Korinth Khuaa Mite Hnêna Lehkhathawn Pahnihna 13:1-14
13 Hei hi, “In hnênah ka lo kal ang,” tia vawi thum ka sawina a ni ta. “Thubuai rêng rêng thuhretu pahnih emaw, pathum emaw hriatpuinain* chinfel tûr a ni.”
2 Tûnah hian in hnênah awm lo mah ila, ka thusawite hi a vawi hnihna atâna ka tlawhna che u angin ngai ang che u. Tin, tûn hmaa thil sual titute leh mi dang zawng zawngte pawh ka vaukhân lâwk a ni. Ka lo kal leh a nih phawt chuan, tu man zilhna an pumpelh lo vang.
3 Chutiang chuan, Krista’n keimah hmangin thu a sawi tih in hre thei ang; tin, Krista chu in zîngah a chak lo a ni lo va, a thiltihtheihna nasa tak a lantîr zâwk a ni.
4 A nihna takah chuan, chak lohna avânga bana tihhlum a ni a; nimahsela, Pathian thiltihtheihna avângin a nung a ni. Tûn hmaa a chak loh ang khân keini pawh kan chak lo va; nimahsela, in chunga Pathian thiltihtheihna a awm avângin amah nên kan nung ang.
5 Rinnaah in awm nge awm lo inbih chiang ṭhîn ula, eng ang mi nge in nih infiah ṭhîn rawh u. A nih loh leh, Isua Krista nên pumkhat in ni tih in hre lo vem ni? Pawm hlawh lo in nih ngawt loh chuan.
6 Pawm hlawh lo kan ni lo tih in hriat ka beisei tak zet a ni.
7 Thil sual eng mah in tih lohna tûrin Pathian hnênah kan ṭawngṭai a ni; pawm hlawh anga kan lan theih nân ni lovin, pawm hlawh lo anga kan lan hun pawha thil ṭha in tih theihna tûrin.
8 Thutak theh darh tûr chauh lo chuan, thutak kalhin eng thil mah kan ti thei si lo va.
9 Kan chak loh hun apianga nangni in chak ṭhin avâng hian kan lâwm ṭhîn. Kawng dik in zawh leh theih nân kan ṭawngṭaisak che u a ni.
10 Chuvâng chuan, hêng thute hi in hnêna ka lo kal hmain ka ziak a ni. Lalpa’n thuneihna mi pêk hi ka hman nasat lutuk loh nân leh nangmahni tihchhiat nân ni lo va, siam ṭhat nâna ka hman theih zâwkna tûrin.
11 A tâwp berah chuan unaute u, lâwm takin awm ula, a ṭûl angin inthlâk danglam ula, thlamuang takin awm ula, rilru hmun khat puin awm ula, inrem takin awm zawm zêl ang che u. Tichuan, hmangaihna leh remna* Pathianin a awmpui ang che u.
12 Fawh thianghlimin chibai inbûk tawn rawh u.
13 Mi thianghlim zawng zawngin chibai an bûk a che u.
14 Lalpa Isua Krista khawngaihna nasa tak leh Pathian hmangaihna leh thlarau thianghlim malsâwmnate chu in vaia hnênah awm rawh se.
