Korinth Khuaa Mite Hnêna Lehkhathawn Pahnihna 1:1-24
1 Pathian duh zâwng anga Krista Isua tirhkoh kei Paula leh kan unaupa Timothea’n Korinth khuaa Pathian kohhran leh Akaia ram pum puia mi thianghlim awm zawng zawngte hnênah he lehkhathawn hi kan ziak a ni:
2 Pathian kan Pa leh Lalpa Isua Krista hnên aṭanga khawngaihna nasa tak leh thlamuanna* in hnênah awm rawh se.
3 Kan Lalpa Isua Krista Pathian leh Pa, zahngaihnaa khat Pa leh thlamuanna zawng zawng Pathian chu fakin awm rawh se.
4 Pathian chuan a hnên aṭanga kan dawn thlamuanna hmanga fiahna* tinrêng tâwktute kan thlamuan theihna tûrin, kan fiahna tawh zawng zawngah min thlamuan* ṭhîn.
5 Krista hnungzuitute kan nih angin hrehawm tam tak kan tuar a, Krista avâng vêkin thlamuanna nasa tak kan dawng bawk.
6 Tin, fiahnate* kan tawh chuan, chu chu in tân thlamuanna leh chhandamna a ni a; thlamuan kan nih chuan, chu chu in tân thlamuanna a ni. Chu thlamuanna chuan kan hrehawm tawrh angte hi chhel taka tuar tûrin a ṭanpui ang che u.
7 Kan hrehawm tawrh ang in tuar angin, kan thlamuanna dawn ang pawh in dawng ang tih kan hriat avângin in chungah beiseina nghet tak kan nei a ni.
8 Unaute u, Asia rama hrehawm kan tawrhte kha in hriat loh kan duh si lo, khatia keimahni chaknaa kan do zawh rual loh nêksâwrna nasa tak tâwk a, dam chhuah rêng kan inbeisei tawh lohzia kha.
9 A nihna takah chuan, thi tûra hremna dawng tawh niin kan inhria a. Chu chu mahni inrinchhan lo va, mitthi kai thotu Pathian kan rinchhan zâwkna tûr a lo ni.
10 Chutiang thihna khawp dinhmun hlauhawm aṭang chuan min chhan chhuak tawh a, min chhan chhuak leh bawk ang a, min chhan chhuak zêl bawk ang tih amahah chuan kan beisei a ni.
11 Pathian hnêna min ngensakin min ṭanpui thei bawk a, mi tam takin min dîlsak chuan Pathianin a ngaithlain min ṭanpui ang a, chumi avâng chuan mi tam takin lâwmthu an sawi ang.
12 Hei hi kan inchhuan theihna a ni, khawvêl mite hnêna kan awm lai, a bîk takin in hnêna kan awm lai khân, Pathian hnên aṭanga lo kal thianghlimna leh dikna kan lantîr tih kan chhia leh ṭha hriatnain min hriatpui si a. Khawvêl finna kan rinchhan lo va, Pathian khawngaihna nasa tak kan rinchhan zâwk a ni.
13 In chhiara* in hriatthiam theih loh tûr thil eng mah in hnênah kan ziak si lo, hêng thilte hi in la hriatthiam vek* ka beisei a ni.
14 In inchhuanna kan ni tih eng emaw chen in hriatthiam tawh angin, kan Lalpa Isua nîah chuan keini pawhin kan chhuang dâwn che u a ni.
15 Chumi rin tlatna nên chuan, a ṭum hnihna atâna lâwmna in neih theihna tûrin* in hnêna lo kal hmasak ka tum a ni.
16 Makedonia ram pan paha rawn tlawh che u a, Makedonia ram aṭanga ka lêt hunah pawh rawn tlawh leh che u ka tum si a; tichuan, Judai rama ka kalna tûrah nangni’n min thlah ka beisei a ni.
17 Chutianga tih ka rilrûk lai khân, chu chu thil ho lam tak angin ka ngai em ni? A nih leh, mahni hmasial taka a chânga, “A ni, a ni,” tia ka sawi hnua, “Ni lo, ni lo,” tia sawi leh mai ṭhîn ka ni em ni?
18 Pathian a rin tlâk angin kan thusawite pawh hi a rin tlâk a ni. “A ni,” tia kan sawi hnuah, “ni lo,” tiin kan sawi lo vang.
19 Kei leh Silvana* leh Timothea’n a chungchâng in hnêna kan puan chhuah, Pathian Fapa Isua Krista khân, “a ni,” tia a sawi hnuah, “ni lo,” tiin a sawi ngai lo. “A ni,” tia a sawi tawh chuan, “a ni,” a ni reng a ni.
20 Pathian thutiamte chu engzâta tam pawh ni se, amah avângin “a ni,’ tih a lo ni a. Amah avâng vêkin Pathian hnêna kan ṭawngṭai hian, “Amen,” tiin kan sawi ṭhîn a; chutiang chuan, Pathian chawimawina kan thlen a ni.
21 Nangni leh keini hi Krista ta kan ni tih nemnghettu leh hriak min thihtu chu Pathian a ni.
22 Chu bâkah, ani chuan keimahniah hming nemna chhuin, kan thinlungah thlarau thianghlim min pe a. Chutiang chuan, malsâwmna lo thleng tûr* chu min pêk a tiam a ni.
23 Korinth khuaa ka lo kal rih loh nachhan chu lungngaihna nasa lehzual in tawh lohna tûrin a ni, chumi min hriatpui tûr chuan Pathian ka sâwm e.
24 In rinna chunga hotu kan ni lo va, in lâwmna tûr atâna in thawhpuite kan ni zâwk, in rinnaa ding in ni si a.
Footnote-te
^ A nih loh leh, “remna.”
^ A nih loh leh, “hrehawmna.”
^ A nih loh leh, “fuih.”
^ A nih loh leh, “hrehawmnate.”
^ Ni thei dang leh chu, “in hriat chian tawh sa.”
^ A ngial a ngan chuan, “a tâwp thleng.”
^ Ni thei dang leh chu, “hlâwkna vawi hnih in neih theih nân.”
^ Sila tia koh a ni bawk.
^ A nih loh leh, “pe tla (pawisa hlawh chhuah); thil lo thleng tûr atâna tiamkamna.”
