Korinth Khuaa Mite Hnêna Lehkhathawn Pahnihna 10:1-18
10 Tin, in zînga ṭhenkhatin in hnêna ka awm laia nêm tak, ka awm loh laia khirh tak anga an sawi kei Paula ngei hian, Krista nunnêmna* leh ngilneihnain ka ngên a che u.
2 Tisa taka awm anga min ngaitute chu ka lo thlen huna na taka ka zilh a ngaih lohna tûrin an lo inthlâk danglam tawh ka beisei.
3 Tisain awm mah ila, tisa dân angin kan indo si lo.
4 Kan râlthuamte hi tisa râlthuamte a ni lo va, kulhpui nghet takte tihchhiat theihna tûra Pathian min pêk râlthuam thiltithei takte a ni zâwk.
5 Pathian hriatna dâltu chhût dân dik lote leh thil sâng tinrêngte chu kan tichhia a; tin, ngaihtuahna tinrêngte chu Krista thu awih tûrin salah kan hruai a ni.
6 In thuawihna a famkim ruala thuawih lo zawng zawngte hrem tûrin kan inpeih bawk.
7 A lan dân aṭang maiin thil in thlîr ṭhîn a ni. Tu pawhin Krista ta a ni tih a inrin chuan, Krista ta a nih ang bawkin keini pawh kan ni ve tih thudik hi ngaihtuah nawn leh rawh se.
8 Tilunghnual tûr che u ni lo va, fuih tûr che u a Lalpa thuneihna min pêk hi ka lo chhuang lutuk a nih pawhin, tihmualphovin ka awm lo vang.
9 Ka lehkhathawnte hmanga tihhlauh che u tum anga lan ka duh si lo va.
10 “A lehkhathawnte chu thil a ti theiin a khauh va, amah kan hmuh* meuh chuan zuamawm tak leh a thusawite pawh hmuhsitawm tak a ni,” an ti si a.
11 Chutianga sawitute chuan hei hi hre rawh se, lehkhathawntea kan sawi ang khân kan lo thlen hunah kan ti ang.
12 Mahni infakte zînga tel kan duh lo va, anmahni ang nih lah kan duh hek lo. Chutianga mahni leh mahni inteh a, mahni leh mahni inkhaikhinte chuan hriatthiamna an nei lo.
13 Nimahsela, ruat kan nihna ramri pâwn lamah kan inchhuang lo vang a, Pathianin min ruatna ramri chinah hian kan inchhuang zâwk ang, chutah chuan nangni pawh in awm a ni.
14 In hnêna kan lo kal khân, Pathianin ti tûra min ruat chauh lo chu eng mah kan ti lo, keini hi in hnêna Krista chanchin ṭha puang chhuaktu hmasa ber kan ni.
15 Ruat kan nihna ramri pâwn lama mi dangte thawhrimna chhuang kan ni lo; nimahsela, in rinna a pun zêl ruala kan bial chhûnga kan thiltih tawhte tihpuna a awm zêl kan beisei a ni. Chutichuan, kan thawhna tûr bial chu a zau lehzual ang,
16 mi dangte biala an thawh sa chu chhuang lo va, in ram piah lam thlenga chanchin ṭha kan hrilh theihna tûrin.
17 “Nimahsela, a chhuang apiangin Jehova chhuang rawh se.”
18 Mahni infakte chuan Jehova duhsakna an dawng lo va, amah ngeiin a fakate chuan an dawng zâwk si a.
