Korinth Khuaa Mite Hnêna Lehkhathawn Pahnihna 3:1-18
3 Mahni infak kan ṭan leh dâwn ta maw? A nih loh leh, mi ṭhenkhat angin fakna lehkhathawn in hnêna pêk emaw, in hnên aṭanga dawn emaw kan mamawh em ni?
2 Nangmahni ngei hi kan lehkhathawn, kan thinlunga inziak, mi zawng zawngin an hriat leh an chhiar chu in ni e.
3 Nangni hi rawngbâwltute anga kan ziah, Krista lehkhathawn chu in ni tih chiang takin a lang si a. Chu chu lehkhatui ni lovin, Pathian nung thlarauva ziah a ni a; lung phêkahte ni lovin, tisa thinlung phêkahte ziah a ni zâwk.
4 Krista avângin Pathianin keimahniah inrintâwkna min pe a ni.
5 He hna thawk tûr hian keimahni chaknain kan tling kan ti lo va, Pathian avâng zâwkin kan tling a ni.
6 Amah avâng bawkin thuthlung thar rawngbâwltute ni tûrin kan tling a, dân thu rawngbâwltute kan ni lo va, thlarau rawngbâwltu kan ni zâwk. Dân thu chuan thi tûrin thiam loh a chantîr a, thlarau erawh chuan a tinung ṭhîn a ni.
7 Thihna thlentu lung phêka ker dân thu chu ropui takin a lo thleng a, chu chuan Mosia hmêl chu Israel fate’n an en ngam loh khawpa ropuiin a ti êng a; nimahsela, chu ropuina chu ral leh mai tûr a ni.
8 Chuti a nih chuan, thlarau rawngbâwlna chu a ropui zâwk dâwn lo vem ni?
9 Thiam loh chantîrna thlentu rawngbâwlna mah a ropui chuan, felna thlentu rawngbâwlna chu a va ropui lehzual dâwn êm!
10 A aia ropui zâwk a lo lan tâk avângin, ropui taka awm ṭhîn kha a ropuina hlihthlâk a ni ta a.
11 Ral leh mai tûr mah ropui taka pêk a nih chuan, awm reng tûr ropuina phei chu a va nasa lehzual dâwn êm!
12 Chutiang beiseina chu kan neih avângin zalên takin thu kan sawi a ni.
13 Israel fate’n tihrala awm leh mai tûr dân thupêk ropuina a tâwp thlenga an en reng lohna tûra Mosia’n a hmai a khuh ang khân, keini chuan kan khuh ve lo.
14 Nimahsela, an rilru a chawlawl a. Vawiin thleng hian thuthlung hlui an chhiarin, chu khuhna chu hlîm lohvin a la awm reng a ni; chu chu Krista hmang chauhva lâk bo theih a ni si a.
15 A nihna takah chuan, vawiin thleng hian an thinlung khuha a la awm reng avângin, Mosia thuziakte chu an la hre thiam thei lo.
16 Nimahsela, miin Jehova lam a hawi hian, chu khuhna chu lâk bo a ni ṭhîn.
17 Jehova chu Thlarau a ni a, Jehova thlarau awmnaah chuan zalênna a awm ṭhîn.
18 Keini kan hmai khuhna hlîm tawhtu zawng zawngte hian Jehova ropuina chu dârthlalang angin kan lantîr a. Thlarau mi* Jehova duh dân ang chiaha amah ang ni tûr leh nasa lehzuala a ropuina lan chhuahtîr tûrin tihdanglamin kan awm tawh a ni.
Footnote-te
^ Ni thei dang leh chu, “Jehova thlarau hmangin.”