Korinth Khuaa Mite Hnêna Lehkhathawn Pahnihna 12:1-21
12 Ka’n inchhuang teh ang. Ka tân hlâwkna awm lo mah se, Lalpa’n min hmuhtîr inlârnate leh a thuchah min pêkte chungchâng ka sawi zêl dâwn.
2 Kum 14 kalta khân, Krista nêna inpumkhat mi pakhat ka hria, ani chu taksain nge taksa lovin a awm ka hre lo; Pathianin a hria, ani chu vân thumnaah lâk chhohvin a awm.
3 Ni e, chutiang mi chu ka hria, taksain nge taksa lovin a awm ka hre lo; Pathianin a hria.
4 Ani chu paradis-a lâkin a awm a, mihringte sawi theih loh leh sawi thian loh thute a hria a ni.
5 Chutiang mi chu ka chhuang dâwn a ni; nimahsela, ka chak lohnate chauh lo chu mahni ka inchhuang lo vang.
6 Ka chhuang duh a nih pawhin mi â ka ni lo vang, thutak ka sawi dâwn si a. Nimahsela, tu pawhin min hmuh ang leh ka hnên aṭanga an hriat aia nasaa min ngaih ropui lohna tûrin, chutianga inchhuang lo tûr chuan ka insûm a ni.
7 Ka hnêna puan chhuah thuchah mak danglam tak avâng maiin, tu mahin min ngai ropui suh se.
Ka inngaih ropui lutuk loh nâna min bêng* rengtu tûr Setana vântirhkoh, tisaa hlîng pêk ka ni; chuti lo chuan, ka inngaihlu lutuk palh hlauh ang e.
8 Chu hlîng chu min lâk bosak tûrin Lalpa hnênah vawi thum ka ngên a.
9 Nimahsela, ani chuan ka hnênah: “Ka khawngaihna nasa tak hi i tân a tâwk e, ka thiltihtheihna hi chak lohnaah asin tihfamkima a awm ni,” a ti a. Chutichuan, Krista thiltihtheihnain puan in anga min hliah khuh reng theihna tûrin, lâwm takin ka chak lohnate hi ka chhuang tawh zâwk ang.
10 Chuvângin, chak lohnaah te, hmuhsitnaah te, tlâkchhamnaah te, tihduhdahnaah te leh, harsatnaahte Krista avângin ka lâwm ṭhîn. Ka chak loh apiangin tihchakin ka awm ṭhîn si a.
11 Mi â ka lo ni ta a nih hi. Nangni hian min faktu tûr ni siin â lo thei lovah min siam a ni. Eng mah ni lo mah ila, in tirhkoh ṭha chungchuangte chu eng thilah mah ka tluk lo bîk lo ve.
12 Tirhkoh ka nih chhinchhiahnate chu chhelna nasa tak nêna in zîngah chhinchhiahna te, thil mak te leh, thil ropui takte tiin ka lantîr kha.
13 In tân phurrit ka ni lo tih chauh lo chu kohhran dangte aiin chanvo hlu in nei tlêm bîk em ni? In tâna phurrit ka ni lo kha ka tisual a nih chuan, khawngaihin min ngaidam ang che u.
14 Ngai teh u! Hei hi in hnêna lo kal tûra vawi thum ka inpeihna a ni tawh, tûn ṭumah pawh hian in tân phurrit ka ni lo vang. In thil neihsak che u ni lovin, nangmahni hmuh che u ka duh zâwk a ni. Naupangte chu an nu leh pate tâna inkhâwl tûra beisei an ni lo va, nu leh pate erawh chu an fate tâna inkhâwl tûra beisei an ni si a.
15 Kei erawh chu in tân lâwm takin ka inhmang ang a, ka inhmangral vek bawk ang. Nasa taka ka hmangaih che u anga min hmangaih lêt hi ka phû lo vem ni?
16 Amaherawhchu, eng kawngah mah phurrit ka siamsak lo che u. Nimahsela, nangni chuan “fing vervêk tak” leh “bumna hmanga” nangmahni manah min puh a.
17 In hnêna ka rawn tirh tu emaw tal hmangin in lak aṭangin hlâwkna ka dawng ngai em ni?
18 Tita chu ka fuih a, a rualin unaupa pakhat ka tîr a. Tita chuan in lak aṭangin hlâwkna eng emaw tal a nei em ni? Rilru hmun khat pu-a kal kan ni lo vem ni? Hniak thuhmuna kal kan ni lo vem ni?
19 In hnêna kan thiamthu sawiah min lo ngai reng a ni maw? Krista nêna inpumkhatin Pathian hmaah thu kan sawi ṭhîn. Nimahsela, duh takte u, kan thiltih zawng zawng chu nangmahni tihchakna tûr a ni.
20 Ka lo thlen hunah eng emawti taka ka duh anga ka hmuh loh che u leh, in duh anga min hmuh loh ka hlau si a. Inhnial buaina te, îtsîkna te, thinur puah kehna te, ngaih dân inan lohna te, insawichhiatna te, inrêlna te, chapona te leh, buainate a awm ka hlau a ni.
21 Chuti lo chuan, ka lo kal leh hunah in hmaah ka Pathianin min timualpho ang a, mi tam tak an thil sual tih ṭhin la bânsan lote avânga tihlungngaih ka ni palh ang e. Anni chuan an thil tenawm tih te, an nungchang bawlhhlawh* te leh, tîmna nei lova thil sual an tih ṭhinte* chu an la sim si lo va.
Footnote-te
^ A nih loh leh, “vua.”
^ Grik ṭawnga por·neiʹa. Thu Har Hrilhfiahna en rawh.
^ Thu Har Hrilhfiahna en rawh.
