûra dikna an neih chuan, keini chuan kan nei nasa lehzual dâwn lâwm ni? Nimahsela, chu dikna* chu kan hmang lo, Krista chungchâng chanchin ṭha darh zêl tûr hi eng kawng maha kan dâl lohna tûrin engkim chhel takin kan tuar zâwk a ni.
13 Biak ina rawngbâwltute’n biak ina thilte an ei ṭhîn tih leh, maichâma thil hlân ṭhîntute’n maichâm aṭangin chan an nei ṭhîn tih in hre lo vem ni?
14 Chutiang bawkin, Lalpa chuan chanchin ṭha hriltute chu chanchin ṭha avânga châwm an nih theih nân thu a pe a ni.
15 Chuti chung pawhin eng mah ka dîl lo che u, hêng thute hi thil min tihsakna tûra ziak ka ni lo. Ka inchhuan theihna chân ai chuan thih a ṭha zâwk si a.
16 Tin, chanchin ṭha hril mah ila, chu chu ka inchhuan nachhan tûr a ni lo, ka tih ngei ngai a ni si a. Chanchin ṭha ka hril lo a nih chuan, ka chunga thleng tûr chu a va râpthlâk dâwn êm!
17 Chu chu inhuam taka ka thawh chuan lâwmman ka nei a ni; ka duh thu ni lova thawk ka nih pawhin, chu chu ka thawh tûra Lalpa’n mi kawltîr a la ni tho tho a ni.
18 A nih chuan, ka lâwmman chu eng nge ni? Chanchin ṭha ka hrilh hian chanchin ṭhaa ka thuneihna* ka hman sual lohna tûra a thlâwna chanchin ṭha ka hril theihna hi a ni.
19 Mi zawng zawng lak aṭangin zalên mah ila, a tam thei ang ber ka lâk luh theihna tûrin mi zawng zawng bâwihah ka insiam a ni.
20 Judate ka lâk luh theihna tûrin, Judate hnênah Juda mi angin ka awm ṭhîn; dân hnuaia awmte ka lâk luh theihna tûrin, dân hnuaia awmte hnênah dân hnuaia awm angin ka awm ṭhîn, keimah tak chu dân hnuaia awm si lovin.
21 Dân nei lote ka lâk luh theihna tûrin, dân nei lote hnênah dân nei lo angin ka awm ṭhîn, Pathian dân zâwm chung leh Krista dân hnuaia awm chung siin.
22 Chak lote ka lâk luh theihna tûrin, chak lote hnênah chak lo angin ka awm ṭhîn. Eng emawti tala mi ṭhenkhat ka chhandam theih nân, mi tinrêngte ṭanpui tûrin ka tih theih apiang ka ti tawh.
23 Tin, chanchin ṭha avângin engkim ka ti ṭhîn, mi dangte hnêna ka hril theihna tûrin.
24 Intlânsiaknaa telte chu an vaiin an tlân a; nimahsela, pakhat chauhvin lâwmman a dawng ṭhîn tih in hre lo vem ni? Lâwmman in dawn theih nân chutiang tak chuan tlân rawh u.
25 Intihsiaknaa tel tûr apiangte* chu kawng engkimah mahni an inthunun ṭhîn. Anni chuan lallukhum chhe thei an dawn theih nân an bei a, keini erawh chuan lallukhum chhe thei lo kan dawn theihna tûrin kan bei zâwk a ni.
26 Chuvângin, keipawh ka thlen tumna hmun hriain ka tlân a ni; boruak mai hnek angin ka hnek si lo,
27 ka taksa ka hnek* a, bâwih angin ka thu hnuaiah ka dah tawh zâwk a ni. Chuti lo chuan, mi dangte hnêna thu ka hrilh hnuin, eng emawti takin keimah ngei hi hnâwlin ka awm palh ang e.
Footnote-te
^ A ngial a ngan chuan, “thuneihna.”
^ Petera tia koh a ni bawk.
^ A ngial a ngan chuan, “thuneihna.”
^ A nih loh leh, “dikna.”
^ A nih loh leh, “infiam mi apiangte.”
^ A nih loh leh, “hrem; khauh taka thunun.”
