Korinth Khuaa Mite Hnêna Lehkhathawn Pahnihna 4:1-18
4 Chutichuan, kan chunga zahngaihna lantîr a nih avânga kan neih he rawngbâwlna avâng hian kan tlâwm lo va.
2 Thil zahpuiawm a rûka tih ṭhinte chu kan hnâwl a, vervêk taka khawsain emaw, Pathian thu pawlh dalin emaw kan awm hek lo. Thutak târ langin, Pathian mithmuhah mi tin chhia leh ṭha hriatna mit tlunga awm kan tum zâwk ṭhîn.
3 Kan chanchin ṭha hrilh hi khuha a awm chuan, boral mêkte hnênah hian a ni khuha a awm ni.
4 Pathian anpui, Krista chanchin ṭha ropuina êng an chunga a ên theih lohna tûrin, ring lotute rilru chu he khawvêl* pathian hian a tihdelsak a ni.
5 Mahni chanchin kan hril si lo, Isua Krista chu Lalpa a nih thu leh Isua avânga in bâwih kan nih thu kan hril zâwk a ni.
6 Pathian chu: “Thim aṭangin êng lo chhuak rawh se,” tia sawitu a ni si a. Ani chuan Krista hmêla lang Pathian hriatna ropui takin kan thinlung a tiêng a ni.
7 Nimahsela, mihringte neih theih rual loh thiltihtheihna kan neih hi keimahni aṭanga chhuak ni lo va, Pathian hnên aṭanga lo kal a ni tih chiang taka a lan theihna tûrin, he ro hi hlum bêlahte kan vawng a ni.
8 Kawng tinrênga nêk chêpin kan awm a; nimahsela, che sawn thei lo tûra man beh erawh kan ni lo. Mangangin kan awm a; nimahsela, chhuahna kawng nei lovin kan awm lo.*
9 Tihduhdahin kan awm a; nimahsela, kalsanin kan awm lo. Vuak thlûkin kan awm a; nimahsela, tihboralin kan awm lo.
10 Isua angin thihna khawp dinhmun hlauhawm kan hmachhawn ṭhîn a, chu chuan Isua tawrh ang kan tuar tih mite a hriattîr a ni.
11 Nungdamin awm mah ila, Isua kan zui avângin kan nunna hi dinhmun hlauhawmah a ding reng a, chu chu Isua hrehawm tawrh ang kan tuar tih mite hriattîr nân a ni.
12 Chuvângin, thihna hmachhawn ṭhîn mah ila, chu chu in tân nunna a lo ni.
13 “Rinna ka lantîr a; chuvângin, thu ka sawi a ni,” tih ziak ang khân, keini pawhin chutiang rinna chu kan lantîr a; chuvângin, thu kan sawi a ni.
14 Isua Kaithotu khân Isua rualin min kai tho vang a, Isua hmaah min hruai ang tih kan hria.
15 Chûng thil zawng zawng chu in tân a thleng a ni, mi tam lehzualin Pathian khawngaihna nasa tak an dawn theihna tûrin. Tichuan, Pathian ropui nân mi tam lehzualin a hnênah lâwmthu an sawi ang.
16 Chuvângin, kan tlâwm lo va, kan pâwn lam mihring hi chak lo telh telh mah se, kan chhûng lam mihring erawh nî tin siam tharin a awm a ni.
17 Kan hrehawm tawrh hi nêp tak, hun rei lo te chhûng atân chauh a ni a, chu hrehawmna* chuan chatuan daih ropuina zual zêl* chu min dawntîr a ni.
18 Thil hmuh theihte en lovin, thil hmuh theih lohte kan en tlat zâwk si a. Thil hmuh theihte chu rei lo te chhûng atân chauh a ni a, thil hmuh theih lohte erawh chu chatuan atân a ni.
Footnote-te
^ A nih loh leh, “he kalhmang.” Thu Har Hrilhfiahna en rawh.
^ Ni thei dang leh chu, “nimahsela, beiseina kan hloh lo.”
^ A nih loh leh, “fiahna.”
^ A ngial a ngan chuan, “rit.”
