Korinth Khuaa Mite Hnêna Lehkhathawn Pahnihna 11:1-33
11 Ka ât deuhnaah hian min dawhthei ula ka ti hle mai. Dawh pawh min dawhthei rêng e!
2 Krista hnênah nula thianghlim anga ka hlan theihna tûr che uin, pasal pakhat ka hualsak si che u a; chuvângin, Pathian thîknain* ka thîk che u a ni.
3 Nimahsela, rûlin a fin vervêknaa Evi a thlêm thlu ang khân, Krista chanpual, takna leh thianghlimna lak aṭanga in rilru eng emawti taka tihkhawloh a nih ka hlau a ni.
4 Tu emaw in hnênah lo kalin, kan hrilh che u ni lo Isua dang chanchin hrilh ta che u sela, a nih loh leh thlarau in chan ngai loh rawn thlen ta sela, a nih loh leh in la pawm ngai loh chanchin ṭha dang sawiin lo kal ta sela, awlsam takin in lo pawm duh zêl mai âwm si a.
5 In tirhkoh ṭha chungchuangte chu eng thilah mah ka tluk loh ka inring si lo.
6 Thusawi thiam lo pawh ni tehrêng ila, hriatnaah chuan chutiang chu ka ni lo, chu chu kawng tinrêngah leh engkimah in hnênah chiang takin kan lantîr a ni.
7 A nih loh leh, chawimawia in awm theih nâna mahni intitlâwm a, a thlâwna Pathian chanchin ṭha in hnêna lâwm taka ka puan avâng khân thil ka tisual em ni?
8 In rawng ka bâwl theih nân ṭanpuinate pawmin kohhran dangte ka tihek* a.
9 Tin, in hnêna ka awm lai khân tlachhamin ka awm a; nimahsela, Makedonia aṭanga lo kal unaute’n ka tlâkchhamnaah nasa taka min ṭanpui avângin tu tân mah phurrit ka ni lo. Kawng tinrêngah in tâna phurrit ni lo tûrin ka awm reng ṭhîn a, chutiang chuan ka awm zawm zêl bawk ang.
10 Krista thutak keimaha a awm chhûng chuan, Akaia ram zawng zawngah hemi chungchâng hi inchhuang takin ka puang zêl ang.
11 Engvângin nge? Ka hmangaih loh vâng che u em ni? Ka hmangaih che u tih Pathianin a hria e.
12 Mi ṭhenkhat keimahni ang bawka tirhkoh nia insawi inchhuang tak an awm a, anni chu inchhuanna tûr chhan eng mah nei lova ka siam theihna tûrin, ka thiltih ṭhin ang kha ka ti zawm zêl ang.
13 Chûng mite chu tirhkoh der, hnathawktu mi bum hmang, Krista tirhkohva insiam chawpte an ni si a.
14 Chu chu a mak lo ve, Setana ngei pawh vântirhkoh ṭha* angah a insiam chawp ṭhîn si a.
15 Chuvângin, a rawngbâwltute pawh felna rawngbâwltute anga an insiam chawp ṭhîn hi a mak lo ve. Nimahsela, an tâwpna chu an hnathawh ang zêlin a ni ang.
16 Ka sawi leh ang: Tu man mi â angin min ngai suh se. Nimahsela, min ngai a nih pawhin, tlêm tala ka inchhuan ve theihna tûrin mi â angin min pawm mai rawh u.
17 Tûna ka thusawi hi Lalpa entawn tûr siam zuiin ka sawi lo va, mi âin mahni inrinchhana inchhuang taka a sawi angin ka sawi zâwk a ni.
18 Mi tam takin khawvêl thil an chhuan ṭhin avângin kei pawh ka inchhuang ve ang.
19 In “fin” êm avângin mi âte chu lâwm takin in dawh ṭhîn a.
20 Bâwiha siamtu che u apiang te, in thil neih eisaktu che u apiang te, in thil neih lâksaktu che u apiang te, in chunga intilal apiang te leh, in hmaia bêngtu apiangte chu in dawh ṭhîn si a.
21 Chak lo taka thil ti anga kan lan theih avângin, chumi sawi chu kan tân a zahthlâk a ni.
Nimahsela, mi dangte’n huai taka thil an ti a nih chuan, mi â angin sawi ta ila, kei pawhin huai takin thil ka ti a ni.
22 Hebrai mi an ni maw? Kei pawh ka ni. Israel mi an ni maw? Kei pawh ka ni. Abrahama thlah* an ni maw? Kei pawh ka ni.
23 Krista rawngbâwltute an ni maw? Mi â angin sawi ta ila, ka ni zâwk mah e: Ka thawk nasa zâwk a, tân inah ka tâng ngun zâwk a, vuak chhiarsên loh ka tuar a, thi lek lekin vawi tam tak ka awm a.
24 Judate lak aṭangin vawi khata vawi 40 tling lo vuak ṭum nga ka tâwk a,
25 ṭum thum tianga vuak ka ni a, vawi khat lunga den ka ni a, ṭum thum lawng kehchhiat ka tâwk a, ni khat leh zan khat tuipuiah ka awm a;
26 vawi tam tak ka zin kualnaah luite lak aṭanga hlauhawm te, suamhmangte lak aṭanga hlauhawm te, ka chipuite lak aṭanga hlauhawm te, hnam dang mite lak aṭanga hlauhawm te, khawpuia hlauhawm te, thlalêra hlauhawm te, tuipuia hlauhawm te, unau derte zînga hlauhawmte ka tâwk bawk a,
27 thlantui luang zawih zawihin rim takin ka thawk a, rilṭâm leh tuihâlin ka awm a, ei tûr nei lovin ka awm fo va, vawt ti tak leh hâk tûr nei lovin* ka awm fo bawk.
28 Chûng pâwn lam thilte bâkah chuan, nî tina min bawh buaitu* a awm a, chu chu kohhran zawng zawng tâna ka lungkhamna hi a ni.
29 Mi chak lote ka chak lohpui lo ngai em ni? Mi a tlûkin ka thinur lo ngai em ni?
30 Inchhuang tûr ka nih chuan, ka chak lohna lantîrtu thilte hi ka chhuang ang.
31 Chatuana fak tûr Pathian, Lalpa Isua Pa chuan dâwt ka sawi lo tih a hria e.
32 Damaska khuaah khân, lal Areta hnuaia ram awptu chuan min man tumin Damaska khua chu a vêntîr a.
33 Nimahsela, kulh bang tukverh aṭangin unaute’n bâwmin min thlâk thla a; tichuan, a kut ata ka tlân chhuak ta a ni.
Footnote-te
^ A ngial a ngan chuan, “Pathian ṭhahnemngaihna.”
^ A ngial a ngan chuan, “rawk.”
^ A nih loh leh, “êng vântirhkoh.”
^ A ngial a ngan chuan, “chî.”
^ A ngial a ngan chuan, “saruakin.”
^ A nih loh leh, “nî tina min turtu.”
