Korinth Khuaa Mite Hnêna Lehkhathawn Pahnihna 5:1-21
5 He leia kan in, he puan in hi ṭhiahin awm dâwn mah se, kuta sak loh in, vâna chatuana awm tûr, Pathian hnêna mi kan nei ang tih kan hria a ni.
2 Vâna kan tâna buatsaih chu kawr anga hâk châk êm êmin he inah hian rûmin kan awm ṭhîn.
3 Chutianga kan hâk chuan saruakin kan awm lo vang.
4 Keini he puan ina awmte hi mangangin kan awm ṭhîn, he puan in hi thawmhnaw anga phelh kan duh vâng a ni lo va, vâna in chu kawr anga hâk kan duh vâng zâwk a ni; thi thei hi nunnain a lem zawh theihna tûrin.
5 Chutiang nunna min buatsaihsaktu chu Pathian ngei a ni a. Ani chu thil lo thleng tûr tiamkamna atâna a thlarau min petu chu a ni.
6 Chutichuan, kan in, taksaa kan awm chhûng hian Lalpa hnênah kan la awm rih lo mai a ni tih hriain, ngaihngam takin kan awm fo ṭhîn,
7 thil hmuh theihte ena kal lovin, rinnain kan kal zâwk si a.
8 Nimahsela, ngaihngam takin kan awm a, taksaa awm aiin, Lalpa hnêna kan ina awm kan thlang zâwk a ni.
9 Chuvângin, inah a hnênah kan awm emaw, awm lo emaw, a pawm tlâk nih kan tum tlat ṭhîn.
10 Mi tin chu taksaa an awm laia thil ṭha emaw, thil ṭha lo emaw an tih ang zêla rulh lêt an nih theihna tûrin, Krista rorêlna ṭhutthlêng hmaah kan vaia inlan vek tûr kan ni si a.
11 Chutichuan, Lalpa ṭih nachâng kan hriat avângin mite hmin kan tum reng ṭhîn. Pathian chuan min hre chiang a, nangni* pawhin min hriat chian ka beisei.
12 In hnênah kan infak leh ta a ni lo, thinlunga awm ni lo va, pâwn lam lan dân chhuangtute chu in chhân theihna tûrin, keimahnia chhuan tûr ṭha kan hrilh zâwk che u a ni.
13 Kan â a nih chuan Pathian tân a ni a; kan fing a nih chuan in tân a ni.
14 Krista hmangaihna chuan min tîr lui si a, heti hian thu tâwp kan siam a ni: Mi zawng zawng tân mi pakhat a thi a, mi zawng zawng an thih tawh avângin chutianga a thih chu a ngai a ni.
15 A nungte chu mahni tâna nung tawh lo va, an thih aia thia tho leh atâna an nun tawh zâwkna tûrin mi zawng zawng tân a thi a ni.
16 Chuvângin, tu mah hi mihring thlîr dân aṭangin* kan thlîr tawh lo. Mihring thlîr dânin Krista kha lo thlîr ṭhîn mah ila, tûnah erawh chutiang chuan kan thlîr tawh lo.
17 Tin, tu pawh Krista nêna an inpumkhat chuan, ani chu thil siam thar a lo ni. Thil hluite chu a ral ta a, ngai teh, thil tharte a lo awm ta.
18 Nimahsela, thil engkim hi Pathian hnên aṭanga lo chhuak a ni a, ani chuan Krista hmangin amah nên min inremtîr leh mai bâkah, chu inremtîr lehna rawngbâwl hna chu min pe bawk a ni.
19 Chumi awmzia chu, Pathianin mite chu amah nêna an inrem leh theih nân Krista a hmang a, an thil sual tihte chu a hre reng tawh lo tihna a ni. Chu bâkah, Pathian leh mite inrem leh theihna thuchah min kawltîr bawk.
20 Chutichuan, Krista aia palaite kan ni a, Pathianin keimahni hmangin ngenna a siam tih theih a ni. Krista aiawhte kan nih angin: “Pathian nên inrem leh rawh u,” tiin kan ngên a che u.
21 Krista chu sual ngai lo mah se, amah avânga Pathian hmaa mi fel kan nih theihna tûrin, kan tân sual thawina a lo ni.
Footnote-te
^ A ngial a ngan chuan, “in chhia leh ṭha hriatna.”
^ A ngial a ngan chuan, “tisa dânin.”
