Korinth Khuaa Mite Hnêna Lehkhathawn Pahnihna 2:1-17
2 Lungngai chunga in hnêna lo kal nawn tawh lo tûrin ka rilru ka siam fel tawh si a.
2 Ka tihlungngaih si che u chuan, ka tihlungngaihte vêk lo chu min tilâwmtu tûr tu nge awm ang?
3 Ka lo kal huna ka lâwmna tûr nangmahni ka tihlungngaih lohna tûr che uin, lehkhathawn kha in tân ka ziak a ni. Lâwmna min thlentu hian nangni zawng zawng pawh lâwmna a thlen che u ka rinngheh tlat avângin.
4 Tilungngai tûr che u ni lovin, ka hmangaihna che u thûkzia hriattîr tûr che uin hrehawm ti tak, rilru na tak leh, mittui tam tak tla chunga in tâna ka ziah a ni si a.
5 Tin, tu pawhin lungngaihna a thlen chuan kei min tilungngai lo va, in vaiin eng emaw chen a tilungngai ṭheuh che u a ni; nimahsela, hemi chungchâng hi sawi tam lutuk ka duh lo.
6 Chutiang mi tân chuan, mi tam zâwkin an zilhhauna chu a tâwk tawh e.
7 Ani chu a lungngaih lutuk avânga a beidawn loh nân, thinlung taka ngaidamin in thlamuan zâwk tûr a ni.
8 Chuvângin, amah in hmangaihna tinghet tûrin ka fuih a che u.
9 Lehkha ka thawn chhan che u chu, kawng engkima thu in awih leh awih loh ka hriat theih nân a ni.
10 Eng thilah pawh in ngaihdam apiang chu kei pawhin ka ngaidam a. A nihna takah chuan, ka ngaihdam tawh apiang chu (eng thilah pawh ka lo ngaidam tawh a nih chuan) Krista mit hmuhah in tâna ngaidam ka ni.
11 Chutichuan, Setana bumin kan awm lo vang, a ruahmannate* chu kan hai si lo va.
12 Tin, Krista chanchin ṭha hril tûra Troas khua ka thlen lai khân, Lalpa hna thawk tûrin ka tân kawng a lo inhawng a.
13 Mahse, ka unaupa Tita ka hmuh loh avângin rilru thlamuanna rêng ka nei lo va.* Tichuan, anni chu ṭha taka thlahin Makedonia ram lam ka pan ta a.
14 Nimahsela, Krista ruala hnehna kawng zawhnaa min hruai reng ṭhîntu leh keimahni hmanga amah hriatna rimtui hmun tina tidarhtu Pathian hnênah lâwmthu awm rawh se!
15 Chhandam mêkte zîngah leh boral mêkte zîngah chuan, Pathian tân keini hi Krista rimtui kan ni si a.
16 A hnuhnûng zâwkte tân chuan thihnaa hruaitu thihna thlentu rim kan ni a, a hmasa zâwkte tân erawh chuan nunnaa hruaitu nunna thlentu rimtui kan lo ni. Hêng thilte atân hian tu nge tling zo vang?
17 Mi tam takte angin Pathian thu chu sumdâwn nân kan hmang si lo va, Pathian tirhin Pathian mit hmuhah Krista zirtîrte angin tih tak zetin kan sawi zâwk a ni.
Footnote-te
^ A nih loh leh, “a thiltumte; a thil duante.”
^ A nih loh leh, “ka thlarau a hahdam lo.”
